Dünya o zaman cənnət olar ki, onu varlığın qədər sevib, gülüstana çevrilməsi üçün əlindən gələni əsirgəməyəsən. Vətənin gözəlliyini, əvəzolunmazlığını dərk edənlər daha çox vətənpərvər olurlar. Cəmiyyət də məhz belə insanların dünyagörüşündən çox bəhrələnir.
Müstəqilliyini bərpa etdikdən sonra Azərbaycan Respublikası vətəndaşlarının sosial müdafiəsinin gücləndirilməsi istiqamətində qanunlar qəbul edildi. Uzun illər bu sahədə mövcud olmuş problemlərin həllində dövlət strukturları ilə yanaşı, qeyri-hökumət təşkilatlarının da üzərinə böyük işlər düşdü. Respublikanın paytaxtında fəaliyyət göstərən belə qurumların sayı artdıqca, qeyri-hökumət təşkilatlarına dövlət dəstəyi gücləndikcə onların fəaliyyəti özünü daha qabarıq göstərməyə başladı.
Maraqlıdır, inkişaf sürətinə görə paytaxt Bakıdan heç də geri qalmayan regionlarda bu sahədə vəziyyət necədir? Bunun üçün Ağsu şəhərində 2005-ci ilin avqust ayından fəaliyyət göstərən "GÜLSAM" Əlillərin Reabilitasiyası İctimai Birliyində həyata keçirilən tədbirlərə nəzər salmaqla fikrimizə aydınlıq gətirmək istədik. 200 nəfərdən çox üzvü olan "GÜLSAM"ın rəhbəri Gülnarə Səlimova bizimlə söhbətində yalnız təşkilatın fəaliyyətindən deyil, eyni zamanda onlara daim dəstək olanlardan, əlillərin cəmiyyətə inteqrasiyasında mühüm tədbirlərin görülməsində yardımçı olanlardan söz açdı: "1978-ci ildə Ağsu şəhərində anadan olandan əliləm. Əl arabası ilə hərəkət edirəm. Orta məktəbə gedə bilmədiyimdən ev şəraitində oxumuşam. Qardaşım Samir də mənim kimi əlildir. Fərdi qaydada kompyuterdən istifadə etməklə fikirlərimi məni oxuyanların, o cümlədən indi fəaliyyət göstərən, əlilliyi olmayanların belə maraqlarını təmin edən "GÜLSAM" Əlillərin Reabilitasiyası İctimai Birliyinin yaradılmasına nail oldum. Model şəkilləri çəkdim, çeşidli tikmələr tikdim, hörmələr hördüm. Əl işlərimdən ibarət sərgilər açdım. Əlil insanların bu işlərə maraqlarını öyrəndim və fəaliyyətimi artırdım. 2005-ci ildə əlillər üçün evimizdə dərnək yaratdım. Həmin ilin avqust ayında "GÜLSAM" Ədliyyə Nazirliyində qeydiyyata alındı."GÜLSAM" əlillərin və onların ailələrinin problemlərinin həlli, əlil uşaqların məktəbə getmələrini təşkil etmək üçün bütün imkanlardan yararlandı. Bu təşkilat vasitəsilə neçə-neçə əlil uşaqların qapılıb qaldığı evdən çıxmasına nail olduq". Gülnarə Səlimova onu da xüsusi olaraq qeyd etdi ki, təşkilat respublika daxilində neçə-neçə əlili müalicəyə göndərib. Kiməsə, nəyəsə möhtac olmasınlar deyə, kompyuter kursu açıb. Ötən illər ərzində bir çox kurslar təşkil edib.
2010-2011-ci illərdə ictimai birlik Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən qalib elan edilib. Dövlət və hökumət tərəfindən dəstək görən qurum yenidən daha iki layihənin təsdiqinə nail olub.
Ağacavad Cavadovun, Təbrizli Amilin, Elnur Eldarovun, Dilarə Zamanovanın, Tahir Səlimovun, Müşfiq Nadirovun, Tural Qədirovun, Qorxmaz Qarabağlının, Güldəstə Əliyevanın və digər birlik üzvlərinin cəmiyyətə inteqrasiyası istiqamətində bir sıra məqsədyönlü tədbirlər həyata keçirilib. Burada öz üzərində çalışan 14 əlil uşaq və böyüklər məktəbə götürülüb. Vərdişlərə yiyələnmək istəyən əlillər 3 aylıq kurs keçib sertifikatla təmin edilirlər.
2011-ci ildə birlik Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən qəbul edilən layihə əsasında əlillərin sosial vəziyyətini yaxşılaşdırmaq üçün kredit götürməyə, ferma açmağa nail olub. Həmin layihə daha 4 nəfər əlilin işlə təminatına əsas yaradıb. Həmin il qəbul olunan ikinci layihə ilə əlilliyi olmayanlar üçün ödənişli kompyuter kursları təşkil edilib ki, bundan gələn gəlirlə kiçik tikiş fabriki açılıb. Həmin istehsal sahəsində 2 şəhid ailəsi və bir nəfər əlil qazi işlə təmin edilib.
Gülnarə Səlimovadakı nikbinlik, həyat eşqi, qurub-yaratmaq istəyi çoxuna nümunə olacaq dərəcəsindədir: "Əlillərin özləri bir çox imkanlara sahib ola bilərlər. Ən azı, ələbaxımlılıq kimi dəhşətli mərəzdən xilas olar, özlərini cəmiyyətdən təcrid etməz, problemlərinin həllində özlərinə güvənərlər. Bir sıra ictimai təşkilatlar, həmçinin sənət adamları təşkilatımızın üzvlərini ziyarət edir, qurumun fəaliyyətinin ürəkaçan olduğunu KİV-lər vasitəsilə ictimaiyyətin diqqətinə çatdırırlar. Xalq artisti Səkinə İsmayılovanın müqəddəs Ramazan bayramı günlərində mətbuat işçiləri və incəsənət nümayəndələri ilə qonağımız olması bir daha onların hərəkətləri məhdud insanlara göstərdikləri qayğının bariz nümunəsidir".
Bu il mayın 26-da "Eurovision-2012" musiqi yarışması ilə əlaqədar Hemofiliyalı Xəstələrin Respublika Assosiasiyası, Əlil Qadınlar Cəmiyyəti, Əlil Təşkilatları İttifaqı "GÜLSAM"ın üzvlərinin Bakıdakı Milli Parkda gəzintilərini təşkil edib. İyul ayının 11-də isə "GÜLSAM" Amerika Sülh Korpusu Tərəfindən təşkil edilən Gənc Qızlar Düşərgəsinə "Məqsədə Çatmaq" adlı təlimə dəvət olunub. "GÜLSAM"ın rəhbəri Gülnarə Səlimova orada Azərbaycanın bir neçə regionundan gəlmiş gənc xanımlara qazandığı nailiyyətlərdən və qarşıya qoyulmuş məqsədlərindən bəhs edib.
Əlillər cəmiyyətin yararlı üzvlərinə çevrilmək üçün potensial imkanlarından istifadə edir və daim insanlardan ən azı mənəvi dəstək gözləyirlər. Onların gözlərini yollardan yığmaq isə hər kəsin vətəndaşlıq borcudur. Onda belə insanların qapıları da açılar, eyinləri də.
Məhəmməd NƏRİMANOĞLU,
"Azərbaycan"
677jpg_1781134810.jpg)
