Türk xalqlarını bir-birinə bağlayan ən güclü körpü mədəni və mənəvi dəyərlərdir. Məhz bunun parlaq təzahürü Azərbaycan Prezidenti İlham Əliyevin Qırğızıstan Respublikasının paytaxtı Bişkek şəhərinə işgüzar səfəri çərçivəsində bu qədim diyarda təntənəli şəkildə təşkil olunan 6-cı Dünya Köçəri Oyunlarının açılış mərasimində iştirak etməsidir.
Qırğız xalqının dövlətçilik fəlsəfəsinin təməlində, milli kimliklə tarixi-mədəni irsin ayrılmaz vəhdəti dayanır. Qədim köklərə malik bu xalqın ictimai-siyasi təfəkküründə köçəri mədəniyyətinin xüsusi yeri var. Əsrlər boyu formalaşan tayfa birlikləri, ənənəvi idarəetmə formaları, eləcə də nəsildən-nəslə ötürülən əzəmətli qəhrəmanlıq dastanları qırğız kimliyinin sarsılmaz sütunlarını təşkil edir.
Dünya Köçəri Oyunlarının əsas məqsədlərindən biri xalqları bir araya gətirən dostluq, sarsılmaz birlik və qarşılıqlı hörmət prinsiplərini təbliğ etməkdir. Bu tədbir köçəri sivilizasiyasının zəngin irsini və milli dəyərlərini qoruyub saxlamaq, onları heç bir dəyişikliyə məruz qoymadan gələcək nəsillərə ötürmək üçün xüsusi əhəmiyyət daşıyır. Bu oyunlar çərçivəsində köçəri xalqların tarixən formalaşdırdıqları ənənəvi və qədim idman növləri nümayiş olunur. Atçılıq sənətinin incəlikləri, milli güləş üslubları, qədim oxatma bacarıqları və digər növ yarışlar tamaşaçılara unudulmaz anlar bəxş edir.
Sentyabrın 6-dək davam edəcək bu tədbir, sadəcə, idman mübarizəsi ilə məhdudlaşmır. Əksinə, oyunlar çərçivəsində iştirakçı ölkələrin zəngin mədəni irsi, sənətkarlıq nümunələri, musiqi inciləri və qədim milli adət-ənənələri də geniş şəkildə təqdim olunur. Hər bir ölkənin nümayəndə heyəti özünəməxsus rəngarəngliyi ilə bu beynəlxalq bayramın ab-havasını daha da zənginləşdirir.
Türk xalqlarının ortaq köklərə sahib olması, onların dillərində, adət-ənənələrində, məişət mədəniyyətində və düşüncə tərzində özünü büruzə verən oxşarlıqlar bu cür beynəlxalq platformalarda daha qabarıq şəkildə üzə çıxır. Qırğız xalqının milli dəyərlərini qorumaq və təbliğ etmək əzmi, nəticə etibarilə, hər bir türk dövlətinin ümumi mədəni xəzinəsinə verilən dəyərli töhfədir.
Dünya Köçəri Oyunları ənənə ilə müasirliyin vəhdətini təşkil edən bir tədbirdir. Sürətlə qloballaşan dünyada milli kimliyin, yerli mədəniyyətlərin və qədim məşğuliyyət növlərinin unudulmaq təhlükəsi ilə üzləşdiyi bir dövrdə belə tədbirlərin keçirilməsi mühüm əhəmiyyət kəsb edir. Köçəri sivilizasiyasının insanlıq tarixinə bəxş etdiyi dəyərlər - təbiətlə harmoniya, azadlıq ruhu, cəsarət, qonaqpərvərlik və birlik hissi bu oyunlar vasitəsilə yeni nəslin yaddaşına əbədi həkk olunur.
Prezident İlham Əliyevin bu tədbirdə iştirakı həm də ümumtürk birliyinə, mədəni həmrəyliyə və ortaq köklərə olan diqqət və ehtiramın bariz təsdiqidir. Qürurverici haldır ki, ölkəmiz hər zaman türk dünyasının inteqrasiyasına, mədəni əlaqələrin dərinləşməsinə xüsusi önəm verir və bu istiqamətdə atılan hər bir addımı dəstəkləyir. Tarixə və milli köklərə hörmət hər bir xalqın gələcəyə inamla baxmasının, öz müstəqilliyini və milli kimliyini əbədi qorumasının yeganə təminatıdır.
Təhminə VERDİYEVA,
"Azərbaycan"
