Azərbaycanda son illərdə həyata keçirilən məqsədyönlü və uzaqgörən dövlət siyasəti ölkənin hərtərəfli inkişafını təmin etməklə yanaşı, onu regionun ən güclü iqtisadiyyatlarından birinə, qüdrətli hərbi potensiala malik dövlətə və öz daxili imkanları hesabına dayanıqlı inkişafını təmin edən ölkəyə çevirib.
Bu sözləri Milli Məclisin deputatı Aydın Hüseynov AZƏRTAC-a açıqlamasında deyib.
O bildirib ki, Prezident İlham Əliyevin rəhbərliyi ilə həyata keçirilən strateji inkişaf kursu Azərbaycanın müasir dövrün çağırışlarına uyğun şəkildə iqtisadi, sosial, siyasi və hərbi sahələrdə mühüm nailiyyətlər qazanmasına imkan verib: “Müasir dünyada dövlətlərin gücü yalnız təbii sərvətlərlə deyil, iqtisadi dayanıqlığı, maliyyə sabitliyi, güclü sənaye potensialı, müasir infrastrukturu, yüksək texnologiyaları və insan kapitalı ilə müəyyən olunur. Azərbaycan da son illər məhz bu istiqamətlərdə həyata keçirdiyi uğurlu islahatlar nəticəsində inkişaf modelini yeni mərhələyə yüksəldib. Bu gün ölkə iqtisadiyyatı neft gəlirlərindən səmərəli istifadə etməklə yanaşı, qeyri-neft sektorunun sürətli inkişafı hesabına daha dayanıqlı və rəqabətqabiliyyətli xarakter qazanıb. Sənaye parklarının və məhəllələrinin yaradılması, ixracyönümlü istehsal müəssisələrinin fəaliyyətə başlaması, kənd təsərrüfatında müasir texnologiyaların tətbiqi, rəqəmsal iqtisadiyyatın inkişafı və sahibkarlığın dövlət tərəfindən geniş şəkildə dəstəklənməsi iqtisadiyyatın şaxələndirilməsi siyasətinin uğurla həyata keçirildiyini göstərir. Artıq Azərbaycan bir çox məhsulların istehsalını daxili imkanlar hesabına təmin etməklə yanaşı, xarici bazarlarda da rəqabət qabiliyyətini artırır”.
Aydın Hüseynov əlavə edib ki, ölkədə həyata keçirilən iri infrastruktur layihələri iqtisadi inkişafın əsas hərəkətverici qüvvələrindən biridir. Müasir avtomobil yollarının, dəmir yollarının, beynəlxalq hava limanlarının, dəniz limanlarının, enerji və kommunikasiya infrastrukturunun yaradılması Azərbaycanın həm daxili iqtisadi potensialını artırır, həm də onu Avropa ilə Asiyanı birləşdirən mühüm nəqliyyat və logistika mərkəzinə çevirir. Bu layihələr ölkənin tranzit imkanlarını genişləndirərək dövlət büdcəsinə əlavə gəlirlərin formalaşmasına da mühüm töhfə verir.
Deputat vurğulayıb ki, güclü iqtisadiyyat dövlətin sosial siyasətinin uğurla həyata keçirilməsi üçün əsas maliyyə bazasını formalaşdırır. Son illərdə əməkhaqları, pensiyalar, sosial müavinətlər və digər sosial ödənişlər dəfələrlə artırılıb, şəhid ailələrinin, qazilərin, müharibə iştirakçılarının və aztəminatlı ailələrin sosial müdafiəsi istiqamətində genişmiqyaslı proqramlar həyata keçirilib. İnsan amilinin dövlət siyasətinin mərkəzində dayanması ölkədə sosial rifahın yüksəldilməsini təmin edən əsas amillərdəndir.
O qeyd edib ki, Azərbaycanın əldə etdiyi iqtisadi nailiyyətlər müdafiə sahəsində də mühüm üstünlüklər qazandırıb. Müasir silah və hərbi texnika ilə təchiz edilmiş Azərbaycan Ordusu yüksək peşəkarlığı, döyüş hazırlığı və texnoloji imkanları ilə regionun ən güclü silahlı qüvvələrindən biri kimi qəbul olunur. Müdafiə sənayesinin inkişaf etdirilməsi, yerli hərbi məhsulların istehsalının genişləndirilməsi və Silahlı Qüvvələrin maddi-texniki təminatının davamlı olaraq gücləndirilməsi ölkənin milli təhlükəsizlik sistemini daha da möhkəmləndirib.
“Azərbaycanın özünü təmin edən dövlət modelinin formalaşdırılması dövlət siyasətinin mühüm istiqamətlərindən biridir. Ərzaq təhlükəsizliyinin təmin olunması, aqrar sahənin inkişafı, müasir suvarma sistemlərinin qurulması, yeni əkin sahələrinin istifadəyə verilməsi və yerli istehsalın stimullaşdırılması nəticəsində ölkənin ərzaq təminatı əhəmiyyətli dərəcədə güclənib. Bununla yanaşı, enerji təhlükəsizliyi sahəsində əldə olunan uğurlar Azərbaycanın təkcə öz daxili tələbatını tam ödəməsinə deyil, həm də beynəlxalq enerji bazarında etibarlı tərəfdaş kimi mövqeyini daha da möhkəmləndirməsinə şərait yaradıb. Alternativ və bərpaolunan enerji mənbələrinin inkişafı da Azərbaycanın uzunmüddətli inkişaf strategiyasının əsas istiqamətlərindəndir. Günəş və külək enerjisi layihələrinin həyata keçirilməsi, yaşıl enerji zonalarının yaradılması və enerji səmərəliliyinin artırılması gələcək nəsillər üçün dayanıqlı iqtisadi model formalaşdırır”, - deyə Aydın Hüseynov bildirib.
Deputat vurğulayıb ki, işğaldan azad edilmiş ərazilərdə həyata keçirilən bərpa və yenidənqurma işləri Azərbaycanın iqtisadi gücünün və maliyyə imkanlarının real göstəricisidir. Qısa müddət ərzində müasir avtomobil yollarının, tunellərin, körpülərin, elektrik yarımstansiyalarının, su anbarlarının, yaşayış məntəqələrinin, məktəblərin, xəstəxanaların və digər sosial infrastruktur obyektlərinin tikilməsi dövlətin güclü iqtisadi potensialından xəbər verir. Həmin ərazilərdə yaradılan sənaye müəssisələri, kənd təsərrüfatı layihələri və "ağıllı şəhər", "ağıllı kənd" konsepsiyaları gələcəkdə ölkənin ümumi iqtisadi inkişafına mühüm töhfə verəcək.
O əlavə edib ki, rəqəmsallaşma, innovasiya və süni intellekt texnologiyalarının tətbiqi istiqamətində həyata keçirilən layihələr də Azərbaycanın rəqabət qabiliyyətinin artırılmasına xidmət edir. Elektron dövlət xidmətlərinin genişləndirilməsi, biznes mühitinin rəqəmsallaşdırılması və innovativ sahibkarlığın təşviqi ölkədə müasir iqtisadiyyatın formalaşmasına mühüm dəstək verir.
“Azərbaycanın əldə etdiyi uğurların əsasında milli maraqlara söykənən müstəqil dövlət siyasəti dayanır. Məhz bu siyasət nəticəsində ölkəmiz beynəlxalq aləmdə etibarlı tərəfdaş kimi tanınır, regional və qlobal layihələrin təşəbbüskarı və fəal iştirakçısı kimi çıxış edir. Azərbaycanın iqtisadi qüdrəti, siyasi sabitliyi, güclü ordusu və milli həmrəyliyi ölkənin uzunmüddətli inkişafını təmin edən əsas amillərdir. Prezident İlham Əliyevin rəhbərliyi ilə həyata keçirilən inkişaf strategiyası Azərbaycanın qarşıdakı illərdə də regionun lider dövləti kimi mövqeyini daha da gücləndirəcək. Güclü iqtisadiyyat, qüdrətli ordu, yüksək sosial rifah, innovativ inkişaf modeli və özünü tam təmin edən milli iqtisadiyyat Azərbaycanın gələcək uğurlarının əsas təminatıdır. Bu strateji kurs ölkənin milli maraqlarını etibarlı şəkildə qorumaqla yanaşı, vətəndaşların rifahının davamlı yüksəlməsinə, dövlət müstəqilliyinin daha da möhkəmlənməsinə və Azərbaycanın beynəlxalq nüfuzunun yeni zirvələrə yüksəlməsinə xidmət edir”, - deyə Aydın Hüseynov vurğulayıb.
