Alternative content

AZƏRBAYCAN RESPUBLİKASI MİLLİ MƏCLİSİNİN ORQANI

Davamlı tərəqqi sənayenin inkişafından asılıdır

02 Mart 2018
 

Yeni iqtisadi strategiya Azərbaycanda qeyri-neft sənayesinin yüksəlişi üçün əlverişli zəmin yaradır

 

Tarixinin ən qüdrətli dövrünü yaşayan Azərbaycan davamlı iqtisadi inkişafı ilə bir çox ölkələr üçün nümunəyə çevrilib. Bu gün iqtisadi cəhətdən özünü təmin edən, hər hansı xarici yardıma ehtiyac duymayan ölkəmizin yeni-yeni uğurları, əlbəttə ki, düzgün iqtisadi strategiya, məqsədyönlü dövlət siyasəti sayəsində əldə edilib.

 

Yeni inkişaf konsepsiyasının prioriteti

 

Dövlətin yeni inkişaf strategiyasının prioritetlərindən biri də qeyri-neft sənayesinin inkişafıdır. Son illər ölkəmizdə həyata keçirilən kompleks islahatlar, bu sahəyə artırılan dövlət qayğısı, sahibkarlara və xarici investorlara yaradılan əlverişli şərait qeyri-neft sənayesinin davamlı inkişafına səbəb olub.

Modern sənayeləşmə siyasətinə uyğun olaraq həyata keçirilən layihələrin reallaşması nəticəsində Azərbaycan regionun sənaye mərkəzinə çevrilməkdədir. Ümumiyyətlə, ölkədə son illər sənaye parkları və sənaye məhəllələrinin yaradılması iqtisadiyyatın tarazlı inkişafının təmin edilməsini nəzərdə tutan siyasətin mühüm hissəsidir. Müasir istehsal infrastrukturuna malik sənaye parkı və sənaye məhəllələrinin fəaliyyəti ölkədə sənaye sahələrinin tərəqqisinin, iqtisadiyyatın tarazlı yüksəlişinin təmin edilməsini, habelə istehsal sahələrinin və onun innovasiya istiqamətinin inkişafını nəzərdə tutan dövlət siyasətinin reallaşdırılmasına yönəldilib. Bu cür sənaye komplekslərinin yaradılması ölkənin qeyri-neft sektorunun davamlı inkişafı, iqtisadiyyatın ixrac qabiliyyətinin, idxalı əvəz edən məhsulların istehsalının artırılması, bölgələrdə məşğulluğun təmini, investisiyaların və müasir texnologiyaların cəlb edilməsi kimi öncül vəzifələrin yerinə yetirilməsi baxımından xüsusilə əhəmiyyətlidir.

 

Yerli ehtiyatlardan istifadə etməklə sənaye sahələrinin yaradılması

 

Qeyri-neft sənayesinin davamlı inkişafında, yerli ehtiyatlardan istifadə etməklə sənaye sahələrinin yaradılması, istehsal prosesinin təşkilində infrastruktur xərclərinin azaldılması, sahibkarlar arasında kooperasiya əlaqələrinin gücləndirilməsi, məşğulluqda sənayenin xüsusi çəkisinin artırılmasında sənaye parkları və sənaye məhəllələri mühüm əhəmiyyət kəsb edir.

Hazırda ölkədə Sumqayıt Kimya Sənaye Parkı, Balaxanı Sənaye Parkı, Neftçala Sənaye Məhəlləsi fəaliyyət göstərir. Pirallahı, Qaradağ, Mingəçevir sənaye parklarında tamamlama işləri görülür. Masallı, Hacıqabul və Sabirabadda yeni sənaye məhəllələri tikilir. Bu il bir neçə sənaye kompleksinin açılışı gözlənilir.

Ümumiyyətlə, son illər ölkəmizdə regionların sosial-iqtisadi inkişafına dair dövlət proqramları çərçivəsində müxtəlif təyinatlı yüzlərlə sənaye müəssisəsi tikilib, minlərlə yeni iş yeri açılıb. Fevralın 27-də Mingəçevir Sənaye Parkında “Mingəçevir Tekstil” MMC-nin iplik istehsalı üzrə iki müəssisəsinin açılışı da bunu bir daha təsdiq edir.

 

İldə 20 min ton müxtəlif cür iplik istehsalı

 

2016-cı il sentyabrın 21-də təməli qoyulmuş Mingəçevir Sənaye Parkında yüngül sənaye məhsulları, o cümlədən iplik, boyama, toxuma, tikiş, corab, ayaqqabı və tibbi kosmetika istehsalı üzrə 9 fabrikin yaradılması qərara alınıb.

Sənaye parkında fəaliyyət göstərəcək müəssisələrin xammal təchizatının davamlılığını və etibarlılığını təmin etmək üçün ardıcıl tədbirlər görülür.

Ümumi dəyəri 144 milyon manat olan “Mingəçevir Tekstil” MMC-nin iplik istehsalı üzrə iki müəssisənin yaradılmasına İqtisadiyyat Nazirliyinin Sahibkarlığa Kömək Milli Fondu tərəfindən 10 milyon manat güzəştli kredit verilib. Bu da onu göstərir ki, Azərbaycan sərmayə qoyuluşu üçün çox əlverişli məkandır. Son 15 il ərzində ölkə iqtisadiyyatına 230 milyard dollardan çox, ötən il isə 15 milyard dollara yaxın sərmayə qoyulub.

Müasir texnologiyalar əsasında yaradılmış fabriklər Almaniya, İsveçrə, İspaniya və Yaponiyanın aparıcı şirkətlərinin avadanlığı ilə təchiz edilib. Fabriklərdə pambıq mahlıcından ildə 10 min tonu “Ring”, 10 min tonu isə “Open End” üsulu ilə olmaqla, ümumilikdə 20 min ton müxtəlif cür iplik istehsalı nəzərdə tutulur. “Ring” üsulu ilə istehsal edilən pambıq-poliester iplik daha zərif və yumşaq olduğu üçün uzun lifli pambıqdan alınır və daha bahalıdır. Bu məhsuldan əsasən köynək istehsal olunacaq. “Open End” üsulu ilə alınan iplik daha sərt olduğundan əsasən cins və digər geyimlərin istehsalında istifadə ediləcək.

 

Toxuculuq sənayesinin inkişafı

 

Bu fabriklərdə 700-750 insan işlə təmin edilib və çalışanların böyük əksəriyyəti qadınlardır. Bu cür müəssisələrin istifadəyə verilməsi ölkədə toxuculuq sənayesinin inkişafına, yerli istehsal müəssisələrinin davamlı, keyfiyyətli və ucuz xammal ilə təmin olunmasına, eləcə də istehsal edilən pambığın hazır məhsul kimi ixracına imkan verəcək. Bunun da nəticəsində ölkəmizə əlavə valyuta daxil olacaq. Bu, həmçinin sənaye sahəsində idxaldan asılılığın azaldılması, ixrac potensialının artırılması, milli tekstil brendlərin yaradılması, ixtisaslı kadrların hazırlanması və yeni iş yerlərinin açılması baxımından xüsusi əhəmiyyət kəsb edir.

 

Azərbaycanda fəaliyyət göstərən iplik fabriklərinin sayı 8 oldu

 

Mingəçevir Sənaye Parkının ilk iki fabrikinin açılması dövlət-özəl sektor tərəfdaşlığının parlaq təzahürüdür. Çünki dövlət özəl sektorun inkişafı üçün əlindən gələni əsirgəmir, sahibkarlara güzəştli şərtlərlə kreditlər, metodik tövsiyələr verilir, iş yerlərinin yaradılması istiqamətində böyük işlər aparılır. Eyni zamanda, dövlət sənaye parklarının yaradılması ilə özəl sektorun inkişafına şərait yaradır.

Onu da vurğulayaq ki, Azərbaycanda hazırda altı iplik fabriki fəaliyyət göstərir. Bu iki fabrikin istifadəyə verilməsi ilə onların sayı səkkizə qalxır və altı fabrikin istehsal gücü 24 min ton iplikdir. Bu iki fabrikdə isə 20 min ton iplik istehsal olunacaq. Yəni müasir fabriklərdə əvvəlki dövrlərdə istifadəyə verilmiş fabriklərlə, demək olar ki, eyni səviyyədə iplik istehsal olunacaq, həm daxili tələbatı təmin edəcək, həm də ixrac olunacaq.

Əlbəttə ki, bu hələ başlanğıcdır. İki yeni fabrikin işə düşməsi daha yeni müəssisələrin yaradılmasına təkan verəcək. Bu isə o deməkdir ki, yaxın gələcəkdə Mingəçevirdə minlərlə yeni iş yeri açılacaq.

Əminliklə söyləmək olar ki, sənaye parklarının, məhəllələrinin yaradılması ölkə iqtisadiyyatının modernləşməsinə, həmçinin innovativ və elmtutumlu iqtisadiyyatın formalaşmasına, investisiya mühitinin cəlbediciliyinin artmasına, sahibkarlığın dəstəklənməsinə, ölkənin ixrac qabiliyyətinin genişlənməsinə töhfə verəcək. Çünki zamanın tələblərinə uyğun olaraq aparılan islahatlar, uğurla həyata keçirilən dövlət proqramları, genişmiqyaslı infrastruktur layihələri, biznes və investisiya mühitinin davamlı surətdə yaxşılaşdırılması, özəl sektora dövlət dəstəyi və siyasi, makroiqtisadi sabitlik ölkədə güclü sənayenin formalaşdırılması üçün əlverişli şərait yaradır.

 

Rəşad BAXŞƏLİYEV,

“Azərbaycan”