Ukrayna NATO-nun 5-ci maddəsinə əsaslanan təhlükəsizlik zəmanətlərinin praktikada necə işləyəcəyini dəqiq başa düşmür. Söhbət, xüsusilə, ölkə ərazisində xarici qoşunların mümkün yerləşdirilməsindən və Rusiyanın təkrar təcavüzü halında müttəfiqlərin hansı cavab tədbirlərini görəcəyindən gedir.
AZƏRTAC-ın məlumatına görə, bunu Ukrayna Prezidenti Volodimir Zelenski Berlində keçirilən mətbuat konfransında bildirib.
Zelenski qeyd edib ki, ABŞ tərəfi Avropa tərəfdaşları ilə birlikdə Ukraynaya NATO-nun 5-ci maddəsinə əsaslanan təhlükəsizlik zəmanətləri təklif etməyə hazırdır. Lakin hələlik tərəflər bu zəmanətlərin praktikada hansı mexanizmlə həyata keçiriləcəyi barədə ortaq mövqeyə malik deyillər.
“Hamımızın 5-ci maddə ilə bağlı eyni anlayışı bölüşdüyümüzə əmin deyiləm”, – deyə Zelenski bildirib.
Dövlət başçısı izah edib ki, onun nəzərdə tutduğu təhlükəsizlik zəmanətlərinin elementlərindən biri tərəfdaş ölkələrin hərbi qüvvələrinin Ukrayna ərazisində yerləşdirilməsidir. O, xüsusilə ABŞ hərbi qüvvələrinin və bazalarının mümkün yerləşdirilməsi məsələsinə toxunub.
“Mən nə bunun lehinəyəm, nə də əleyhinə. Əlbəttə, amerikalı tərəfdaşlarımız öz hərbi qüvvələrinə etibar edərək, Yaxın Şərqdə olduğu kimi, Ukraynada da hərbi bazalar yaratsaydılar, biz buna məmnun olardıq. Yeri gəlmişkən, həmin regiondakı ölkələr NATO üzvü deyillər. Lakin orada müəyyən hərbi bazalar mövcuddur”, – deyə Prezident qeyd edib.
Zelenskinin sözlərinə görə, Ukrayna tərəfdaşlarının mümkün təcavüzə hansı formada cavab verəcəyini əvvəlcədən dəqiq bilməlidir.
Ukrayna Prezidenti, həmçinin ölkəsinin NATO-ya üzv olmadan 5-ci maddəyə bənzər təhlükəsizlik zəmanətlərinin necə işləyəcəyinə dair ətraflı izahatlara ehtiyac duyduğunu vurğulayıb.
“Yaxşı, 5-ci maddə, amma NATO olmadan. Bunun nə demək olduğunu bizə izah edin”, – deyə Zelenski bildirib.
Xatırladaq ki, bu gün ABŞ Prezidentinin xüsusi nümayəndəsi Cared Kuşner Rusiyanın NATO-nun 5-ci maddəsinə bənzər təhlükəsizlik zəmanətlərinin Ukraynaya verilməsi konsepsiyasına razılıq verdiyini açıqlayıb.