Azərbaycan, Türkiyə və Özbəkistan Silahlı qüvvələrinin iştirakı ilə keçirilən “Birliyin Gücü-2026” birgə hərbi təlimi davam edir.
AZƏRTAC xəbər verir ki, sentyabrın 21-də başlayan və oktyabrın 1-dək davam edəcək təlimlər Əlahiddə Ümumqoşun Ordusunun Naxçıvan şəhərində yerləşən Qarabağlar Təlim Mərkəzində, Böyük Zirə adasında, Qaraheybət və Xocavənd rayonunun Qızılqaya təlim mərkəzlərində keçirilir.
Bu gün Xocavənd rayonunun Qızılqaya Təlim Mərkəzindəki media mərkəzində Azərbaycan Müdafiə Nazirliyinin Mətbuat və ictimaiyyətlə əlaqələr idarəsinin rəisi, mətbuat katibi polkovnik Anar Eyvazov təlimlərlə bağlı media nümayəndələrinə məlumat verib.
Qeyd edilib ki, Azərbaycan təlimdə ev sahibi, Türkiyə və Özbəkistan isə iştirakçı qismində yer alır.
İran, Qırğızıstan, Pakistan, Serbiya, Slovakiya, Tacikistan, Gürcüstan, Türkmənistan və Birləşmiş Ərəb Əmirlikləri isə təlimdə müşahidəçi qismində iştirak edir.
Hərbi təlimlərə 3 500-dən çox hərbi qulluqçu cəlb olunub. Təlimlərdə 130-dan çox pilotsuz uçuş aparatı, 70-dən çox zirehli texnika və 90-dan çox artilleriya sistemi iştirak edir. Bununla yanaşı, təlimlərə 20-dən çox aviasiya vasitəsi, 30-dan çox radioelektron mübarizə, radioelektron kəşfiyyat və radiolokasiya sistemi, 20-yə qədər hava hücumundan müdafiə vasitəsi, 10-a qədər mühəndis texnikası və 20-dən çox dəniz vasitəsi cəlb olunub.
Qızılqaya, Qarabağlar, Qaraheybət təlim mərkəzlərində və Böyük Zirə adasında keçirilən məşqlər zamanı hibrid və diversiya təhdidlərinə qarşı mübarizə, antiterror tədbirləri, qanunsuz silahlı qruplaşmaların zərərsizləşdirilməsi, dəniz sərhədlərinin mühafizəsi və aviasiya zərbələrinin endirilməsi üzrə tapşırıqlar icra olunur.
Üç mərhələdən ibarət olan təlimin ssenarisinə kiberhücum və dezinformasiyalara qarşı mübarizə, yaşayış məntəqələrinin təmizlənməsi, tibbi təxliyə, mina təmizlənməsi, həmçinin raket-artilleriya sistemləri və pilotsuz uçuş aparatlarının tətbiqi üzrə məşqlər daxildir.
Bu ssenari üzrə təlim Azərbaycanda ilk dəfə təşkil olunur. Təlim Azərbaycan, Türkiyə və Özbəkistan Silahlı qüvvələrinin iştirakı ilə, o cümlədən azad edilmiş ərazilərdə birgə şəkildə həyata keçirilir.
Qeyd edək ki, təlimin ssenarisi hər hansı real münaqişə və ya konkret ölkə ilə bağlı deyil. Təlim zamanı istifadə olunan xəritələr, coğrafi adlar və ərazi xüsusiyyətləri şərti xarakter daşıyır.
