Ulu Öndərin yolu ilə gedirik

Çoxəsrlik dövlətçilik ənənələrinə malik Azərbaycan xalqının tarixində Ümummilli Lider Heydər Əliyev şəxsiyyəti, onun zəngin siyasi fəaliyyəti və misilsiz idarəçilik təcrübəsi müstəsna yer tutur. Tarix dəfələrlə sübut edib ki, xalqı üçün yaşayan, millətinin gələcəyi naminə çalışan, ömrünü Vətəninə və dövlətinə həsr edən böyük şəxsiyyətlər yaddaşlarda əbədi yaşayırlar. Ulu Öndər Heydər Əliyevin həyatı da məhz belə mənalı, xalqına xidmət nümunəsi olan bir ömür yolu idi.

Ulu Öndər daim vurğulayırdı ki, milli ruhun, milli kimliyin və milli maraqların qorunmasının ən etibarlı yolu müstəqil dövlətin mövcudluğundan keçir. Məhz buna görə də dahi şəxsiyyət milli-mənəvi dəyərlərin qorunmasını, dövlətçilik ənənələrinin möhkəmləndirilməsini, Azərbaycanın beynəlxalq aləmdə layiqli yer tutmasını həyatının və siyasi fəaliyyətinin başlıca məqsədinə çevirmişdi.

Azərbaycançılıq məfkurəsinin müəllifi olan Ümummilli Lider Heydər Əliyev müdrik siyasəti, uzaqgörənliyi və qətiyyətli siyasi iradəsi sayəsində müasir Azərbaycan dövlətinin əsasını qoymuş, müstəqillik arzularının reallığa çevrilməsinə nail olmuşdur. Müstəqilliyimizin ilk illərində ölkədə hökm sürən xaos, Ermənistanın Azərbaycana qarşı hərbi təcavüzü, Ermənistan-Azərbaycan, Qarabağ münaqişəsinin ağır nəticələri, separatçılıq meyilləri və vətəndaş qarşıdurması təhlükəsi fonunda xalqın yeganə ümid yeri məhz Heydər Əliyev olmuşdur.

Xalqın təkidli tələbi ilə hakimiyyətə qayıdan Ulu Öndər qısa müddət ərzində ölkədə siyasi sabitliyi təmin etmiş, dövlət institutlarını möhkəmləndirmiş, milli birliyi bərpa etmiş və ölkəmizin gələcək inkişaf strategiyasını müəyyənləşdirmişdir. Azərbaycanda demokratik, hüquqi və dünyəvi dövlət quruculuğu, vətəndaş cəmiyyətinin formalaşdırılması, insan hüquq və azadlıqlarının qorunması, milli-mənəvi dəyərlərə dönüş, elm, təhsil və mədəniyyətin inkişafı birbaşa Ümummillil Lider Heydər Əliyevin adı ilə bağlıdır. Ölkəmizin Əsas Qanunu olan Konstitusiyanın qəbul edilməsi, hakimiyyət bölgüsü prinsipinin təsbit olunması, qanunvericilik bazasının beynəlxalq standartlara uyğunlaşdırılması və müasir dövlət idarəçiliyi sisteminin formalaşdırılması onun rəhbərliyi altında həyata keçirilmişdir.

Qeyri-neft sektorunun inkişafı, sahibkarlığın təşviqi, kənd təsərrüfatında islahatların aparılması Heydər Əliyevin iqtisadi strategiyasının mühüm istiqamətlərindən biri idi. Postsovet məkanında analoqu olmayan torpaq islahatı nəticəsində torpağın xüsusi mülkiyyətə verilməsi ölkəmizin ərzaq təhlükəsizliyinin təmin edilməsinə, kənd təsərrüfatının inkişafına və regionların iqtisadi potensialının güclənməsinə təkan vermişdir.

Bütün bunlarla yanaşı, Ulu Öndərin gənclər siyasəti Azərbaycanın böyüməkdə olan nəslinin formalaşmasında xüsusi əhəmiyyət daşıyır. Ümummilli Lider gənclərin dövlət quruculuğunda aparıcı qüvvə olduğunu hər zaman vurğulayırdı. Məhz Ulu Öndərin təşəbbüsü ilə 1994-cü ildə Azərbaycan Respublikasının Gənclər və İdman Nazirliyi yaradılmış və dövlət gənclər siyasətinin institusional əsasları formalaşmışdır. 1996-cı il fevralın 2-də Azərbaycan gənclərinin ilk forumunun keçirilməsi və bu günün Azərbaycan Gəncləri Günü kimi təsis olunması gənclərə göstərilən yüksək dövlət qayğısının təzahürü idi.

Mən  müstəqil Azərbaycanın bir gənci kimi özümü xoşbəxt hesab edirəm ki, Ulu Öndərin bizlərə miras qoyduğu bu dövlət siyasətinin nəticəsində 2025-ci il üzrə "İlin Gənci" mükafatına layiq görülmüşəm. Eyni zamanda "Heydər Əliyev siyasi məktəbini öyrənirik" Gənc Liderlər Proqramının iştirakçısı və Heydər Əliyev Fondu tərəfindən həyata keçirilən IX "Muğam" Televiziya Müsabiqəsinin finalçısı olmaq həyatımın ən qürurverici məqamlarından biridir.

Bu gün Ulu Öndər Heydər Əliyev tərəfindən əsası qoyulmuş siyasi kurs Prezident İlham Əliyev tərəfindən uğurla davam etdirilir. İkinci Qarabağ müharibəsi Azərbaycan xalqının qəhrəmanlıq salnaməsidir. Cəmi 44 gün davam edən Vətən müharibəsi nəticəsində torpaqlarımız işğaldan azad edilmiş, ölkəmizin ərazi bütövlüyü təmin olunmuş və Ermənistan ordusunun "məğlubedilməzlik" mifinə son qoyulmuşdur. Bu tarixi Zəfər yalnız hərbi uğur deyil, həm də Ulu Öndərin müəyyən etdiyi milli dövlətçilik strategiyasının, siyasi iradəsinin və azərbaycançılıq ideologiyasının parlaq təntənəsidir.

Yusif CƏFƏRBƏYLİ,

IX "Muğam" Televiziya Müsabiqəsinin finalçısı