Duqinin sayıqlamaları nəyə xidmət edir?

Müasir faşist ideologiyasının əsas ruporlarından olan, neoimperialist xəyalını gizlətməyən rusiyalı "tarixçi" Aleksandr Duqin növbəti dəfə Azərbaycanın və digər türk dövlətlərinin suverenliyini hədəf alan sərsəm bəyanatlarla gündəmə gəlib. Duqin  postsovet məkanında bir sıra dövlətlərin suverenliyinin legitim olmadığını iddia edib və bu ölkələrin müstəqil şəkildə mövcud olmamalarını bildirib. 

Onun sözlərinə görə, suveren Azərbaycan, Özbəkistan, Qazaxıstan, Tacikistan və Qırğızıstanın mövcudluğu qəbuledilməzdir. Duqin bu yanaşmanı özünün uzun illərdir təbliğ etdiyi imperialist "Avrasiyaçılıq" ideologiyası ilə əsaslandırmağa çalışıb. Rusiyanın sərsəm ideoloqu hesab edir ki, SSRİ-nin dağılmasından sonra yaranmış müstəqil dövlətlər "tarixi yanlışlıq"dır və bu ərazilər yenidən Rusiyanın geosiyasi təsir dairəsinə qaytarılmalıdır. Onun fikrincə, postsovet ölkələrinin suveren siyasət yürütməsi Rusiyanın "strateji təhlükəsizliyinə" təhdid yaradır. 

Özünü "Avrasiyaçılıq" pərdəsi altında gizlədən, əslində, açıq-aşkar şovinist və müstəmləkəçi düşüncəni təbliğ edən Duqinin açıqlamaları onun regiondakı yeni reallıqları həzm edə bilmədiyini və Azərbaycanın müstəqil iradəsinə qarşı qərəzini bir daha nümayiş etdirir. O, daha əvvəl də oxşar fikirlər səsləndirib, Ukraynanın dövlət kimi mövcudluğunu inkar edib və Rusiyanın hərbi ekspansiyasını ideoloji baxımdan əsaslandırmağa çalışıb. Duqinin ideyaları rəsmi Kremlin mövqeyi kimi qəbul edilməsə də, Rusiyanın siyasi-ictimai elitasında imperialist düşüncə tərzinin qalıqlarını bariz şəkildə ortalığa qoyur. Bu, Rusiyanın müəyyən dairələrində "revanşizm" xəstəliyinin virus kimi yayıldığını göstərir. Duqinkimilər də bu zərərli düşüncənin təzahürüdür. 

Duqinin sayıqlamaları Rusiya ilə Azərbaycan arasında imzalanmış "Azərbaycan Respublikası ilə Rusiya Federasiyası arasında müttəfiqlik qarşılıqlı fəaliyyəti haqqında Bəyannamə"nin ruhuna kökündən ziddir. Bu növ açıqlamalar iki ölkə arasındakı strateji tərəfdaşlığa kölgə salmaq məqsədi güdür. 

Dünyada yüksək hörmət və nüfuza sahib olan Azərbaycanın müstəqil dövlət kimi mövcudluğunu "qəbuledilməz" adlandırmaq bölgədəki mövcud status-kvoya tamamilə zidd olmaqla yanaşı, beynəlxalq hüququn prinsiplərinə də qarşı çıxmaqdır. Azərbaycan regionun müstəqil xarici siyasət yürüdən azad və suveren dövlətidir. Prezident İlham Əliyevin uzaqgörən siyasəti və uğurlu rəhbərliyi ilə 44 günlük Vətən müharibəsi, ardınca lokal xarakterli antiterror tədbirləri nəticəsində Azərbaycan suverenliyini və ərazi bütövlüyünü öz gücü ilə tam bərpa edib. Bu möhtəşəm tarixi zəfərlər Azərbaycanın regionda hərbi və siyasi iradəsinin, eləcə də tam müstəqil dövlətçilik gücünün ən bariz sübutudur. Məhz rəsmi Bakının yürütdüyü balanslaşdırılmış və milli maraqlara söykənən siyasəti Azərbaycanı regional və qlobal söz sahiblərindən birinə çevirib. Dünyanın super gücü sayılan ABŞ, o cümlədən Avropa İttifaqı və Çin Azərbaycanla yaxın əməkdaşlıq edir, ikitərəfli münasibətləri strateji tərəfdaşlıq səviyyəsinə yüksəldirlər. Duqinkimilər isə bu həqiqətlərə göz yumurlar.

Faşist tarixçinin Azərbaycanla paralel digər türk dövlətlərinin adını xüsusi vurğulaması da təsadüfi deyil. Bu, onun təbliğ etdiyi ideologiyanın "qarın ağrısı"dır. Son illərdə Azərbaycan və Türkiyənin təşəbbüsləri sayəsində Türk Dövlətləri Təşkilatının (TDT) beynəlxalq arenada çəkisinin artması, bu ölkələrin hərbi, iqtisadi və siyasi platformalarda bir araya gəlməsi Duqin kimi neoimperialistləri ciddi şəkildə narahat etməkdədir. Azərbaycanın həm türk dünyasında, həm də regionda artan nüfuzu, ələlxüsus Prezident İlham Əliyevin yürütdüyü tam müstəqil siyasət Duqinin "vassal dövlət" modelinə sığmır. Bu gün Azərbaycan bir çox ölkə üçün tam müstəqillik və suverenlik nümunəsidir. Görünür, Duqinkimilər də bu nümunənin yayılmasından qorxurlar.

Ümumiyyətlə, Azərbaycanın suverenliyi müzakirə mövzusu ola bilməz. Minlərlə azərbaycanlının qanı və canı bahasına qurulmuş müqəddəs müstəqilliyimiz cənab İlham Əliyevin güclü liderliyi, xalqımızın vəhdəti və şanlı ordumuzun gücü ilə möhürlənib. Duqinlərin sərsəm iddiaları Azərbaycanın regiondakı sarsılmaz mövqeyini və tam suveren dövlət statusunu dəyişə bilməz. Əksinə, bu cür açıqlamalar Azərbaycanın öz müstəqilliyini qorumaq üçün seçdiyi strateji yolun nə qədər doğru olduğunu bir daha sübut edir. Azərbaycan çoxdan öz yolunu seçib. Duqinin təbliğ etdiyi neoimperializm ideyası isə tarixin arxivinə gömülüb.  

İsmayıl QOCAYEV, 

"Azərbaycan"