Prezident İlham Əliyev yeni dövlətçilik gündəliyinin müəyyənləşdirilməsi ilə bağlı vacib mesajlar verdi

 Prezident İlham Əliyevin Yeni Azərbaycan Partiyasının VIII Qurultayındakı çıxışında Azərbaycanın əldə etdiyi strateji nəticələr, həm də dəyişən beynəlxalq mühitdə qarşıda duran vəzifələr bir daha bəyan olundu.  Bu, eyni zamanda, son otuz ildən artıq müddətin siyasi yekunlarına verilən qiymət idi. Dövlət başçımız xüsusilə Zəfərdən sonrakı mərhələnin və yeni dövlətçilik gündəliyinin müəyyənləşdirilməsi ilə bağlı vacib mesajlar verdi.

Milli Məclisin deputatı Könül Nurullayeva qəzetimizə açıqlamasında deyib ki, Prezident İlham Əliyev 2003-cü ildə prezident seçilərkən qarşıya qoyulan əsas vəzifələrdən birinin Azərbaycanın ərazi bütövlüyünün və suverenliyinin bərpası olduğunu xatırladaraq, bu məqsədə nail olunduğunu bəyan etdi: "Dövlət başçısı bildirdi ki, uzun illər Azərbaycanın siyasi gündəliyində xüsusi yer tutan ərazi bütövlüyü məsələsinin artıq yeni reallıqda qiymətləndirilməsi üçün zəmin yaranıb. Belə ki, 44 günlük müharibədə əldə etdiyimiz Zəfər yeni mərhələnin başlanğıcıdır. Əsas məsələ budur ki, İkinci Qarabağ müharibəsindəki Zəfərimizdən bu günə qədər bu reallıqlar bütün dünya tərəfindən qəbul edilir. Təbii ki, bu, asan başa gəlməyib. Prezident İlham Əliyevin də bəyan etdiyi kimi, bu illər ərzində çox ciddi müqavimətlə üzləşmişdik. Azərbaycana qarşı istiqamətlənmiş yalan, iftira dolu kampaniyalarla üzləşmişdik. Bizə qarşı sanksiyaların tətbiq edilməsi məsələsini bəzi ölkələr ciddi müzakirə edirdi. Ancaq bizim qətiyyətimiz, dönməz fəaliyyətimiz, siyasi addımlarımız və ilk növbədə, Azərbaycan xalqının vahid mövqedə olması bütün bu bəd niyyətləri alt-üst etmişdir".

Deputat qeyd edib ki, ərazi bütövlüyü və suverenliyin bərpası ilə yeni vəzifələr yaranıb. Qarabağ və Şərqi Zəngəzurun bərpası, keçmiş məcburi köçkünlərin qayıdışı, regionun iqtisadi potensialının reallaşdırılması, Azərbaycanın nəqliyyat və enerji layihələrində rolunun artırılması bu yeni mərhələnin mühüm istiqamətlərini təşkil edir.

K.Nurullayeva vurğulayıb ki, Prezidentin çıxışında digər mühüm istiqamət milli təhlükəsizlik və hərbi gücün davamlı şəkildə möhkəmləndirilməsi ilə bağlı idi: "Dövlət başçısı qarşıda duran əsas vəzifələrdən birinin hərbi gücün artırılması olduğunu bildirdi. Xüsusilə dəyişkən beynəlxalq təhlükəsizlik mühiti fonunda bu mesaj xüsusi əhəmiyyət kəsb edir.  Dövlət başçımızın da söylədiyi kimi, perimetr üzrə bizim ətrafımızda müharibələr, toqquşmalar davam edir və bu müharibələrin dayandırılması üçün heç bir beynəlxalq mexanizm yoxdur və yəqin ki, olmayacaq. Çünki beynəlxalq hüquq tamamilə sıradan çıxıb. Ona əhəmiyyət verənlərin sayı kəskin azalır. Ona görə biz hər gün hazır olmalıyıq ki, istənilən hərbi təxribata cavab verək. Elə güc əldə etməliyik və bunu əldə edirik ki, heç kimin ağlına belə gəlməsin Azərbaycana qarşı hansısa təxribat törətmək. Bu xüsusda yeni mərhələ yeni məsuliyyət tələb edir. Ərazi bütövlüyü və suverenlik bərpa edildikdən sonra qarşıda daha güclü iqtisadiyyat, daha dayanıqlı təhlükəsizlik sistemi, daha fəal xarici siyasət və yeni regional əməkdaşlıq imkanları üzərində qurulan inkişaf gündəliyi dayanır".

Deputat dövlət başçısının, həmçinin ideoloji risklərin sərhəd tanımadığını da bəyan etdiyini xatırladıb: ""İdeoloji risklər sərhəd tanımır, xüsusilə indiki dünyada, internet dünyasında, kiberhücumlar dünyasında, süni intellekt dünyasında. Ona görə biz özümüzü ideoloji təxribatlardan qorumalıyıq” deyən Prezident İlham Əliyev diqqəti müasir dövrdə təhlükəsizlik anlayışının transformasiyasına yönəltdi. Bu günün reallığı ondan ibarətdir ki, XXI əsrdə dövlətin sərhədini qorumaq qədər, onun vətəndaşının düşüncə müstəqilliyini, informasiya təhlükəsizliyini və milli kimliyini qorumaq da strateji əhəmiyyət daşıyır. Bu mübarizənin ən güclü vasitələri isə keyfiyyətli təhsil, sağlam informasiya mühiti, milli dəyərlərə bağlılıq və müasir texnologiyalardan məsuliyyətli istifadədir".

Əsmər QARDAŞXANOVA,

" Azərbaycan"