Ağdamda 31 Mart - Azərbaycanlıların Soyqırımı Gününə həsr edilmiş anım tədbiri keçirilib. Rayon icra hakimiyyətinin və YAP rayon təşkilatının birgə təşkilatçılığı ilə baş tutan tədbirdə rayon rəhbərliyi, idarə, müəssisə, təşkilatların və ictimaiyyətin nümayəndələri iştirak etmişlər.
Tədbir soyqırımı qurbanlarının, Ulu Öndər Heydər Əliyevin və torpaqlarımızın azadlığı uğrunda şəhid olmuş Vətən övladlarının xatirəsinin birdəqiqəlik sükutla yad edilməsi ilə başlamış, iştirakçıların çıxışları ilə davam etmişdir. Rayon icra hakimiyyətinin başçısı Vaqif Həsənov və digər natiqlər çıxış edərək Birinci Dünya müharibəsinin sonlarına yaxın, 1918-ci ilin mart ayında yaranmış mürəkkəb şəraitdə Azərbaycanın müxtəlif yerlərində erməni-daşnak və bolşevik dəstələrinin birlikdə azərbaycanlı əhalini kütləvi qırğınlara, soyqırımına məruz qoymalarından, Ümummilli Lider Heydər Əliyevin 1998-ci il 26 mart tarixli sərəncamı ilə 31 Mart Azərbaycanlıların Soyqırımı Günü elan edilməsindən, tarixi həqiqətlərin dünya ictimaiyyətinə çatdırılması, Azərbaycan xalqının gələcək nəsillərinin milli yaddaşının qorunması və soyqırımı qurbanlarının xatirəsinin əbədiləşdirilməsi üçün Prezident İlham Əliyevin ardıcıl fəaliyyətindən bəhs etmişlər.
***
31 Mart - Azərbaycanlıların Soyqırımı Gününün 108-ci ildönümü münasibətilə Mingəçevir Şəhidlər xiyabanında anım tədbiri keçirilib.
Şəhər rəhbərliyi, hüquq-mühafizə orqanlarının rəsmiləri, Mingəçevir Bələdiyyəsinin, YAP şəhər təşkilatının, Mingəçevir Dövlət Universitetinin, Tibb və Turizm kolleclərinin rəhbərliyi və təmsilçiləri, idarə və müəssisələrin kollektivləri, ictimaiyyət nümayəndələri, mətbuat işçilərinin iştirak etdikləri tədbirdə 1918-ci ilin 30 mart və 3 aprel aralığında daşnak erməni silahlı dəstələri tərəfindən kütləvi şəkildə vəhşicəsinə qətlə yetirilmiş azərbaycanlıların, soyqırımı qurbanlarının, Azərbaycanın ərazi bütövlüyü uğrunda həlak olan şəhidlərin xatirəsi birdəqiqəlik sükutla yad edilib.
Şəhər icra hakimiyyətinin başçısı İlham İsmayılov məruzə ilə çıxış edərək 108 il öncə Bakıda və Bakı quberniyasının müxtəlif bölgələrində, o cümlədən ayrı-ayrı dövrlərdə, 1988-1994-cü illərdə separatçı ermənilərin xalqımızın başına gətirdiyi müsibətlərdən, törədilən qətliamlardan, işğalçılıq əməllərindən söz açıb. Yaxın tariximizdə baş verən hadisələrdən, minlərlə soydaşımızın doğma yurd yerlərindən didərgin salınmasından bəhs edərək bildirib ki, Ulu Öndər Heydər Əliyevin 1998-ci il mart ayının 26-da imzaladığı sərəncamla 31 mart Azərbaycanlıların Soyqırımı Günü kimi təsis edilib. Qeyd edib ki, Prezident, Ali Baş Komandan İlham Əliyevin siyasi səriştəsi, qətiyyəti, Milli Ordumuzun cəsur əsgər və zabitlərinin, şəhidlərimizin qəhrəmanlığı sayəsində uzun illərdən sonra 2020-ci ildə 44 günlük Vətən müharibəsi zamanı erməni faşistlərinin cavabı qətiyyətlə verilmiş, işğal altında qalan torpaqlarımız azad olunmuşdur: "2023-cü ildə lokal xarakterli antiterror əməliyyatları zamanı Azərbaycanın ərazi bütövlüyü tam təmin olunmuş, suverenliyi bərpa edilmiş, Zəfər tariximiz yazılmışdır. Prezidentin rəhbərliyi və göstərişi ilə bu gün Qarabağda və Şərqi Zəngəzurda başlanan tikinti quruculuq işləri ən yüksək səviyyədə davam edir. Artıq minlərlə soydaşımız doğma yurd yerlərinə qayıdır və həyat öz məcrasına düşür. Burada geniş infrastruktur layihələri həyata keçirilir, iş yerləri yaradılır, təhsil, səhiyyə, mədəniyyət ocaqları fəaliyyətə başlayır".
Tədbirdə Qərbi Azərbaycan İcmasının Mingəçevir şəhəri üzrə nümayəndəsi Mayıl İsmayılov, Kəlbəcər rayonundan olan keçmiş məcburi köçkün Sevil Əlişova, 14 nömrəli tam orta məktəbin direktoru Ceyhun Atayev çıxış edərək Soyqırımı Günü ilə əlaqədar fikirlərini bölüşüblər.
Sonra Soyqırımı Abidə Kompleksinin önünə gül dəstələri düzülüb, faciə qurbanlarının xatirəsinə ehtiram ifadə olunub.
Lazım QULİYEV,
"Azərbaycan"
