Azərbaycan Cənubi Qafqazın aparıcı dövləti olmaqla yanaşı, həm də beynəlxalq gündəliyə təsir imkanlarına malik orta güc kimi nüfuzunu möhkəmləndirib. Orta güc dövlətlərin hərbi və iqtisadi potensialla paralel müstəqil xarici siyasət, diplomatik çeviklik, etibarlı tərəfdaş imici və milli maraqları qətiyyətlə müdafiə etmək bacarığı ilə ölçülür.
Milli Məclisin deputatı Könül NURULLAYEVA qəzetimizə açıqlamasında deyib ki, Azərbaycanın son illərdə enerji təhlükəsizliyi, beynəlxalq nəqliyyat dəhlizləri, çoxtərəfli diplomatiya və regional əməkdaşlıq platformalarında fəal iştirakı ölkəmizin nüfuzunu əhəmiyyətli dərəcədə artırıb: "Xəzər hövzəsini Avropa ilə birləşdirən enerji marşrutları, Orta dəhlizin inkişafı, Türk Dövlətləri Təşkilatı, Qoşulmama Hərəkatı və digər beynəlxalq platformalarda fəallıq Azərbaycanın geosiyasi çəkisini daha da gücləndirib. Prezident İlham Əliyev IV Şuşa Qlobal Media Forumunda ölkəmizin yeni bir mərhələyə qədəm qoyduğunu vurğulayaraq bəyan etdi ki, "Azərbaycan artıq orta gücə çevrilir və düşünürük ki, ölkəni orta güc kimi xarakterizə edən meyarların müəyyənləşdirilməsi mümkündür". Cənab Prezidentin də söylədiyi kimi, orta güc ölkənin potensialının etiraf olunmasıdır, onun öz milli maraqlarını müdafiə etmək bacarığının müəyyən edilməsidir".
Deputat qeyd edib ki, beynəlxalq münasibətlər sistemində orta güc hesab olunan dövlətlər böyük güclərlə rəqabət aparmaqdan daha çox, regional sabitliyin təmin edilməsində, dialoqun təşviqində, vasitəçilik missiyalarında və çoxtərəfli əməkdaşlıq mexanizmlərində fəal rol oynayırlar. Bu xüsusda rəsmi Bakı müxtəlif siyasi və iqtisadi mərkəzlərlə qarşılıqlı faydalı əməkdaşlıq quraraq balanslaşdırılmış diplomatiya həyata keçirir. Bu siyasət ölkəmizə həm Şərq, həm də Qərb üçün etibarlı tərəfdaş statusu qazandırıb. "Enerji diplomatiyası da Azərbaycanın beynəlxalq mövqeyinin güclənməsində mühüm rol oynayır. Avropanın enerji təhlükəsizliyinə verdiyi töhfələr, təbii qaz ixracının genişlənməsi və yeni enerji layihələri Azərbaycanın strateji əhəmiyyətini artırıb. Bununla yanaşı, Bakı-Tbilisi-Qars dəmir yolu, Orta dəhliz və "Şərq-Qərb" nəqliyyat marşrutları ölkəmizi Avrasiya logistikasının əsas qovşaqlarından birinə çevirib", - deyə o əlavə edib.
K.Nurullayeva bildirib ki, Azərbaycanın beynəlxalq əlaqələri çox genişdir. Bunun nəticəsidir ki, Azərbaycanla əməkdaşlıq etmək istəyən ölkələrin sayı artır. Bu reallıqlar ölkəmizin xarici siyasət strategiyasının beynəlxalq səviyyədə qəbul olunduğunu təsdiqləyir.
Deputat vurğulayıb ki, ən əsas məsələ siyasi etibarlılıq qazanmaq, regional təşəbbüslər irəli sürmək bacarığı, beynəlxalq tərəfdaşların etimadı və qlobal proseslərə təsir imkanlarının mövcudluğudur: "Ümumilikdə Azərbaycanın beynəlxalq münasibətlər sistemində artan nüfuzu və orta güc statusuna yüksəlməsi müstəqil dövlətçilik strategiyasının, ardıcıl xarici siyasət kursunun və milli maraqlara əsaslanan diplomatiyanın real nəticələridir. Mövcud geosiyasi şəraitdə rəsmi Bakı regional liderliyini möhkəmləndirməklə yanaşı, qlobal proseslərdə də söz sahibi olan etibarlı tərəfdaş kimi mövqeyini daha da gücləndirməkdədir".
Əsmər QARDAŞXANOVA,
"Azərbaycan"
