"Azərbaycan milli-mənəvi dəyərlərin qorunması, qədim türk mədəniyyətinin yaşadılması və gələcək nəsillərə ötürülməsi istiqamətində mühüm işlər həyata keçirir. Ölkənin bu sahədəki siyasəti təkcə milli kimliyin mühafizəsi baxımından deyil, bütövlükdə türk dünyasının ortaq tarixi və mədəni irsinin qorunması baxımından da böyük əhəmiyyət daşıyır".
Bu fikirləri AZƏRTAC-a açıqlamasında türkiyəli iqtisadçı və turizm eksperti Soner KILIÇ bildirib.
O qeyd edib ki, Azərbaycan zəngin tarixi, mədəni irsi, adət-ənənələri və milli-mənəvi dəyərləri ilə türk dünyasının seçilən ölkələrindən biridir. Əsrlər boyu formalaşmış bu irs xalqın milli kimliyinin əsasını təşkil etməklə yanaşı, onun gələcək inkişaf istiqamətlərinə də təsir göstərir.
Ekspertin sözlərinə görə, qloballaşmanın sürətləndiyi müasir dövrdə milli dəyərlərin qorunması xüsusi aktuallıq kəsb edir. Çünki xalqların öz mədəniyyətinə, tarixinə və ənənələrinə bağlılığı onların milli kimliyinin möhkəmlənməsində mühüm rol oynayır. Azərbaycan bu istiqamətdə həyata keçirdiyi tədbirlərlə milli irsin qorunmasının və müasir inkişafla uzlaşdırılmasının mümkün olduğunu nümayiş etdirir.
Soner Kılıç vurğulayıb ki, Azərbaycan və Türkiyə arasında ortaq dil, tarix, mədəniyyət və mənəvi dəyərlərə əsaslanan qardaşlıq münasibətləri qədim türk irsinin yaşadılması üçün geniş imkanlar yaradır. İki ölkənin mədəniyyət, təhsil, turizm və humanitar sahələrdə əməkdaşlığı ortaq dəyərlərin daha geniş coğrafiyada tanıdılmasına xidmət edir. Onun fikrincə, qədim türk mədəniyyətinin qorunması yalnız tarixi abidələrin və maddi irs nümunələrinin mühafizəsi ilə məhdudlaşmamalıdır. Xalq yaradıcılığı, folklor, milli musiqi, sənətkarlıq, adət-ənənələr və ailə dəyərləri də bu zəngin irsin ayrılmaz hissəsidir. Bu dəyərlərin gənc nəsillərə aşılanması milli-mədəni varisliyin davamlılığını təmin edən əsas amillərdəndir.
Türkiyəli ekspert turizmin də milli irsin beynəlxalq səviyyədə tanıdılmasında mühüm vasitə olduğunu bildirib. Onun sözlərinə görə, Azərbaycanın tarixi şəhərləri, memarlıq nümunələri, milli mətbəxi, sənətkarlıq ənənələri və zəngin folkloru ölkənin turizm potensialını artırmaqla yanaşı, qədim türk mədəniyyətinin dünya ictimaiyyətinə təqdim edilməsinə də imkan yaradır.
Ekspert hesab edir ki, mədəni irsə əsaslanan turizmin inkişafı həm iqtisadi, həm də sosial baxımdan əhəmiyyətlidir.
"Bu sahədə görülən işlər yerli icmaların iqtisadi fəallığını artırır, ənənəvi sənət sahələrinin yaşamasına dəstək verir və mədəni irsin qorunmasına əlavə imkanlar yaradır. Azərbaycan və Türkiyənin ortaq mədəni irsin təbliği istiqamətində əməkdaşlığının genişləndirilməsi türk dünyası ölkələri arasında əlaqələrin daha da möhkəmlənməsinə töhfə verə bilər. Ortaq tarix və mədəniyyət əsasında qurulan bu əməkdaşlıq gələcək nəsillərin öz köklərini daha dərindən tanımasına və milli-mənəvi dəyərlərə bağlılığının güclənməsinə xidmət edir. Milli dəyərlərin qorunması keçmişə bağlılıqla yanaşı, gələcəyə yönəlmiş strateji yanaşmadır. Azərbaycan öz zəngin mədəni irsini yaşatmaqla həm milli kimliyini möhkəmləndirir, həm də qədim türk mədəniyyətinin beynəlxalq səviyyədə tanıdılmasına töhfə verir.
jpg_1792100723.jpg)
