Qazaxda meyvə yığımı davam edir
Mayın 25-də Prezident İlham Əliyevin sədrliyi ilə aqrar məsələlərə həsr olunan müşavirənin keçirilməsi, həmçinin "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın təsdiq edilməsi və bundan irəli gələn bəzi məsələlərin tənzimlənməsi haqqında Prezidentin sərəncamı bir daha onu göstərir ki, respublikamızda kənd təsərrüfatının inkişafı dövlət siyasətinin prioritet istiqamətlərindən biri olaraq qalır.
Söz yox ki, dövlət başçısının rəhbərliyi ilə kənd təsərrüfatının inkişafı istiqamətində indiyəcən həyata keçirilən tədbirlər nəticəsiz qalmayıb. Bu da səbəbsiz deyil. Dövlət tərəfindən sahibkarlara, kəndli fermerlərə verilən dəstək ölkə iqtisadiyyatında böyük pay sahibi olan kənd təsərrüfatının inkişafına öz töhfəsini verir. Kənd təsərrüfatı neft sənayesi və tikinti sektorundan sonra ölkə iqtisadiyyatında üçüncü böyük sahə olduğu üçün bu sektor həm də işsizliyin aradan qaldırılmasında və əhalinin sosial vəziyyətinin yaxşılaşmasında mühüm rol oynayır.
Son illər kənd təsərrüfatının digər sahələri kimi meyvəçiliyin inkişafına da diqqətlə yanaşılır. Bu baxımdan Qazax rayonunda bir sıra tədbirlər həyata keçirilir. Bunun nəticəsidir ki, rayonda aqrar sahənin inkişafında meyvəçilik əsas yerlərdən birini tutur. Qazaxda hər il meyvə bağlarının sahəsi genişləndirilir.
Təəssüf ki, əvvəlki illərdən fərqli olaraq bu il hava şəraiti meyvəçilik üçün o qədər də əlverişli keçmir. Aramsız yağan yağışlar, güclü küləklər bağlara xeyli ziyan vurur. Buna baxmayaraq, qazaxlı bağbanlar bütün qüvvələri səfərbərliyə alaraq məhsul itkisini azaltmaq üçün əllərindən gələni əsirgəmirlər. Rayonun Xanlıqlar və Çaylı kəndlərində ərik, gilas, xurma, şaftalı olmaqla ümumilikdə 33 hektarda meyvə bağı salınıb. Gilas yığımı artıq başa çatıb. Ərik yığımı isə davam edlr. Məhsul yığımında hər iki kənddən ümumilikdə 50 nəfər iştirak edir.
Sabir ƏLİYEV,
"Azərbaycan"
677jpg_1781134810.jpg)
 - Copyjpg_1781649389.jpg)
