Güclülər də hədə-qorxu gələ bilirlər, zəiflər və qorxaqlar da!
Fərq burasındadır ki, güclü özünə arxayın olaraq asıb-kəsir, zəif isə özgəsinə!
Amma nəticə vuruşanda, döyüş meydanında bəlli olur!
Başqasına "xox" gəlməyin digər bir məqsədi də var:
Özünü güclü göstərmək!
Başqalarının gözündə özünü ucaltmağa çalışmaq!
Öz adı ilə desək, gözə kül üfürmək!
Ancaq bu, birinci dəfədə, bir dəfə baş tuta bilər!
Uduzmuşun və məğlub olmuşun hapa-gopa basması isə yalnız ironik təbəssüm doğurar!
İstər adi adam olsun, istər hərbçi, istərsə də nə vaxtsa prezident işləmiş birisi...
Fərq eləməz!
Döyüş meydanında basılaraq döyülənin, qol-qabırğası qırılanın, yalvararaq aman diləyənin sonradan ağız-burnunun qanını silərək xoruzlanması təkcə təbəssüm yox, həm də ikrah yaradır!
Bəli, söhbət bir zamanlar Ermənistana başçılıq edənlərin, müharibədə məğlub edilərək kapitulyasiya aktına məcburən qol çəkdirilənlərin indi revanşizmdən dəm vurmalarından, təzədən xoruzlanmalarından gedir!
Xoruzların xoruzlanması təbiidir...
Amma gərək iki məqamı unutmayasan:
Birinci, lap yaxın keçmişdə baş verənləri...
İkinci, "dəmir yumruğ"un mövcudluğunu!
Çünki davanın nəticəsini söz yox, yumruq həll edir!
***
Erməni cəsarətinin arxasında həmişə rus amili dayanıb.
Çünki erməniləri Cənubi Qafqaza gətirən də, onları Azərbaycan torpaqlarında yerləşdirən də, Ermənistan adında dövlət yaradan da, bu dövləti bizdən qoparılan ərazilər hesabına daim genişləndirən də, İrəvanı bizdən alıb yeni erməni dövlətinə paytaxt edən də, ən nəhayət, Ermənistanı daim silahlandıraraq üstümüzə qısqırdan da məhz Rusiya olub.
Çar Rusiyasının başladığı işi sovet Rusiyası mövcudluğu dövründə dayanmadan davam etdirib.
Bir tərəfdən dədə-baba torpaqlarında yaşayan azərbaycanlıları müxtəlif adlarla deportasiya edib, digər tərəfdən heç bir əsas və ehtiyac olmadan Azərbaycan ərazisində muxtar qurum yaradaraq orada ermənilərin sayını daim artırmağa çalışıb.
NİYYƏT:
* Əlaltı dövlət yaratmaqla onun ərazisində Türkiyəyə qarşı hərbi bazalar yerləşdirmək;
* Türk dövlətlərinin quru yolla əlaqələrini kəsmək və onları bir-birindən ayrı salmaq;
* Azərbaycana qarşı daimi təzyiq vasitəsi yaratmaqla onun yeraltı və yerüstü sərvətlərini mənimsəmək olub!
Tarixin ən sərt dönüşlərində - ilk dəfə Azərbaycan Xalq Cümhuriyyəti yarananda və Azərbaycan xalqı ikinci dəfə dövlət müstəqilliyinə nail olanda isə yenidən erməniləri maliyyələşdirərək və silahlandıraraq Qarabağ münaqişəsini körükləyib, xalqımıza ərazi və insan itkisi yaşadıb.
Əgər Rusiya və rus ordusu, rus silahı olmasaydı, Azərbaycandan hər sahədə - əhali sayına, iqtisadi imkanlara, strateji mövqelərə görə qat-qat geridə qalan Ermənistan bizdən torpaq qopara bilərdimi?!
Heç zaman!
Bunu II Qarabağ müharibəsi də açıq şəkildə göstərdi:
Hərbi əməliyyatlar Azərbaycan ərazisində getdiyinə görə Rusiya aşkar olaraq - KTMT qismində müdaxilə edə bilmədiyindən Azərbaycan öz gücü ilə otuzillik işğala 44 gündə son qoydu!
Hətta Rusiya sülhməramlıları açıq şəkildə erməni terrorçularına dəstək versələr də!
***
Hayların ikinci "silahı" "erməni soyqırımı" mifi və onun əsasında dünya miqyasında gördükləri işlərdir.
Ermənilərin heç zaman özlərinin əraziləri, vətənləri, dövlətləri olmayıb.
Olsaydı, öz vətənlərində "soyqırım"larına uğrayardılar.
Qaraçı kimi bütün dünyaya səpələnmiş, müxtəlif dövlətlərin ərazisində kompakt halında yaşamış, varlanmış və sonra harınlayaraq həmin dövlətlərə ən çətin günlərdə xəyanət etmişlər.
Qardaş Türkiyə dediklərimizə misaldır!
Türkiyə ərazisində rahat yaşayaraq şellənən haylar müharibə başlayan kimi fitnəyə uyaraq türklərə arxadan bıçaq sapladılar, xəyanət əməlləri törətdilər.
Türk dövləti də öz təhlükəsizliyini təmin etmək üçün onları həmin ərazilərdən kütləvi şəkildə köçürdü.
Ermənilər isə bunun adını "soyqırımı" qoydular!
Amma ortada "soyqırımı"nı təsdiq edən bir sənəd, tarixi fakt yoxdur!
Türkiyə öz arxivlərini açaraq ermənilərdən də bunu, birgə araşdırmaları tələb edir.
Arxivlərdə "soyqırımı"na dəlalət edən heç bir sənədin olmadığını yaxşı bilən haylar açıq araşdırmalardan daim boyun qaçırırlar.
Dünya erməniliyi isə bu əfsanə üzərində "biznes" qurub.
Bir çox dövlətdə yaradılan erməni diasporları müntəzəm şəkildə "soyqırımını tanıtmaq" adı ilə pul toplayırlar.
Həmin pullardan diaspor liderləri və Ermənistanın rəhbərləri bəhrələnməklə yanaşı, müxtəlif ölkələrin siyasi xadimlərinin, parlament üzvlərinin satın alınmasında, erməni diasporuna sərf edən qərar, qətnamə və digər saxta sənədlərin qəbul olunmasında istifadə edilir.
Digər tərəfdən isə haylar özlərini daim "məzlum", "fağır", "zavallı", "soyqırımına uğramış xalq" kimi təqdim etməklə yırtıcı simalarını bu pərdə altında gizlədirlər.
Bunu Xocalıda, Qaradağlıda, Ballıcada, Başlıbeldə törətdikləri soyqırımları da təsdiq edir.
Otuzillik işğal dövründə Qarabağda erməni vandallığı və vəhşiliklərinə isə bütün dünya şahid oldu.
"Məzlum" maskası cırılanda altındakı yırtıcı xislət və əməllər üzə çıxdı.
***
İkinci Qarabağ müharibəsində Ermənistana heç kim və heç nə kömək edə bilmədi!
"Məğlubedilməz xalq", "məğlubedilməz ordu" 44 gün ərzində yerlə yeksan edilərək biabırçı məğlubiyyətə uğradıldı!
Müzəffər Ali Baş Komandan İlham Əliyev "dəmir yumruğ"u ilə düşməni diz çökdürdü, ona kapitulyasiya aktını imzalatdırdı, Ağdam, Laçın və Kəlbəcər rayonlarını bir güllə atılmadan geri qaytardı, işğal altındakı torpaqlara azadlıq gətirdi!
Məğlubiyyətlə barışmaq istəməyən ermənilər müdafiəçilərinə arxalanaraq xam xəyallara düşdülər, üçtərəfli Bəyanatın bəzən mühüm bəndlərini yerinə yetirmək istəmədilər.
"Dəmir yumruq" yenidən işə düşdü!
Unikal əməliyyat keçirilərək Həkəri çayı üzərindəki post alındı, beləliklə, şər yoluna çevrilən Laçın qapısı əbədilik qapandı!
Daha sonra cəmi 23 saat çəkən antiterror tədbirləri nəticəsində Azərbaycanın dövlət suverenliyi və konstitusiya əsasları bərpa olundu!
Azərbaycan hərb meydanında qazandığı zəfəri diplomatiya və siyasət sahəsində atdığı qətiyyətli addımlarla davam etdirdi:
* Qalib tərəf olsa da, özü sülh şərtlərini hazırlayaraq sülh təşəbbüsünü irəli sürdü;
* Vasitəçilərdən imtina edərək ikitərəfli danışıqlara üstünlük verdi;
* İşğalda qalmış bir neçə kəndi dinc yolla geriyə qaytararaq delimitasiya və demarkasiya prosesinə başladı;
* 8 avqust 2025-ci ildə ABŞ Prezidenti D.Trampın iştirakı ilə Vaşinqtonda keçirilən ikitərəfli görüşdə Azərbaycanla Ermənistan arasında sülh sazişinin layihəsi paraflandı.
* TRIPP marşrutunun (Zəngəzur dəhlizinin) açılması barədə razılıq əldə olundu;
* Qarabağ münaqişəsinin həllində buxova çevrilən ATƏT-in Minsk qrupu tarixin arxivinə verildi;
* N.Paşinyan Ermənistan Konstitusiyasında tələb olunan dəyişikliyin referendum yolu ilə aradan qaldırılacağı barədə öz üzərinə öhdəlik götürdü.
Bütün bunlar Ermənistanın və onun havadarlarının ürəyincə olmasa da, cənab İlham Əliyev məcburən etdirdi!
Separatizmdən əziyyət çəkən dünyanın bir sıra siyasi liderlərinə həm də siyasət və diplomatiya dərsləri verdi.
***
"Qarabağ Ermənistandır və nöqtə" deyən Paşinyan bu gün sülh uğrunda ən fəal şəkildə çalışanlardan biridir!
* Çünki "dəmir yumruğ"un qüdrətini gördü!
* Çünki təkcə hərb meydanında deyil, siyasət, diplomatiya və informasiya cəbhəsində də yerlə yeksan edildi!
* Çünki başa düşdü ki, mifik "böyük Ermənistan" uğrunda sərsəm mübarizələrindən əl çəkməsələr, real Ermənistanı da itirəcəklər.
* Çünki əyani şəkildə anladı ki, özündən güclü dövlətlərə qarşı ərazi iddiaları irəli sürməsi səfehlikdir.
* Çünki gördü ki, elə hayların özü üçün də blokadadan çıxaraq əməkdaşlığa başlamaq daha faydalıdır.
Ancaq hələ də Ermənistanda ağıllanmayan siyasətçilər və vəzifələrini, çirkli pul qazanmaq imkanlarını itirmiş sərsəm düşüncə sahibləri var.
Onlar revanşizmdən dəm vurur, qisasçılıq niyyəti ilə seçkilərə qoşulur, Paşinyanı xəyanətdə ittiham edərək erməni xalqının qözünə kül üfürürlər.
Ordularının darmadağın edildiyini, özlərinin biabırçı şəkildə məğlubiyyətə uğradıldıqlarını, havadarlarının belə heç bir kömək göstərə bilmədiyini unudanlar, özlərindən xəbərsizlər hərdən hədlərini aşaraq bizi hədələyirlər də.
"Axmaq baş sahibinə qapaz yedizdirər" demişlər!
Deyəsən, "dəmir yumruğ"un "dəmir qapazları"nı unudanlar var!
2020-ci ilin 8 noyabrından elə də çox vaxt keçməyib!
Azərbaycan əsgərinin Şuşanı yalın əllə, yalnız əsgər xəncəri və lopatkası ilə aldığını haylar heç zaman yaddan çıxarmasınlar!
Çünki yaddaşsızlıq insanın başına yeni bəlalar gətirir.
Erməni xalqı isə özü varlanaraq erməni gənclərini qurbana çevirən, "miatsum" ideyası ilə otuz ildə xalqa məşəqqətlər yaşadan, sonda hər şeydən məhrum edən başabəla liderlərinin, sabiq prezidentlərinin əməllərini unutmamalıdır.
Seçkiyə gedənlər səsvermə qutusuna yaxınlaşanda geriyə boylansınlar, eşitdiklərinə yox, gördüklərinə inansınlar, başlarına gələnlərdən bu dəfə doğru və ağıllı nəticə çıxarsınlar!
***
Ermənistanın hazırkı rəhbəri də bir zamanlar hakimiyyətə təzə gələndə lovğalıqla "Qarabağ Ermənistandır və nöqtə" deyərək artıq məsələnin tamamilə həll olunduğunu güman edirdi.
Elə bilirdi ki, aldıqları torpaqlar daha əbədilik onlarındır.
Lakin Azərbaycan Prezidenti cənab İlham Əliyev onun cavabını verdi!
Əvvəlcə sözlə!
Beynəlxalq konfransların tribunasından açıq şəkildə bəyan etdi:
"Qarabağ Azərbaycandır və nida işarəsi".
Sonra Paşinyanla debatda Qarabağın kimlər tərəfindən, nə vaxt və necə yaradıldığını tarixi faktlarla söylədi!
Ən nəhayət, müharibədə, döyüş meydanında kimin kim olduğunu əyani şəkildə sübuta yetirdi!
Nəticədə Paşinyan hər şeyi dərindən və olduğu kimi başa düşdü.
* Başa düşdü ki, Qarabağ əzəli və əbədi Azərbaycan torpağıdır!
* Başa düşdü ki, artıq kimlərəsə güvənməyin vaxtı keçib!
* Başa düşdü ki, Azərbaycan Ermənistandan dəfələrlə və bütün parametrlər üzrə güclüdür!
* Başa düşdü ki, Azərbaycana hərb meydanında qalib gəlmələri daha mümkün deyil!
Ən əsası, başa düşdü ki, əgər mifik "böyük Ermənistan"ın xəyalını etsələr, real Ermənistanı da itirə bilərlər!
Odur ki, tamamilə ağıllandı, illüziyalardan tam uzaqlaşdı.
* Bu gün Paşinyan Azərbaycanın sülh şərtlərini, ABŞ-də D.Trampın iştirakı ilə paraflanmış sülh sazişini qəbul və icra edir.
Odur ki, Paşinyan Ermənistanı otuz ildən çox davam edən blokadadan çıxarır.
* Bu gün Paşinyan Azərbaycandan benzin, yanacaq alır.
* Bu gün Rusiyadan və Ukraynadan Ermənistana göndərilən taxıl və digər mallar Azərbaycan ərazisindən daşınır.
Paşinyan həm də Trampın adını daşıyan və Orta dəhlizin əsas elementlərindən biri sayılan Zəngəzur dəhlizinin (TRIPP) işə salınmasına çalışır.
Paşinyan həm də Yerablurun genişlənməsini istəmir.
Əgər 7 iyun seçkilərində Paşinyan deyil, özgə birisi qalib gəlsə, hər şey təzədən başlaya bilər.
MƏSƏLƏN:
* Ermənistan yenidən blokadaya salınar;
* Əhali yenidən yoxsullaşaraq ölkəni tərk edər;
* Revanşistlər hakimiyyətə gələcəkləri halda yenidən xalqı soyaraq çox varlanarlar;
* Yenidən müharibəyə başlasalar, Yerablur qat-qat genişlənər;
* Erməni anaları oğulsuz, gözü yaşlı qalar;
* Ən nəhayət, real Ermənistan dövləti də yox ola bilər!
Seçim erməni xalqınındır...
Bir neçə dəfə səhv edərək, ter-petrosyanlara, koçaryanlara, sarkisyanlara, ohanyanlara etibar edərək başı daşdan-daşa dəyən erməni xalqının.
"Dəmir yumruq" hazır vəziyyətdədir!
Müzəffər Ali Baş Komandan İlham Əliyev isə daim dediklərinə bütün dəqiqliyi ilə əməl edəndir!
Kiməsə, nəyəsə arxayın olmağın zamanı keçib.
Bir dəfə batdığınız palçığa yenidən girməkdən çəkinin.
Nağıllara inananların aqibəti heç də yaxşı olmur.
Bəxtiyar SADIQOV
