Dağ vüqarlı, qartal baxışlı 

Birinci Qarabağ müharibəsində ölkəmizin ərazi bütövlüyü uğrunda gedən döyüşlərdə qəhrəmanlıq göstərmiş oğullarımızdan biri də Valeh Əlizaid oğlu Müslümovdur. Valeh bir ildən çox erməni işğlaçılarına qarşı cəsarətlə vuruşub. Bu müddət ərzində neçə-neçə qanlı əməliyyatların iştirakçısı olub. Torpaqlarımızın müdafiəsi və azadlığı naminə bütün çətinlikləri dəf edib. İlıq bir yaz günündə isə şəhid olub. 

Valeh Müslümov 1968-ci ilin sentyabrında Lerikdə doğulub. 1983-cü ildə səkkizinci sinfi bitirdikdən sonra Sumqayıt şəhərindəki 17 saylı şəhər texniki-peşə məktəbində dülgər ixtisasına yiyələnib, 2 saylı Sumqayıt Tikinti Trestinin Səyyar Mexanikləşdirilmiş dəstəsində işə düzəlib. Qısa müddət ərzində peşəkarlığı ilə seçilib. 

Valeh Müslümov 1986-cı ildə hərbi xidmətə çağırılıb. 1988-ci ildə hərbi xidmətini başa vurduqdan sonra Sumqayıta qayıdıb. Yenə də dülgər peşəsində çalışıb. Həmin illər millətlər arasında münaqişlər qızışmağa başlamışdı. Ermənilər Sumqayıt hadisələrini törətmişdilər. 

Qarabağda şəhər və kəndlərimizin erməni quldurları tərəfindən işğal edilməsinə dözə bilməyən Valeh Müslümov cəbhəyə getmək qərarına gəlib. 1991-ci ilin avqust ayından DİN-in Xüsusi Təyinatlı Milis Dəstəsində xidmətə başlayıb. Elə həmin ildən də gərgin döyüşlər gedən bölgələrə göndərilərək əməliyyatlarda iştirak edib. Şuşa, Tovuz, Qubadlı, Füzuli, Goranboy və başqa döyüş əməliyyatlarında igidlik göstərib. Çox çəkmir ki, hərbi texnikanın və silahların sirlərinə yaxından bələd olan Valehin qəhrəmanlığı erməni quldurlarını narahat etməyə başlayıb. Separatçılar onu zərərsizləşdirmək üçün külli miqdarda pul vəd ediblər. Amma bu, Valehi narahat etmir, o, yenə də torpaqlarımızın azadlığı uğrunda döyüşməyə davam edir. 

Füzulinin Hoğa kəndi uğrunda gedən döyüşlərdə erməni işğalçıları əməliyyat zamanı yaralanmış əsgərləri çıxarmağa imkan vermirdilər. Düşmənin güclü müqavimətinə baxmayaraq, Valeh atəş altında döyüş meydanında qalmış yaralıları çıxarmağı bacarır. Bu, cəsur əsgərin döyüşlər zamanı göstərdiyi igidliklərdən yalnız bir faktdır. 

Erməni işğalçıları 1992-ci il aprelin 10-da xeyli sayda texnika və canlı qüvvə ilə Tərtərin indiki Şəhriyar kəndinə hücuma keçdilər. Strateji nöqtədə yerləşən bu yaşayış məntəqəsini qorumaq üçün Valehgil vaxt itirmədən döyüşə atıldılar. Valeh həm  vuruşur, həm də yaralanmış əsgər yoldaşlarını təhlükəsiz yerə çıxarırdı. Böyük qüvvə ilə döyüşən erməni işğalçılarının hücumları isə dayanmaq bilmirdi. Xeyli müddət davam edən bu qeyri-bərabər döyüşdə Valeh yaralanır. Buna baxmayaraq, döyüşdən çıxmır, 11 nəfər yaralı əsgərin həyatını xilas edir. Amma çoxlu qan itirdiyindən həlak olur. 

Vətənin dağ vüqarlı, qartal baxışlı qəhrəman oğlu 23 yaşında şəhidlik zirvəsinə ucalır. Onu Lerikdə ehtiramla dəfn edirlər. 

Ərazi bütövlüyümüz uğrunda gedən döyüşlər zamanı göstərdiyi şücaətə və rəşadətə görə Valeh Əlizaid oğlu Müslümov Prezidentin 6 iyun 1992-ci il tarixli sərəncamı ilə "Azərbaycanın Milli Qəhrəmanı" fəxri adına layiq görülüb. 

Yurdumuzun azadlığı uğrunda gedən döyüşlərdə böyük qəhrəmanlıq və hünər göstərmiş Valeh Müslümovun adı bu gün oxuduğu Lerik şəhər 2 saylı orta məktəbdə yaşayır. 

V.MƏMMƏDQULUOĞLU,

"Azərbaycan"