O, dünyaya payız ətirli bir gündə - 1990-cı il oktyabrın 1-də Şirvan şəhərində göz açıb. Gəlişi ilə doğmalarının gözündə təbiətin payızını bahara çevirib. O vaxtdan hər ilin oktyabr ayında Həsənovlar ailəsi Həsənin ad gününü sevinclə, fərəhlə qarşılayıb.
Həsən Həsənovun uşaqlıq illəri Vətənin ağır illərinə təsadüf edib. O dövrdə Azərbaycanın Qarabağ və Şərqi Zəngəzur bölgələri erməni quldurlarının hücumlarına məruz qalıb. Onda da mərd, igid övladları Vətən torpaqlarının işğalına, soydaşlarına düşmənin işgəncələr verməsinə dözməyiblər. Yağılarla mübarizəyə qalxıblar.
O zaman müstəqilliyinə yeni qovuşan respublikamız iqtisadi tənəzzüllə üzləşmiş, hələ ordusunu formalaşdırmağa macal tapmamışdı. Xarici havadarlarından hər cür yardım alan, silahlandırılan Ermənistan 1990-cı illərdə Azərbaycan ərazilərinin iyirmi faizini işğal edərək uzun illər əsarət altında saxlaya bilib.
Qəhrəmanlar yurdu Azərbaycanda o illərdə də Vətənə sevgi və təəssübkeşlik ruhunda mərd övladlar böyüyüb. Həsən Rəhim oğlu Həsənov da onlardan biri olub. O, 1997-2008-ci illərdə Şirvan şəhər 2 saylı tam orta məktəbdə təhsil alıb.
Həsən Həsənov 2008-2010-cu illərdə Azərbaycan Silahlı Qüvvələrinin Füzuli rayonunda yerləşən "N" hərbi hissəsində müddətli həqiqi hərbi xidmətdə olub. 2017-ci ildən isə Abşeron rayonunda yerləşən "N" hərbi hissədə müddətdən artıq həqiqi hərbi xidmət qulluqçusu olaraq xidmət edib.
Həsən məsuliyyətli, xeyirxah, doğruluğu sevən, mehriban gənc kimi hər yerdə özünə hörmət qazanmağı, sevdirməyi bacarıb. Ona inanıb, güvəniblər. Biliblər ki, heç vaxt ədalət duyğusunu itirməz, haqsızın tərəfində dayanmaz.
Ailəsinə, dostlarına çox bağlı olub. Vətənə sədaqətlə xidmət edib. Azərbaycanın işğal altında qalmış Qarabağ və Şərqi Zəngəzur ərazilərinin yağıların tapdağından xilası onun ən böyük arzusu, amalı olub.
2020-ci il sentyabrın 27-də işğalçı Ermənistanın silahlı qüvvələrinin Azərbaycana qarşı növbəti təxribatı səbəbindən İkinci Qarabağ müharibəsi başlayıb. Müharibənin ilk günündən Azərbaycan Ordusunun çavuşu Həsən Həsənov da ön sıralarda yer alıb. Otuz ilə yaxın düşmən işğalı altında qalmış Qarabağ və Şərqi Zəngəzurun azadlığı uğrunda gedən şiddətli döyüşlərdə o da cəsarətlə vuruşub, rəşadət göstərib.
Hər ilin oktyabr ayını Həsənovlar ailəsi Həsənin ad günü sevinci ilə, bayram əhvali-ruhiyyəsi ilə qarşılayırdı. 2020-ci ilin oktyabrı əvvəlki illərə bənzəməyib. Ata-anası, həyat yoldaşı nigaranlıq, həyəcan içində ön cəbhədən xəbər gözləyiblər. Həsənin iki kiçik oğlunu bağırlarına basıb düşmənlə ölüm-dirim savaşında qəhrəmanlıq nümunəsi göstərən bütün cəsur Azərbaycan övladlarına qələbələr arzulayıblar.
Oktyabrın 2-də Füzuli istiqamətində cəbhənin yarılmasında və düşmənə ağır zərbələr endirilməsində qəhrəmanlığı ilə seçilən igid çavuş Həsən Həsənov şəhid olub. Şirvan şəhər Şəhidlər xiyabanında dəfn edilib.
Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi uğrunda gedən ağır döyüşlərdə göstərdiyi şücaətə görə, müddətdən artıq həqiqi hərbi xidmət qulluqçusu Həsən Həsənov ölümündən sonra "Vətən uğrunda" və "Füzulinin azad olunmasına görə" medalları ilə təltif edilib.
Otuz yaşında şəhidlik zirvəsinə ucalan Həsən Həsənovun ömrü yarımçıq qalsa da, Vətən sevgisi, mərdliyi, insanlığı ilə yaddaşlarda əbədi iz qoyub. O, ömrünün ən gözəl çağlarını Vətənə xidmətə həsr edib. Azərbaycanın ərazi bütövlüyü uğrunda döyüşərək canından keçib. Bu gün Həsən kimi qəhrəman oğulların həyatı, döyüş yolu, göstərdikləri qəhrəmanlıqlarla yalnız doğmaları, dostları yox, bütün Azərbaycan xalqı qürur duyur.
Zöhrə FƏRƏCOVA,
"Azərbaycan"
