Azərbaycanlı gənc alim Sona Quliyeva aerokosmik tədqiqatlar üzrə nüfuzlu beynəlxalq “Top 100 Women in Aerospace & Aviation 2025” reytinqində üçüncü yerə layiq görülüb. O, dünya üzrə 200-dən artıq namizəd arasından seçilərək aerokosmik və aviasiya sahəsində fəaliyyət göstərən tanınmış qadın mütəxəssislər sırasında yer alıb.
Sona Quliyeva beynəlxalq uğuru ilə bağlı AZƏRTAC-a bildirib: “Mənim üçün bu tanınma artıq nominasiyada iştirak və finalçıların siyahısına düşməklə başlamışdı. Açığı, üçüncü yerə layiq görüləcəyimi gözləmirdim. Bu, dürüst və ardıcıl əməyin görünən olduğunu, seçilmiş yolun və görülən işin mənalı olduğunu bir daha təsdiqlədi. Mən bu nəticəni dərin minnətdarlıq və məsuliyyət hissi ilə qəbul edirəm”, – deyə o qeyd edib.
Gənc alim reytinq nəticələrini bayramın ilk günü səhər saatlarında ailəsi ilə videobağlantı zamanı öyrəndiyini və üçüncü yerin onun üçün gözlənilməz olduğunu bildirib. “Bu sahədə fəaliyyətimə verilən yüksək qiymət təkcə mənə deyil, eyni zamanda, mənə dəstək göstərən və yoluma davam etməyin vacibliyini xatırladan hər kəsə aiddir”, – deyə Sona Quliyeva vurğulayıb.
Azərbaycanlı mütəxəssisin “Top 100 Women in Aerospace & Aviation 2025” reytinqində ilk üçlükdə yer alması ölkənin aerokosmik tədqiqatlar, elm, innovasiya və yüksək texnologiyalar sahəsində artan nüfuzunun və potensialının, eləcə də azərbaycanlı alimlərin beynəlxalq səviyyədə tanınmasınıngöstəricisi kimi qiymətləndirilir.
Reytinqin tam siyahısı ilə “Top 100 Women in Aerospace & Aviation” layihəsinin rəsmi platformasında tanış olmaq mümkündür: https://top100aero.space/Landing
Qeyd edək ki, “Top 100 Women in Aerospace & Aviation” reytinqi aerokosmik və aviasiya sahəsində real töhfə vermiş qadın mütəxəssislərin tanınmasına yönəlmiş qlobal təşəbbüsdür. Siyahı aerokosmik və aviasiya sahəsində müxtəlif istiqamətlər üzrə fəaliyyət göstərən qadın mütəxəssisləri əhatə edir və beynəlxalq miqyasda bu sahədə çalışan peşəkarların fəaliyyətini əks etdirir.
Reytinq bir neçə il əvvəl təsis olunub və 2025-ci il siyahısı layihənin növbəti buraxılışıdır. Cari buraxılış çərçivəsində 230-dan çox namizəd qeydə alınıb, yekun nəticələr isə peşəkar ictimaiyyətin rəy və səsverməsi əsasında formalaşdırılıb.
Layihənin təsisçisi Matthew Higa təşəbbüsün populyarlıq yarışması olmadığını, əsas məqsədin peşəkar nüfuz, liderlik və real təsirin önə çıxarılması olduğunu bildirib. Onun sözlərinə görə, layihə aerokosmik və aviasiya sənayesinin inkişafında mühüm rol oynayan, lakin çox zaman ictimai diqqətdən kənarda qalan mütəxəssislərin fəaliyyətini üzə çıxarmağı hədəfləyir.
19 (1)jpg_1771885865.jpg)
