Bunlar "Ağcabəditaxıl" MMC-nin yaxın gələcəkdə həyata keçirmək istədiyi yeni layihələrdir
Ölkəmizdə iqtisadiyyatın, o cümlədən qeyri-neft sektorunun əsas sahələrindən aqrar sektor mahiyyətcə fərqli yeni inkişaf mərhələsinə qədəm qoymuşdur. İnkişaf etmiş dünya dövlətlərinin qabaqcıl təcrübəsindən, mütərəqqi texnologiyalardan, elmi yeniliklərdən yaradıcılıqla istifadə etmək artıq bir zərurətə çevrilmişdir.
Azərbaycan Respublikasının Prezidenti İlham Əliyevin mayın 25-də kənd təsərrüfatı məsələlərinə həsr olunmuş müşavirədə aqrar sahəyə investisiya qoyuluşu ilə bağlı sahibkarlara etdiyi tarixi çağırış və proqramda müəyyən edilmiş hədəflər bu gün iri istehsalçılar üçün əsas fəaliyyət proqramıdır. "Ağcabəditaxıl" MMC-nin direktoru Ceyhun Məmmədov deyir ki, dövlət başçısının "sahibkarlar investisiya qoymalı, yerli istehsal sahələri inkişaf etməlidir" tapşırığına əməli işlə cavab vermək üçün tədbirlər planı hazırlayıblar: "Starteji sahə olan pambıqçılığın sənaye təməli əsasında inkişafına böyük önəm veririk. Biz, sadəcə, pambıq istehsalını artırmaqla kifayətlənmirik. Pambıqçılığın müasir tələblər əsasında sənayələşməsi üzrə yeni investisiya mərhələsinə start vermişik. Fəaliyyətimiz yalnız Ağcabədi rayonu ərazisindəki işlərimizlə məhdudlaşmır. Dövlət başçısının tapşırıq və tövsiyələrinə, regional ixtisaslaşma çağırışlarına uyğun olaraq, digər rayonlarda da geniş ərazilərdə pambıq əkib becəririk. Bu böyük istehsal potensialını yetərincə dəyərləndirmək məqsədilə Biləsuvarda yeni emal müəssisəsi qurmağa başlamışıq. Bu layihə başa çatandan sonra həmin zonada yetişdirdiyimiz məhsulun itkisiz və sürətli emalını təmin edə biləcəyik".
Ağcabədidə 3,5 milyon manat sərmayə ilə quracaqları pambıq çiyidindən yağ istehsal edən müəssisənin ən mühüm layihələrindən olduğunu deyən C.Mehdiyev bildirdi ki, həmin müəssisə regional mərkəz rolunu oynayacaq: "Burada həm Ağcabədidəki, həm də digər rayonlardakı sahələrimizdən yığılan pambığın çiyidi emal ediləcək. Beləliklə, fərqli bölgələrin aqrar resurslarını bir sənayə mərkəzində birləşdirərək pambığın dərin emal zəncirini qurmuş olacağıq". Direktorun sözlərinə görə, hazırda MMC-nin mütəxəssisləri zavod üçün ən müasir texnoloji avadanlıqların alınması üçün Avropada işgüzar səfərdədirlər və bu istiqamətdə geniş bazar araşdırmaları aparırlar.
Məlumat üçün bildirək ki, "Ağcabəditaxıl" MMC 2500 hektar ümumi sahəyə malikdir. Həmin sahələrin 1340 hektardan çox hissəsi 23 müasir pivot suvarma sistemi ilə təchiz olunub. Aqroparkın əhatə etdiyi sahələrdə taxıl, pambıq əkilir və intensiv bağ salınıb. MMC bu il 230 hektarda taxıl əkib. Təbiət xeyli çətinliklər yaratsa da, nəticə yaxşı oldu. Buğda zəmilərinin hər hektarından orta hesabla 54,5 sentner məhsul biçildi.
Aqroparkın ümumi meyvə bağları 460 hektarı əhatə edir. Nektarin, xurma, meyvə, badam bağları intensiv becərmə hesabına bol məhsul verir. Nektarin yığımı başa çatmaq üzrədir. Məhsuldarlıq qənaətbəxşdir. Badam və xurma bağlarından da bol məhsul gözlənilir. Onu da qeyd edək ki, aqroparkda 180 nəfər çalışır. Mövsümi işçilərin sayı isə 350 nəfərdən çox olur.
Ümumi investisiya portfeli 30,7 milyon manat olan aqropark xammalı ölkə daxilində tam hazır sənayə məhsuluna çevirərək idxaldan asılılığı azaltmaqda qərarlıdır. Yaxın gələcəkdə 15 min tonluq soyuducu anbar kompleksi yaratmağı nəzərdə tutan MMC saatda 1 ton meyvə qurutmaq gücündə olacaq sexin və badamqırma zavodunun inşasını da planlaşdırıb. Bunlardan əlavə, müəssisə 15 milyon manat investisiya hesabına intensiv meyvə bağlarını daha 430 hektar artırmaq istəyir.
Ceyhun Mehdiyev deyir ki, həyata keçirilən yeni layihələr - istər pambığın dərin emalı, istərsə də intensiv bağçılıq və logistik infrastruktur layihələri təkcə iqtisadi səmərə deyil, həm də region əhalisi üçün yüzlərlə yeni daimi iş yeri və minlərlə sakinin sosial rifahının davamlı yüksəlməsi deməkdir: "Biz sahibkarlar Prezidentin dəstək və diqqətindən, dövlətin yaratdığı geniş imkanlardan bacarıqla bəhrələnərək qarşıdakı 5 ili dinamik inkişaf və ərzaq bolluğu mərhələsinə çevirmək əzimindəyik".
Lazım QULİYEV,
"Azərbaycan"
