Təkcə Bakının 110-dan çox küçə və prospektində təmir işləri gedir
Mövsümlə əlaqədar Bakıda küçə və prospektlərdə genişmiqyaslı təmir işləri aparılır. Azərbaycan Avtomobil Yolları Dövlət Agentliyinin məlumatına görə, hazırda Bakının 12 rayonunda 110-dan çox küçə və prospektində təmir işləri həyata keçirilir. 800 min kvadratmetrdən artıq yol örtüyünün yenilənməsi nəzərdə tutulur. 20-yə yaxın küçə və prospektdə təmir işləri tam başa çatdırılıb. Daha 10-a yaxın yol sahəsində isə işlər gedir.
Belə ünvanlardan biri də Nərimanov rayonu ərazisindəki Təbriz və Əhməd Rəcəbli küçələridir. "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı" çərçivəsində Təbriz küçəsində, eləcə də Həsən Əliyev və Əhməd Rəcəbli küçələrində yenidənqurma layihəsi çərçivəsində bir neçə ay əvvəl başlanan tikinti işləri şənbə-bazar günləri də davam edir.
2027-ci ildə istifadəyə verilməsi planlaşdırılan Akademik Həsən Əliyev küçəsi - "Koroğlu" metrostansiyası avtomobil yolunda son aylar tikinti işlərinin intensivliyi müşahidə olunur. Ötən ildən icrasına başlanılan layihə çərçivəsində yolun keçəcəyi ərazidə yerləşən bir sıra obyektlər tamamilə sökülüb. İndi burada yerüstü və yeraltı yollar çəkilir.
Hazırda işlər Rövşən Əliyev və Ələsgər Qayıbov küçələrindən Fətəli xan Xoyski küçəsi istiqamətinə start götürüb. Layihə üzrə digər ərazilərdə nəzərdə tutulan işlər də qrafikə uyğun aparılır. İşlərin mərhələli icrası nəqliyyatın fasiləsizliyinin təmin olunmasına, eyni zamanda mövcud yol şəbəkəsində yarana biləcək narahatlıqların minimuma endirilməsinə xidmət edir. Qeyd edək ki, magistral küçə kimi inşa olunan yolun ümumi uzunluğu 3,896 metrdir. Yolun hərəkət hissəsi 6 zolaqlı, hər zolağın eni 3,5 metr olacaq. Layihəyə əsasən, burada 4 tunel və 3 yeraltı piyada keçidi tikiləcək.
Həsən Əliyev və Əhməd Rəcəbli küçələrinin kəsişməsində avtomobil tunelinin inşasının çox hissəsi başa çatıb. Burada tikinti işləri metronun ''Koroğlu'' stansiyası, yeni avtomobil yolu layihəsi çərçivəsində aparılır.
Təbriz küçəsinin "Böyük meydan" adlanan ərazisində də yenidənqurma işləri gedir. Küçənin Heydər Əliyev Mərkəzinin qarşısından keçən hissəsindən "Nərimanov" metrostansiyasınadək piyada yollarında yenidənqurma işləri yeni dizaynda aparılır. "Nəriman Nərimanov" metro stansiyasının ətrafında avtobuslar üçün kiçik mübadilə mərkəzi yaradılması işlərinə başlanılıb. Ərazidə yeni piyada keçidləri təşkil olunacaq və kəsintisiz piyada mühiti formalaşdırılacaq.
Bakının yeni salınan və əsaslı təmir-tikinti aparılan küçə və prospektlərində dünya standartlarına uyğun işıqforlar quraşdırılır. Bu onu göstərir ki, ölkəmizdə son illər yol hərəkəti təhlükəsizliyinin artırılması məqsədilə texnologiyaların rolu sürətlə genişlənir. Yol kameralarına inteqrasiya olunan süni intellekt modelləri artıq sürücülərin davranışlarını real vaxtda analiz edə bilir. Bu sistemlər sükan arxasında mobil telefondan istifadə, təhlükəsizlik kəmərinin taxılmaması kimi qayda pozuntularını yüksək dəqiqliklə aşkarlayaraq avtomatik cərimələmə mexanizmini işə salır. Belə innovativ yanaşma həm qayda pozuntularının azalmasına, həm də yol qəzalarının qarşısının alınmasına xidmət edir.
Artıq ölkəmizdə "ağıllı" radarlar və "ağıllı" işıqforların quraşdırılması həyata keçirilir. Proses Bakıdan başlayaraq, bütün bölgələri əhatə edəcək. Ölkənin müxtəlif yollarında təhlükəsizlik kəmərinin taxılmamasını qeydə alan xüsusi kameralar da quraşdırılıb.
Texnologiyanın imkanları təkcə kəmər və ya telefonla məhdudlaşmır. Yaxın gələcəkdə bu sistemlərin sürücünün yorğunluq dərəcəsini, diqqətinin yayınmasını və hətta avtomobilin hərəkət trayektoriyasındakı qeyri-adiliyi müəyyən etməsi gözlənilir. Belə sistemlərin tətbiqi insan amilindən qaynaqlanan səhvləri minimuma endirəcək. Avtomatlaşdırılmış nəzarət sürücülərdə hər an izlənildiyini yadda saxlamaqla onları daha məsuliyyətli olmağa məcbur edəcək. Bu isə həm sürücülərin, həm də piyadaların təhlükəsizliyi üçün ən effektiv yollardan biridir.
Rəhman SALMANLI,
İlham BABAYEV (foto),
"Azərbaycan"
