Prezident İlham ƏLİYEV: "Biz bütün beynəlxalq təşkilatlarda hər zaman bir-birimizi dəstəkləyirik"
Azərbaycan və Gürcüstan arasında iqtisadi əlaqələr regionun inkişafı, ticarət dövriyyəsinin genişlənməsi və beynəlxalq nəqliyyat-kommunikasiya imkanlarının artırılması baxımından əhəmiyyətlidir. Tarixi qonşuluq münasibətlərinə və qarşılıqlı etimada əsaslanan bu əməkdaşlıq hazırda strateji tərəfdaşlıq səviyyəsində inkişaf edərək enerji, nəqliyyat, tranzit, investisiya və ticarət kimi müxtəlif istiqamətləri əhatə edir.
Avropa ilə Asiyanı birləşdirən marşrutlar üzərində yerləşən Azərbaycan və Gürcüstanın coğrafi üstünlükləri iqtisadi əməkdaşlıq üçün geniş imkanlar yaradır. Azərbaycanın Xəzər dənizinə, Gürcüstanın isə Qara dənizə çıxışı bu iki ölkəni "Şərq-Qərb" nəqliyyat dəhlizinin əsas iştirakçılarına çevirir. Bu amil onların regional ticarətdə, beynəlxalq yükdaşımaların təşkilində və yeni bazarlara çıxışın təmin edilməsində rolunu daha da artırır. Belə əməkdaşlığın genişlənməsində təbii ki, Prezident
İlham Əliyevin həyata keçirdiyi xarici siyasət kursu və Gürcüstanla münasibətlərin inkişafına verdiyi xüsusi önəm böyük rol oynayır. Dövlət başçısının Gürcüstanla münasibətlərin inkişafına göstərdiyi diqqət iki ölkə arasında iqtisadi əməkdaşlığın genişlənməsində də özünü göstərir. Gürcüstan xalqı və dövləti də Azərbaycanın simasında özünün güvənilən qonşusunu və etibarlı tərəfdaşını görür. İki ölkə rəhbərləri arasında müntəzəm görüşlər və aparılan danışıqlar yeni iqtisadi layihələrin müzakirəsinə, mövcud əlaqələrin daha da gücləndirilməsinə imkan yaradır.
Qeyd edək ki, Prezident İlham Əliyevin 2026-cı il aprelin 6-da Gürcüstana dövlət səfəri iki ölkə arasında münasibətlərin inkişafında diqqətəlayiq hadisələrdən biri kimi yadda qalıb. Səfər çərçivəsində Gürcüstan Prezidenti Mixeil Kavelaşvili və Baş nazir İrakli Kobaxidze ilə keçirilən görüşlərdə iqtisadiyyat, enerji, nəqliyyat, logistika və investisiya sahələrində əməkdaşlığın genişləndirilməsi məsələləri müzakirə edilib. Dövlət başçılarının mətbuata birgə bəyanatında İlham Əliyev deyib: "Biz bütün beynəlxalq təşkilatlarda da hər zaman bir-birimizi dəstəkləyirik. Hər zaman bir-birimizin ərazi bütövlüyünü, suverenliyini, sərhədlərimizin toxunulmazlığını dəstəkləmişik, dəstəkləyirik və dəstəkləyəcəyik. Əminik ki, Gürcüstan-Azərbaycan əlaqələri bundan sonra da inamla inkişaf edəcək".
İki ölkə arasında aparılan danışıqların və əldə olunan razılaşmaların real nəticələri konkret iqtisadi layihələrdə də öz əksini tapır. Bunun son nümunəsi oktyabrın 30-da Gürcüstanın Siqnaxi şəhərində keçirilən Azərbaycan və Gürcüstan arasında İqtisadi Əməkdaşlıq üzrə Birgə Hökumətlərarası Komissiyanın 11-ci iclasıdır. İclas çərçivəsində iqtisadi-ticarət əlaqələrinin genişləndirilməsi, nəqliyyat-logistika imkanlarının artırılması və birgə layihələrin həyata keçirilməsi istiqamətində yeni razılaşmalar əldə edilib. İclas çərçivəsində imzalanan sənədlərdən biri sərhəd-keçid infrastrukturunun inkişafına və yükdaşımaların asanlaşdırılmasına yönəlib. "İpək yolu - Abreşumis Qza" birgə beynəlxalq avtomobil buraxılış məntəqəsinin fəaliyyətinin praktiki mərhələyə keçməsini nəzərdə tutan protokolun imzalanması sözügedən sahədə atılan addımlardan biri kimi qiymətləndirilir. Sənəd Ağstafa-Qardabani istiqamətində birgə sərhəd-keçid məntəqəsinin fəaliyyətinin təşkili və tətbiqi ilə bağlıdır. Layihənin həyata keçirilməsi Azərbaycan və Gürcüstan arasında yük və nəqliyyat vasitələrinin hərəkətini daha da asanlaşdıra bilər. Sərhəd prosedurlarının sadələşdirilməsi, gözləmə müddətinin qısaldılması və logistika xərclərinin azaldılması həm daşıyıcılar, həm də sahibkarlar üçün əlavə imkanlar yaradacaq.
Azərbaycan-Gürcüstan iqtisadi əməkdaşlığının miqyası iki ölkə arasında artan ticarət dövriyyəsində və qarşılıqlı investisiyalarda da aydın görünür. Gürcüstan Azərbaycanın əsas ticarət tərəfdaşlarından biri olaraq qalır. Cari ilin ilk doqquz ayında iki ölkə arasında ticarət dövriyyəsi ötən ilin müvafiq dövrü ilə müqayisədə 42 faiz artaraq 1 milyard dollara yaxınlaşıb. Rəqəmlər iqtisadi əlaqələrin genişləndiyini və qarşılıqlı ticarət imkanlarının artdığını nümayiş etdirir. Bu barədə Baş nazir Əli Əsədov bəhs etdiyimiz tədbirdə çıxışı zamanı məlumat verib. O, iki ölkə arasında ticarət-iqtisadi əməkdaşlığın müsbət dinamika ilə inkişaf etdiyini vurğulayaraq, Azərbaycanın Gürcüstan iqtisadiyyatına yatırdığı investisiyaların həcminə də diqqət çəkib. Bildirib ki, Azərbaycan indiyədək Gürcüstana 4 milyard dollara yaxın sərmayə yatırmaqla bu ölkənin ən böyük investorlarından birinə çevrilib.
Danılmaz faktdır ki, energetika və nəqliyyat Azərbaycan-Gürcüstan iqtisadi tərəfdaşlığının əsas istiqamətlərindəndir. Heydər Əliyev adına Bakı-Tbilisi-Ceyhan neft kəməri, "Cənub qaz dəhlizi" və Bakı-Tbilisi-Qars dəmir yolu hər iki ölkənin regional və beynəlxalq iqtisadi əlaqələrinin genişlənməsində önəmli rol oynayır. Hazırda "yaşıl enerji"nin ötürülməsi üzrə regional dəhlizin yaradılması istiqamətində aparılan əməkdaşlıq isə tərəfdaşlığa yeni perspektivlər qazandırır.
Bu layihələr iki ölkənin iqtisadi əlaqələrini gücləndirməklə yanaşı, əməkdaşlığın yeni istiqamətlər üzrə genişləndirilməsi üçün də zəmin yaradır. Ona görə gələcəkdə əməkdaşlığın bir qədər də genişlənməsi üçün tranzit imkanlarından səmərəli istifadə ilə yanaşı, yerli istehsalın və emal sənayesinin inkişafına diqqət yetirilməlidir. Yüklərin daşınması ilə yanaşı, onların çeşidlənməsi, qablaşdırılması, saxlanılması və emalı da əlavə iqtisadi dəyər yarada bilər. Logistika mərkəzlərinin yaradılması və birgə investisiya layihələrinin həyata keçirilməsi bu potensialın reallaşmasına mühüm töhfə verə bilər.
Bütün deyilənlər onu göstərir ki, Azərbaycan-Gürcüstan iqtisadi tərəfdaşlığı regionun gələcək iqtisadi mənzərəsini formalaşdırmaq yolunda irəliləyir. Qarşılıqlı etimad və ortaq maraqlar üzərində qurulan bu əməkdaşlığın yeni layihələrlə daha da dərinləşməsi hər iki ölkənin iqtisadi potensialının reallaşdırılmasına və regional mövqelərinin möhkəmlənməsinə xidmət edəcək.
Züleyxa ƏLİYEVA,
"Azərbaycan"
314444444 - Copyjpg_1793831795.jpg)
