ABŞ-də daimi yaşamaq və işləmək imkanı qazandıran Green Card lotereyasında iştirak etmək istəyənlər yenidən gözləməli olacaqlar. 2027-ci maliyyə ili üzrə (DV-2027) lotereyanın qeydiyyatının noyabrın 1-də başlanması gözlənilsə də, ABŞ-də apellyasiya məhkəməsinin son qərarı bu planı yenidən qeyri-müəyyən edib.
Xatırladaq ki, Green Card ABŞ-də daimi rezident statusunu təsdiq edən sənəddir. Bu statusun sahibləri ABŞ-də daimi yaşamaq və işləmək, qanunvericiliklə nəzərdə tutulan sosial hüquqlardan istifadə etmək, müəyyən şərtlər yerinə yetirildikdə isə gələcəkdə ABŞ vətəndaşlığına müraciət etmək imkanı əldə edirlər.
Məlumata görə, ABŞ-nin Kaliforniya ştatındakı federal məhkəmə oktyabrın 14-də Dövlət Departamentinə lotereyanın bərpası barədə göstəriş verib. Qərara əsasən, qeydiyyat müddəti barədə məlumat oktyabrın 29-dək açıqlanmalı, müraciətlərin qəbulu isə noyabrın 1-dən başlamalı idi.
Lakin Tramp administrasiyası qərardan apellyasiya şikayəti verib. Oktyabrın 29-da ABŞ-nin Doqquzuncu Dairə Apellyasiya Məhkəməsi hökumətin müraciətini təmin edərək aşağı instansiya məhkəməsinin qərarının icrasını müvəqqəti dayandırıb. Məhkəmə bu qərarı iddiaçı tərəfin belə bir işi qaldırmaq üçün hüquqi əsasının yetərli olmaması ilə əsaslandırıb. Bununla belə, hakimlər Dövlət Departamentinin lotereyanı açmamasını dəstəklədiklərini bildirməyiblər.
Beləliklə, DV-2027 üzrə qeydiyyatın başlanma tarixi hələ açıqlanmayıb və müraciətlərin qəbulu hazırda mümkün deyil.
Diversity Visa (DV) proqramı ABŞ-yə immiqrasiya səviyyəsi aşağı olan ölkələrin vətəndaşları üçün nəzərdə tutulub. Proqram çərçivəsində hər il 55 minədək immiqrasiya vizasının verilməsi nəzərdə tutulur. Lotereyada seçilmək isə avtomatik olaraq Green Card almaq demək deyil. Seçilən şəxslər viza üçün müraciət etməli, tələb olunan sənədləri təqdim etməli və müvafiq yoxlamalardan keçməlidirlər.
Qeyd edək ki, DV-2026 lotereyasının nəticələri artıq elan edilib. Növbəti mərhələ olan DV-2027 üzrə isə qeydiyyat tarixləri və iştirak şərtləri ilə bağlı ABŞ Dövlət Departamentinin rəsmi açıqlaması gözlənilir.
Lotereyada iştirak etmək istəyənlərə saxta qeydiyyat səhifələrinə və ödəniş müqabilində qaliblik vəd edən vasitəçilərə qarşı diqqətli olmaq tövsiyə olunur. Rəsmi məlumatlar ABŞ Dövlət Departamentinin dvprogram.state.gov portalında yerləşdirilir.
Züleyxa ƏLİYEVA,
“Azərbaycan”
jpg_1793364534.jpg)
