Turizmin gəlirli sahə olması yeni reallıq deyil. Bu gün də elə ölkələr var ki, onun dövlət büdcəsinin əhəmiyyətli hissəsi turizm gəlirlərindən formalaşır.
Turistləri cəlb edən sahələr genişdir. İnsanlar gəzinti və istirahət üçün adətən maraqlarına uyğun olaraq səfalı təbiəti, qədim abidələri, tarixi şəhərləri olan ölkələri seçirlər. Bununla yanaşı, sağlamlıq turizminə də son dövrlər maraq artıb. Necə deyərlər, "həm ziyarət, həm ticarət" etmək istəyən turistlərin sayı bu gün kifayət qədərdir.
Azərbaycanın bütün bu sahələr üzrə geniş imkanları var. Ondan necə istifadə edilməsi isə başqa yazının mövzusudur. İndi birbaşa bu məsələ ilə bağlı bəzi rəqəmlərə nəzər salaq. Ötən il Azərbaycanda satılmış 86147 turizm zərfinin 67301-i, yaxud 78,1 faizi ölkə vətəndaşlarının xarici ölkələrə səfərləri üçün rəsmiləşdirilib. Hesabat dövründə, yəni 2025-ci ildə ölkədaxili səyahətlər üçün Azərbaycan vətəndaşlarına satılan turizm zərflərinin sayı isə 8483 olub. Bu, ümumi satışların cəmi 9,8 faizini təşkil edib. Bununla yanaşı, Azərbaycana səyahət etmək istəyən əcnəbilər və vətəndaşlığı olmayan şəxslərə 10363 turizm zərfi satılıb ki, bu da ümumi satışların 12 faizi qədərdir.
Turizm ölkənin ümumi inkişafı ilə yanaşı, strateji hədəf olan qeyri-neft-qaz sektoruna da böyük töhfə verir. Eyni zamanda bölgələrin inkişafına, əhalinin məşğulluğuna ciddi kömək göstərir. Ona görə də yüksək gəlir gətirən və çox sayda əhalinin məşğulluğunu təmin edən bu sahəyə diqqət gündəmdən düşməməlidir. İnsafən qeyd edək ki, ölkəmizdə artıq neçə ildir bu sahədə ciddi işlər görülür. Nəticəsi də var. Məsələn, 2025-ci ildə 2024-cü illə müqayisədə ölkə üzrə turizmdən əldə edilən gəlirin artımı 56 milyon manatdan çox (33,8 faiz) olub. Ötən il həmçinin turagent və turoperatorların sayı 381-dən 434-ə yüksəlib. Həmin müəssisələrdə çalışan işçilərin sayı isə 2700 nəfərə çatıb ki, bu da illik müqayisədə 26 faiz çoxdur.
Azərbaycanın sağlamlıq turizm potensialı da az deyil. Naftalanda bir çox dərdin dərmanı olan müalicəvi neft çıxır. Bununla yanaşı, ölkəmizdə çoxsaylı müalicəvi termal sular da mövcuddur. Azərbaycan Turizm Bürosu idarə heyətinin sədri Florian Zenqstşmid deyir ki, 2030-cu ilə qədər dünyada turizmdən götürüləcək qazancın məbləğinin 1,4 trilyon dollara çatacağı proqnozlaşdırılır: "Bunun təxminən 300 milyard dollarını tibbi (sağlamlıq) turizm təşkil edəcək. Azərbaycan Dövlət Turizm Agentliyi isə ölkənin bu nəhəng bazardan pay alması üçün konkret planlarla çıxış edir". F.Zenqstşmid həmçinin tibbi turizmin inkişafı üçün prioritet tədbirləri açıqlayıb: "Əvvəlcə idarəetmə və tənzimləmə çərçivəsi formalaşmalıdır. Qlobal akkreditasiya və səhiyyə standartlarının tətbiqi vacibdir. Növbəti mərhələdə sağlamlıq xidmətləri, ixtisaslaşmış nəqliyyat kimi yeni bizneslərə şərait yaradılmalıdır. Bu sahədə həm dövlət, həm də özəl investisiyalar üçün böyük imkanlar var".
Rüstəm KAMAL,
"Azərbaycan"
