Hörmətli redaksiya!
Biz - Binəqədi rayonu, Sulutəpə qəsəbəsi, Mil küçəsinin sakinləri artıq 24-25 ildir burada yaşayırıq. Qaz, elektrik, telefon-internet xətləri dövlət standartlarına uyğun şəkildə çəkilib. Ancaq su və kanalizasiya sarıdan problemlərimiz hələ də qalır. Öz hesabımıza çəkilən su xətti standartlara uyğun olmadığından tez-tez bizə ciddi problemlər yaradır. 76 mm-lik köhnə boru ilə çəkilmiş xətt mütəmadi sıradan çıxır, evlərimizin zirzəmisinə axır, üstəlik, bu zaman evlərə su gəlmədiyindən susuz qalırıq.
3 il öncə çoxsaylı müraciətlərdən sonra Binəqədi Rayon Su-Kanal İdarəsi tərəfindən tamam yararsız olan su xəttinin 80 metri plastik boru ilə əvəzləndi. Ancaq problem təəssüf ki, yenə də qalır. Xüsusən yay gələn kimi köhnə su boruları partlayır. Qaydalı şəkildə çəkilmədiyindən bir küçədən iki su, iki kanalizasiya xətti keçir.
Problemlərimizdən biri də kanalizasiya xəttinin dözülməz olmasıdır. Hazırda bizim və qonşu küçənin qovşağındakı kanalizasiya xəttinin 25-30 metr hissəsi asfaltlanıb. Ancaq həmin hissə təmir olunmadığından vəziyyət acınacaqlıdır: kanalizasiya xətti tez-tez daşır, ətrafı üfunət bürüyür, çirkli su həyətlərə dolur, xüsusən yayın istisində nəfəs almaq mümkün olmur. İdarənin rəhbərliyi hər il üçün köhnəlmiş su xətlərinin heç olmasa bir hissəsinin plastik boru ilə əvəzlənəcəyinə söz versə də, hələ xəbər yoxdur.
Su və kanalizasiya xətləri bərbad vəziyyətdə olduğuna görə küçəmizin asfaltlanmasını da istəmirik. Ona görə ki, qayğılarımız daha da artacaq, köhnə xətlər asfaltın altında qaldığından bərpası mümkün olmayacaq.
Su və kanalizasiya xətlərinin bu vəziyyəti ekoloji cəhətdən də ciddi fəsadlar yaradır, təsəvvürəgəlməz dərəcədə su israfına səbəb olur.
Problemimizin aradan qaldırılmasında bizə kömək göstərməyinizi, səsimizi əlaqədar təşkilatlara çatdırmağınızı xahiş edirik.
Mil küçəsinin sakinləri:
E.İmaməliyev, C.Sadıqov, H.İbrahimov, R.Xəlilov, O.Səmədov, T.Abdulhəmidov, R.Kərimov, R.İsmayılov, L.Eyvazov, N.Eyvazov, A.Orucov, H.Nuriyev, C.Kərimov, P.Tağıyev, F.İsmayılov, V.Azayev, Q.Qəniyev, X.Əzizov, C.Orucov, Ş.Sabirov və başqaları.
19 (1)jpg_1771885865.jpg)
