Quba rayonu Uzunmeşə kəndi yaxınlığındakı ərazinin məişət tullantıları ilə çirkləndirilməsi probleminin həlli barədə tədbirin görülməsi ilə bağlı Ekologiya və Təbii Sərvətlər Nazirliyinə ünvanlanmış 2025-ci il 9 sentyabr tarixli müraciətiniz nazirliyin 5 saylı Regional Ekologiya və Təbii Sərvətlər İdarəsinin əməkdaşları tərəfindən yerində araşdırılmışdır.
Araşdırma zamanı Quba rayonu Uzunmeşə kəndi ərazisində Alpan bələdiyyəsinin mülkiyyətində olan yaşıllıq sahəsində bir neçə yerdə bərk məişət tullantılarının qalaqlanması faktı aşkar edilmişdir.
Alpan bələdiyyəsinin araşdırmaya təqdim etdiyi 15.10.2025-ci il tarixli arayışda tullantıların qalaqlandığı ərazinin Alpan bələdiyyəsinin mülkiyyətində olduğu sözügedən əraziyə tullantıların naməlum şəxslər tərəfindən atıldığı, ərazinin nəzarətə götürüldüyü və qısa müddət ərzində həmin ərazinin tullantılardan təmizlənəcəyi bildirilmişdir.
Bələdiyyə sədrinə bələdiyyə ərazisində tullantıların qanunvericiliyin tələblərinə uyğun idarə edilməsinə nəzarətin gücləndirilməsi, vətəndaşlar arasında bu sahədə maarifləndirici tədbirlərin keçirilməsi tövsiyə olunmuş, həmçinin aşkar edilmiş çatışmazlıqların aradan qaldırılması barədə Alpan bələdiyyəsinə 2025-ci ilin 21 oktyabr tarixli "Ekoloji tələb" verilmiş və icrası nəzarətə götürülmüşdür.
Hikmət ƏLİZADƏ,
Dövlət Ekoloji Təhlükəsizlik Xidmətinin rəisi
***
"Azərbaycan" qəzetinin 9 sentyabr 2025-ci il tarixli sayında dərc edilmiş "Meşələrimizi zibil poliqonuna çevirməyək" sərlövhəli məqalədə qaldırılmış problemin həlli barədə rayon icra hakimiyyətinə ünvanlanmış məktuba tərəfimizdən baxılmışdır.
Məlumat üçün bildiririk ki, müraciətlə bağlı müvafiq tədbirlər görülməsi üçün rayon icra hakimiyyəti tərəfindən aidiyyəti üzrə müvafiq qurumlara tapşırıqlar verilmiş, nəticədə tullantılar ərazidən tam şəkildə yığılaraq daşınmış və ərazi əvvəlki təbii vəziyyətinə gətirilmişdir.
Əlavə olaraq bildiririk ki, ərazidə belə halların təkrarlanmaması üçün maarifləndirmə tədbirləri həyata keçirilmiş, ətraf kənd və yaşayış məntəqələrinin sakinlərinə tullantıların təbiətə atılmasının zərərli nəticələri barədə izahat işi aparılmışdır. Hazırda ərazidə mütəmadi nəzarət tədbirləri davam etdirilir.
Tariyel İBRAHİMOV,
Quba Rayon İcra Hakimiyyəti başçısının birinci müavini, başçının səlahiyyətlərini müvəqqəti icra edən
19 (1)jpg_1771885865.jpg)
