İyunun 3-nə keçən gecə Ukrayna müdafiə qüvvələri Rusiyadakı bir neçə vacib hədəfə zərbə endirib. Bunlara Sankt-Peterburqun neft terminalı, Kronştadt bazasındakı obyektlər və Tambov bölgəsindəki obyekt daxildir.
AZƏRTAC bu barədə Ukrayna Prezidenti Volodimir Zelenskinin “Telegram” kanalında paylaşımına istinadla xəbər verir.
Dövlət başçısının sözlərinə görə, Ukrayna Təhlükəsizlik Xidmətinin, Pilotsuz Sistemlər Qüvvələrinin, Xüsusi Əməliyyat Qüvvələrinin, Baş Kəşfiyyat İdarəsinin və Dövlət Sərhəd Xidmətinin qoşunları gecə əməliyyatına qoşulub.
Əsas hədəflərdən biri Sankt-Peterburq neft terminalı olub. Zelenskinin sözlərinə görə, Ukrayna sərhədindən bu obyektə qədər məsafə təxminən 1100 kilometrdir.
Prezident terminalın “müharibə üçün işləyən” Rusiya neft sənayesinin bir hissəsi olduğunu vurğulayıb.
Onun sözlərinə görə, ikinci hədəf Kronştadt bazasındakı sırf hərbi obyektlər olub.
Üçüncü hədəf Tambov bölgəsində Rusiya silahlarının istehsalı ilə məşğul olan bir obyekt idi. O, cəbhə xəttindən təxminən 600 kilometr məsafədə yerləşir. “Dəqiqliyə görə əsgərlərimizə təşəkkür edirik. Ukraynanın uzunmüddətli sanksiyalar planı sülhün bərqərar olması üçün tam şəkildə və lazım olduğu kimi həyata keçirilir”, - deyə Zelenski bildirib.
Bir müddət əvvəl Ukrayna mediası iyunun 3-nə keçən gecə Sankt-Peterburq limanındakı neft terminalına dronların hücum etdiyini və nəticədə böyük yanğın baş verdiyini bildirmişdi. “Sankt-Peterburq Neft Terminalı” ASC Rusiyanın şimal-qərbindəki ən böyük neft emalı kompleksidir.
