Azərbaycanda Ələt Azad İqtisadi Zonası ərazisində Çin şirkətinin iştirakı ilə günəş panellərinin istehsalı üzrə zavodun tikintisinə yaxın həftələrdə başlanılacaq. Bunu Ələt Azad İqtisadi Zonası İdarə Heyətinin sədri Valeh Ələsgərov Bakıda Azərbaycan Amerika Ticarət Palatası (AmCham Azerbaijan) tərəfindən təşkil olunan “TECHNOVATION: Davamlı İqtisadi Transformasiya üçün Elm və İnnovasiya” tədbirində bildirib.
Onun sözlərinə görə, zavodun ilk mərhələsində ildə təxminən 3 QVt gücündə günəş panelləri istehsal ediləcək, gələcəkdə isə istehsal gücünün 10 QVt-a çatdırılması planlaşdırılır. Valeh Ələsgərov əlavə edib ki, layihənin reallaşması günəş enerjisinin maya dəyərinin azalmasına, bərpa olunan enerji mənbələrinə çıxışın genişlənməsinə və elektrik enerjisinin saxlanılması üzrə həllərin inkişafına imkan yaradacaq.
O bildirib ki, paralel olaraq külək energetikası üçün komponentlərin, xüsusilə turbin pərləri və qüllələrinin yerli istehsalının təşviqi müzakirə olunur, çünki onların xaricdən daşınması mürəkkəb və bahalı prosesdir. Valeh Ələsgərov qeyd edib ki, enerji sisteminə böyük həcmdə külək və günəş generasiyasını səmərəli inteqrasiya etmək üçün elektrik enerjisinin saxlanılması üzrə həllər vacibdir.
Xatırladaq ki, 2025-ci il sentyabrın 9-da Baş nazirin müavini və Azərbaycan-Çin hökumətlərarası ticarət-iqtisadi əməkdaşlıq komissiyasının həmsədri Şahin Mustafayevin rəhbərliyi ilə Çində imzalanan investisiya sazişi Ələt Azad İqtisadi Zonasında müasir günəş paneli istehsal kompleksinin yaradılmasını nəzərdə tutur.
Layihəyə əsasən, 23 hektar ərazini əhatə edən sənaye zonasında üç müasir istehsal obyekti tikiləcək. Bu obyektlərdə illik 3 QVt günəş paneli istehsal olunacaq, həmçinin silisium kristalları və komplektləşdirici hissələrin istehsalı nəzərdə tutulub. İstehsal olunacaq məhsullar arasında Ələt Azad İqtisadi Zonasının özündə günəş elektrik stansiyasının tikintisi üçün istifadə ediləcək panellər olacaq, məhsulun əhəmiyyətli hissəsi isə dünya bazarlarına ixrac ediləcək.
Züleyxa ƏLİYEVA,
“Azərbaycan”
