Nuray Məmmədova musiqiyə hədsiz sevgi ilə bağlanan, zəhmət və istedadın vəhdətində formalaşan, ümidverici həyat yolu olan yeniyetmə ifaçılarımızdandır. Hazırda 14 yaşlı Nuray hələ kiçik yaşlarından incəsənətə, xüsusən musiqiyə dərin maraq göstərib.
2018-ci ildə Sumqayıt şəhər 23 nömrəli tam orta məktəbin birinci sinfinə qədəm qoyan Nurayın həyatında bu dövr həm də yaradıcılıq axtarışlarının başlanğıcı kimi yadda qalıb. O, 2018-2020-ci illər ərzində milli rəqslə məşğul olaraq səhnə mədəniyyəti və ritm duyumunu inkişaf etdirib. Həmin illər məktəbdaxili müsabiqələrdə qazandığı uğurlar onun səhnəyə olan təbii uyğunluğunu və istedadını üzə çıxarıb. Lakin 2020-ci ildə dünyanı bürüyən pandemiya səbəbindən bu fəaliyyətini müvəqqəti dayandırmalı olub.
Bununla belə, Nurayın incəsənətə olan bağlılığı daha fərqli və dərin bir istiqamətdə özünü göstərməyə başlayıb. 2019-cu ildə Sumqayıt Uşaq İncəsənət Məktəbinə skripka ixtisası üzrə qəbul olunması onun həyatında dönüş nöqtəsinə çevrilib. Klassik musiqinin sehrli dünyası ilə tanışlıq qısa müddətdə böyük bir sevgiyə çevrilib. Bu sevgi isə öz növbəsində onu daha ciddi, məqsədyönlü və zəhmətkeş bir ifaçı kimi formalaşdırıb.
Nuray musiqi məktəbinin ən fəal şagirdlərindən biri olub. O, həm məktəb, həm də şəhər səviyyəli tədbirlərdə mütəmadi çıxış edərək dinləyicilərin rəğbətini qazanıb. İstedadı və əzmkarlığı ona ölkədaxili və beynəlxalq müsabiqələrdə uğur qazandırıb, onun adını daha geniş auditoriyaya tanıdıb. 2022-ci ildə Qazaxıstanda keçirilən beynəlxalq musiqi müsabiqəsində Qran-pri diplomuna layiq görülməsi Nurayın sənət yolunda mühüm mərhələ olub. Bu uğur onun beynəlxalq səviyyədə bir ifaçı olduğunu sübut edib. 2023-cü ildə Londonda keçirilən beynəlxalq müsabiqədə qazandığı birincilik isə onun sənət zirvələrinə doğru inamla irəlilədiyini bir daha təsdiqləyib.
2024-cü il də Nuray üçün uğurlarla zəngin olub. Sumqayıtın 75 illik yubileyinə həsr olunmuş müsabiqədə birinci yerə layiq görülməsi onun doğma şəhərində qazandığı dəyərli nailiyyətlərdən biri kimi yadda qalıb. Elə həmin il keçirilən "Zəfər" respublika yaradıcılıq festivalında ikinci yerə sahib olması isə onun çoxşaxəli yaradıcılıq potensialını nümayiş etdirib. 2025-ci ildə Nuray böyük miqyaslı respublika uşaq incəsənət festivalında ikinci yerə layiq görülərək uğurlar silsiləsini davam etdirib. Həmin il "Barokko ustadları - 340" adlı birinci respublika müsabiqəsinin laureatı olması onun klassik musiqi, xüsusilə barokko dövrü əsərlərinə olan marağının və bu sahədəki peşəkarlığının göstəricisinə çevrilib.
Nuray Məmmədova bu gün də musiqi təhsilini böyük həvəs və məsuliyyətlə davam etdirir. Onun ən böyük arzusu gələcəkdə nümunəvi bir ifaçı kimi formalaşmaq və Azərbaycanı beynəlxalq səhnələrdə layiqincə təmsil etməkdir. Bu məqsədə çatmaq üçün, o, yorulmadan çalışır.
İlhamə MƏMMƏDOVA
jpg_1781177334.jpg)
