Türkiyə dost ölkələr də daxil olmaqla, bütün dialoq tərəfdaşlarına Cənubi Qafqazdakı proseslərə obyektiv yanaşmanın əhəmiyyətini çatdırır.
AZƏRTAC xəbər verir ki, bu barədə Türkiyə Xarici İşlər Nazirliyinin (XİN) Qafqaz idarəsinin rəhbərinin müavini, səfir Ayşe Üzer dekabrın 10-da Ankaradakı Hacettepe Universitetində Cənubi Qafqazla bağlı müzakirələr çərçivəsində təşkil edilən “Türk dünyası: keçmişdən gələcəyə” panel sessiyasında bildirib.
“Avropa İttifaqı-Ermənistan Tərəfdaşlığı üçün Strateji Gündəlik” adlı sənədə qarşı Azərbaycan Xarici İşlər Nazirliyinin etirazını şərh edən Türkiyə Xarici İşlər Nazirliyinin nümayəndəsi qeyd edib ki, Cənubi Qafqazdakı vəziyyət Ankarada diqqətlə izlənilir.
“Mən Azərbaycan Xarici İşlər Nazirliyinin bəyanatının mətnini diqqətlə tədqiq etdim. Hesab edirəm ki, Cənubi Qafqazdakı vəziyyətin qiymətləndirilməsi tarixi reallıqlar və regionun problemlərinin ilkin səbəbləri ilə ayrılmaz şəkildə bağlıdır, bəzi xarici dairələr isə Cənubi Qafqazdakı prosesləri 2020-ci və ya 2023-cü illərdən hesablayaraq səhv mövqe tuturlar. Bu, Azərbaycan torpaqlarının 30 illik işğalını görməzdən gələn yanlış yanaşmadır”, - deyə səfir vurğulayıb.
Türkiyəli diplomat işğal dövrünün çətinliklərini və Azərbaycanda onilliklər ərzində bir milyondan çox qaçqın və məcburi köçkünün mövcud olduğunu xatırladıb.
“Qərb ölkələri və dialoq apardığımız bütün dövlətlər bunu görməli, ədalətli olmalı və Cənubi Qafqaz ölkələrinə bərabər yanaşmanı qoruyub saxlamalıdırlar. Bölgədəki yaralar hələ də təzədir. Onlar yalnız ədalətli münasibət olduqda sağala bilər. Ankara tərəfdaşlarına yol verilən səhvlər barədə hər dəfə deyir”, - Türkiyə Xarici İşlər Nazirliyinin nümayəndəsi qeyd edib.
