Son vaxtlar dəniz sahilində salınmış çimərliklər təkcə şəhər sakinlərinin deyil, respublikamızın müxtəlif bölgələrindən gələn insanların da ən çox üz tutduğu istirahət məkanlarındandır. Bir vaxtlar yalnız sənaye şəhəri kimi tanınan Sumqayıt indi abadlaşan bulvarı, yenilənən sahilboyu əraziləri və müasir istirahət imkanları ilə tamam başqa sima qazanıb. Bu dəyişikliklərin ən canlı ünvanlarından biri də məhz yeni açılan çimərliklərdir.
Sahilboyu addımladıqca həyatın müxtəlif rəngləri göz önündə canlanır. Bir tərəfdə dənizə baş vuran uşağın sevinc dolu qışqırıqları eşidilir, digər tərəfdə illərin dostları kölgəlikdə oturub söhbət edirlər. Bir qədər aralıda gənclər voleybol oynayır, yaşlı bir kişi isə sakitcə oturub üfüqə baxır. Hər kəsin məqsədi fərqlidir, amma hamını birləşdirən ortaq məkan Xəzərin sahilidir.
Corat çimərliyinə gələnlərin sayı artmaqdadır. Bu da səbəbsiz deyil. Dövlət Turizm Agentliyi tərəfindən cari ildə Novxanı və Coratda hər birinin ərazisi 3 hektar olmaqla ümumilikdə 12 hektar sahəni əhatə edən 4 ictimai çimərlik yaradılıb. Bu ictimai çimərliklərdə istirahət üçün lazımi şərait yaradılıb.
Əhalinin asudə vaxtının səmərəli təşkili üçün yaradılan bu ictimai çimərliklərdə səliqə-sahmanın, təmizliyin, keyfiyyətli xidmətin davamlı olması daim nəzarətdə saxlanılır. Çünki burada həm dəniz var, həm də bulvar.
Axşama doğru çimərliklərin ən gur vaxtı hesab edilir. FHN-nin xilasediciləri müşahidə məntəqələrində diqqətlə ətrafı izləyir, xidmət personalı sahilin təmizliyinə nəzarət edir. Günəş nə qədər yandırıcı olsa da, dənizdən əsən meh istini bir qədər yumşaldır. Sahildə fəaliyyət göstərən kiçik iaşə məntəqələrində sərin içkilər, dondurma və müxtəlif qəlyanaltılar alan insanların növbəsi uzanır.
Axşamüstü günəş qərbə əyildikcə çimərliklər tamam başqa rəng alır. Səma narıncı, çəhrayı və bənövşəyi çalarlarla bəzənir. Dənizin səthində yaranan işıq zolaqları sanki rəssam fırçasından çıxmış tablo təsiri bağışlayır. İnsanlar tədricən evlərinə qayıtsalar da, sahil boşalmır.
İlhamə MƏMMƏDOVA,
Sumqayıt şəhər sakini
jpg_1788300602.jpg)
