Azərbaycan Prezidenti İlham Əliyevin Almaniyaya son rəsmi səfəri və bu çərçivədə keçirilən yüksəksəviyyəli görüşlər Azərbaycan ilə Avropa İttifaqı (Aİ) arasında siyasi və iqtisadi əməkdaşlığın yeni mərhələyə keçdiyini göstərir. Bu proses yalnız ikitərəfli münasibətlər baxımından deyil, həm də Cənubi Qafqazın geosiyasi və geoiqtisadi əhəmiyyətinin artması baxımından mühüm nəticələr vəd edir.
Bu fikirləri AZƏRTAC-a açıqlaması zamanı türkiyəli iqtisadçı-ekspert Canip Nuray deyib.
Ekspert bildirib ki, Almaniya Avropa İttifaqının ən böyük iqtisadiyyatı olmaqla yanaşı, Aİ-nin siyasi qərarlarının formalaşmasında aparıcı rol oynayan ölkələrdən biridir.
"Bu baxımdan Prezident İlham Əliyevin Almaniyaya səfəri Azərbaycan ilə Avropa İttifaqı arasında strateji dialoqun daha da dərinləşməsi üçün əlverişli zəmin yaradır. Azərbaycan son illərdə etibarlı enerji təchizatçısı, mühüm logistika mərkəzi və regional sabitliyə töhfə verən dövlət kimi Avropanın diqqət mərkəzindədir. Almaniya ilə əlaqələrin inkişafı Avropa İttifaqının Azərbaycanla əməkdaşlığa verdiyi önəmin artdığını göstərən mühüm göstəricilərdən biridir. Avropa İttifaqı ilə iqtisadi əlaqələrin genişlənməsi Azərbaycanın qeyri-neft sektoruna xarici investisiyaların cəlb olunmasını sürətləndirə, yüksək texnologiyalar, "yaşıl enerji", rəqəmsal transformasiya və sənaye əməkdaşlığı sahələrində yeni layihələrin həyata keçirilməsinə imkan yarada bilər. Avropa şirkətlərinin Azərbaycana marağının artması ölkənin investisiya mühitinə olan etimadın güclənməsinin göstəricisidir. Bu isə yeni istehsal müəssisələrinin yaradılması, məşğulluğun artırılması və ixrac potensialının genişlənməsi baxımından mühüm əhəmiyyət daşıyır. Azərbaycanın Orta dəhliz üzrə həyata keçirdiyi genişmiqyaslı infrastruktur layihələri də Avropa İttifaqı ilə əməkdaşlığın strateji əhəmiyyətini artırır", - deyə Canip Nuray vurğulayıb.
Onun fikrincə, Avropa ilə Asiyanı birləşdirən bu marşrutun inkişafı Azərbaycanı qlobal ticarət və nəqliyyat sisteminin əsas halqalarından birinə çevirir: "Almaniya və digər Avropa ölkələrinin Orta dəhlizə marağının artması təkcə iqtisadi deyil, həm də geosiyasi baxımdan yeni reallıq formalaşdırır. Azərbaycanın tranzit imkanlarının genişlənməsi region ölkələri arasında iqtisadi inteqrasiyanı gücləndirəcək, ticarət dövriyyəsini artıracaq və Cənubi Qafqazın beynəlxalq əhəmiyyətini daha da yüksəldəcək. Enerji təhlükəsizliyi sahəsində Azərbaycan ilə Avropa İttifaqı arasında əməkdaşlığın genişlənməsi regionda sabitliyin möhkəmlənməsinə də müsbət təsir göstərəcək. Xəzər hövzəsinin enerji resurslarının Avropa bazarlarına təhlükəsiz və dayanıqlı şəkildə çatdırılması uzunmüddətli tərəfdaşlığın əsas istiqamətlərindən biri olaraq qalacaq".
Canip Nuray bildirib ki, Prezident İlham Əliyevin Almaniyaya son səfəri Azərbaycan-Avropa İttifaqı münasibətlərində yeni əməkdaşlıq imkanlarının formalaşdığını nümayiş etdirir. Onun sözlərinə görə, siyasi dialoqun intensivləşməsi, iqtisadi əlaqələrin genişlənməsi və nəqliyyat-logistika layihələrinin inkişafı Azərbaycanın regional lider mövqeyini daha da möhkəmləndirəcək, eyni zamanda Cənubi Qafqazın sabitliyi və iqtisadi inkişafı üçün yeni perspektivlər açacaq.
