Şəhidlik zirvəsi qəhrəmanlığın ən uca məqamı, Vətən sevgisinin ən müqəddəs ifadəsidir. Bu zirvəyə torpağını canından əziz bilən, ölkəsinin ərazi bütövlüyünü, suverenliyini, xalqının gələcəyini həyatından üstün tutan igidlər yüksəlirlər.
2020-ci ildə baş verən 44 günlük Vətən müharibəsində Azərbaycanın ərazi bütövlüyü uğrunda canından keçən qəhrəmanlarımız da bu ucalığa çataraq adlarını tarixə yazdılar. Şəhid Rafiq Rahim oğlu Heydərov da həmin ölməz qəhrəmanlarımızdan biridir.
1995-ci il iyulun 1-də Bakıda dünyaya göz açan Rafiq Heydərov ailənin tək oğlu idi. Valideynləri onu vətənə sevgi ruhunda böyütmüşdülər. Rafiq böyüklərə hörmətlə yanaşmağı, kiçiklərə qayğı göstərməyi, zəhmətə bağlılığı da ata-anasından öyrənmişdi. O, uşaqlıq illərindən öz sadəliyi, səmimiyyəti, mehribanlığı və məsuliyyətli davranışı ilə seçilirdi. 2001-ci ildə Binəqədi rayonundakı 157 nömrəli tam orta məktəbdə təhsil almağa başlayan Rafiq burada da özünü çalışqan və nümunəvi şagird kimi göstərmişdi, müəllimlərinin və sinif yoldaşlarının hörmətini qazanmışdı.
Rafiq Heydərov orta məktəbdə yalnız dərslərini yaxşı oxuması ilə deyil, həm də idmana olan marağı ilə seçilib. O, futbol, basketbol, üzgüçülük və cüdo ilə məşğul olub. İdman onun xarakterindəki iradəni, mübarizə əzmini və qələbəyə inamı daha da möhkəmləndirib. 2012-ci ildə cüdo üzrə beynəlxalq turnirdə uğurla çıxış edən Rafiq final mərhələsinə qədər yüksəlib və erməni rəqibi üzərində qələbə qazanaraq qızıl medal əldə edib. Bu qələbə onun güclü iradəsinin və qətiyyətinin göstəricisi idi.
Orta məktəbi bitirdikdən sonra Rafiq təhsilini Azərbaycan Memarlıq və İnşaat Universitetində davam etdirib. 2016-cı ildə ali təhsilini uğurla başa vurub, həmin il magistratura pilləsinə qəbul olub. Amma Vətən qarşısındakı borcunu hər şeydən üstün tutaraq hərbi xidmətə yollanıb.
Rafiq 2016-2017-ci illərdə Qusar rayonunda yerləşən "N" saylı hərbi hissədə xidmət edib, nümunəvi əsgər kimi fərqlənib. Hərbi xidmətdən sonra təhsilini davam etdirib. Sonra əmək fəaliyyətinə başlayıb. Savadı, məsuliyyəti, işinə olan sevgisi çalışdığı kollektivdə ona hörmət qazandırıb.
Gənc idi. Qarşıda onu böyük işlər gözləyirdi. O, gələcəyə inamla addımlayır, yorulmadan çalışırdı. Amma Vətənin dar günlərində bütün arzuları, məqsədi yalnız bir amala çevrildi. Rafiq Heydərov da hər bir qəhrəman Azərbaycan övladı kimi Vətənin harayına hay verdi.
2020-ci il sentyabrın 27-də İkinci Qarabağ müharibəsi başlayanda Vətən sevgisi ilə böyüyən hər bir azərbaycanlı gənc kimi, Rafiq Heydərov da könüllü olaraq cəbhəyə yollandı. Ailənin tək oğlu olması belə, onu bu müqəddəs yoldan çəkindirə bilmədi.
Döyüş yoldaşlarının xatirələrində Rafiq Heydərov cəsarətli, qorxmaz və daim ön sırada olan bir döyüşçü kimi qalıb. O, Füzuli-Cəbrayıl istiqamətində gedən ağır döyüşlərdə böyük şücaət göstərib, düşmən mövqelərinin darmadağın edilməsində fəal iştirak edib. Cəbrayılın Daşkəsən kəndi uğrunda gedən döyüşlərdə də Rafiq və silahdaşları fərqləniblər. Azad edilən mövqedə Azərbaycan bayrağının dalğalanması həmin anı tarixi bir qələbə rəmzinə çevirdi. Bu bayraq altında 30 illik həsrətə son qoyuldu, milli qürur və Vətən sevgisi birləşdi.
2020-ci il oktyabrın 14-də Füzuli-Cəbrayıl istiqamətində gedən şiddətli döyüşlər zamanı Rafiq Heydərov qəhrəmancasına şəhid oldu. Oktyabrın 18-də II Fəxri xiyabanda son mənzilə yola salındı.
Rafiq çox gənc yaşında dünya ilə vidalaşıb. O, cəmi 25 il yaşayıb. Amma bu qısa ömür ilə bir insanın Vətəni yolunda necə şücaət göstərə, qəhrəmanlıq tarixində iz qoya biləcəyini nümayiş etdirib.
Azərbaycanın ərazi bütövlüyünün bərpası uğrunda döyüşlərdə göstərdiyi qəhrəmanlığa görə şəhid Rafiq Heydərov ölümündən sonra "Vətən uğrunda", "Füzulinin azad olunmasına görə" və "Xocavəndin azad olunmasına görə" medalları ilə təltif olunub.
İnsanın cismani yoxluğundan sonra onu var edən, xatirələrdə yaşadaraq unudulmağa qoymayan əməlləridir. Buna görə də şəhidlər ölmürlər. Onlar xalqın yaddaşında, Vətənin azad səmasında yaşayırlar. Rafiq Heydərov da bu gün azad Qarabağın hər qarışında, doğma torpaqlarımızın nəfəsində, gənc nəslin qəlbində yaşayan qəhrəmanlarımızdandır. Belə oğullar Vətən torpağını müqəddəs, xalqımızı isə qürurlu edirlər.
Rafiq Heydərovun adı artıq yalnız bir ailənin deyil, bütöv xalqın yaddaşında yaşayır. Çünki qəhrəmanlar zamanın deyil, tarixin övladlarıdır. Onların adı Azərbaycan var olduqca, bu torpaqda bayrağımız dalğalandıqca yaşayacaq.
Zöhrə FƏRƏCOVA,
"Azərbaycan"
