İyunun 11-də Beynəlxalq Münasibətlərin Təhlili Mərkəzində (BMTM) “Cənubi Qafqazda yeni geosiyasi reallıqlar: Azərbaycan və sülh gündəliyi” mövzusunda tədbir keçirilib.
AZƏRTAC xəbər verir ki, tədbir Mərkəzin eyni mövzu üzrə təşkil etdiyi məqalə müsabiqəsinin yekun mərhələsi çərçivəsində baş tutub.
BMTM-in aparıcı məsləhətçisi Sultan Zahidovun moderatorluğu ilə keçirilən tədbirdə çıxış edən BMTM-in İdarə Heyətinin sədri Fərid Şəfiyev Mərkəz tərəfindən mütəmadi olaraq təşkil edilən məqalə müsabiqələrinin əhəmiyyətindən danışıb. O, Cənubi Qafqazda yeni geosiyasi reallıqların formalaşdığını və Azərbaycanın bu prosesdə lider rolunu oynadığını vurğulayıb.
“Azərbaycan hazırkı sülh gündəliyinin müəllifidir. Ölkəmizin Ermənistandan gözləntiləri və haqlı tələbləri dəyişməyib. Qərb mediasında Azərbaycanın Ermənistanda Konstitusiya dəyişikliyi və referendum məsələlərinə daha yumşaq yanaşmalı olduğu ilə bağlı çağırışlar səslənsə də, bu narrativlər sülh gündəliyinə xidmət etmir. Azərbaycanın milli maraqlarına əsaslanan sülh gündəliyi həm regional sabitliyə, həm də ümumi təhlükəsizliyə töhfə verir. Uzunmüddətli perspektivdə Ermənistanda fərqli siyasi qüvvələrin hakimiyyətə gəlməsi mümkündür. Bu baxımdan Konstitusiya dəyişikliyi məsələsinə Ermənistan xalqının referendum yolu ilə münasibət bildirməsi vacibdir,” - deyə F.Şəfiyev əlavə edib.
BMTM-in şöbə müdiri Mətin Məmmədli müasir dövrdə elmi-analitik düşüncənin dövlətlərin xarici siyasətinin formalaşdırılmasında mühüm rol oynadığını vurğulayıb. O qeyd edib ki, regional təhlükəsizlik arxitekturası sürətlə dəyişir və yeni geosiyasi reallıqlar meydana çıxır: “44 günlük Vətən müharibəsindən sonra sülh gündəliyinin formalaşması Azərbaycanın milli maraqlara əsaslanan düşünülmüş və ardıcıl diplomatiyası nəticəsində mümkün olub. Azərbaycanın irəli sürdüyü sülh gündəliyi beynəlxalq hüququn norma və prinsiplərinə əsaslanır. Azərbaycan dövləti və cəmiyyəti sülhə hazırdır və regionda sabitliyin möhkəmlənməsində maraqlıdır. Bununla yanaşı, ölkəmiz öz milli təhlükəsizliyinə yönələn istənilən təhdidi neytrallaşdırmaq potensialına malikdir”.
Ermənistanda keçirilmiş seçkilərin nəticələrinə toxunan Milli Məclisin deputatı Qaya Məmmədov bundan sonra atılmalı olan addımlara diqqət çəkib. O bildirib ki, regionda sülh gündəliyini müəyyən edən tərəf Azərbaycan olub və prosesin hazırkı mərhələyə çatması Azərbaycanın töhfələridir. Ermənistan cəmiyyəti referendum vasitəsilə Azərbaycana qarşı ərazi iddialarını aradan qaldırmalıdır. Bu, siyasi-hüquqi zərurətdir.
Milli Məclisin deputatı Rizvan Nəbiyev bildirib ki, regionda sülh platformasını formalaşdıran tərəf məhz Azərbaycan olub. Prezident İlham Əliyevin irəli sürdüyü bu yanaşma sonradan Paşinyan hökumətinin siyasi gündəliyində də öz əksini tapdı. Ermənistan cəmiyyətinin əhəmiyyətli hissəsinin sülh gündəliyinə dəstək verməsi göstərir ki, regionda sabitlik və əməkdaşlıq ideyaları getdikcə daha çox qəbul olunur. Paşinyan hökuməti isə əlində olan siyasi və hüquqi mexanizmlərdən istifadə etmək üçün kifayət qədər siyasi iradə nümayiş etdirməlidir.
Tədbirin sonunda məqalə müsabiqəsinin qalibləri mükafatlandırılıb.
Müsabiqənin nəticələrinə əsasən, Nərmin İsmayılovanın “Vaşinqton Sülh Bəyannaməsi regional sülh və əməkdaşlıq yolunda mühüm mərhələ kimi” mövzusunda araşdırması I yerə layiq görülüb. Nəzrin Qasımovanın “2020-ci il Vətən Müharibəsinin və 2023-cü il antiterror tədbirlərinin Cənubi Qafqaz üçün siyasi, iqtisadi və sosial nəticələri” mövzusunda araşdırması II yerə, Aysel Səmədovanın “Əlaqəlilik sülh strategiyası kimi: Zəngəzur Dəhlizi və Cənubi Qafqazda regional geosiyasətin transformasiyası” mövzusunda araşdırması isə III yerə layiq görülüb.
Qeyd edək ki, BMTM-in artıq ənənəyə çevrilmiş məqalə müsabiqələrinin əsas məqsədi ölkənin strateji gündəliyinə uyğun mövzular üzrə gənc tədqiqatçıların elmi hazırlıq səviyyəsinin yüksəldilməsini təşviq etmək, həmçinin akademik dairələr, ictimaiyyət nümayəndələri və media təmsilçiləri arasında interaktiv fikir mübadiləsi üçün platforma yaratmaqdır.
11:09
Beynəlxalq Münasibətlərin Təhlili Mərkəzinin (BMTM) təşkilatçılığı ilə “Cənubi Qafqazda yeni geosiyasi reallıqlar: Azərbaycan və sülh gündəliyi” mövzusunda tədbir keçirilir.
AZƏRTAC xəbər verir ki, tədbir regionda formalaşan yeni siyasi və geosiyasi reallıqların, eləcə də Azərbaycanın regional sülh və əməkdaşlıq gündəliyinin müzakirəsinə həsr olunub.
BMTM tərəfindən təşkil olunan “Cənubi Qafqazda yeni geosiyasi reallıqlar: Azərbaycan və sülh gündəliyi” mövzusunda məqalə müsabiqəsinin yekun mərhələsi çərçivəsində keçirilən tədbirdə Mərkəzin mütəxəssisləri, Milli Məclisin deputatları və ekspertlər tərəfindən Cənubi Qafqazda cərəyan edən geosiyasi proseslər, regional təhlükəsizlik mühiti və sülh gündəliyinin perspektivləri ilə bağlı çıxışlar edilir.
677jpg_1781134810.jpg)
