Şuşa artıq təkcə Azərbaycanın, türk və islam dünyasının mədəniyyət paytaxtı kimi deyil, həm də qlobal fikir mübadiləsinin, beynəlxalq dialoqun və media əməkdaşlığının mühüm mərkəzlərindən biri kimi tanınır. Tarixi və mədəni irsi ilə seçilən bu şəhər son illərdə beynəlxalq əhəmiyyətli tədbirlərə evsahibliyi etməklə, regional və qlobal səviyyədə nüfuz qazanıb. Bu baxımdan artıq ənənə halını alan Şuşa Qlobal Media Forumu informasiya məkanında baş verən sürətli dəyişikliklərin, rəqəmsal transformasiyanın, süni intellektin media sahəsinə təsirinin, dezinformasiya ilə mübarizənin, jurnalistikanın gələcəyinin və beynəlxalq əməkdaşlıq imkanlarının müzakirə olunduğu nüfuzlu platformalardan biri kimi xüsusi əhəmiyyət daşıyır.
Milli Məclisin deputatı Vüqar RƏHİMZADƏ qəzetimizə açıqlamasında deyib ki, forum hər il dünyanın müxtəlif ölkələrindən media rəhbərlərini, tanınmış jurnalistləri, ekspertləri bir araya gətirərək qlobal informasiya gündəmində yer alan aktual məsələlər ətrafında geniş fikir mübadiləsinə şərait yaradır: "Burada yeni kommunikasiya texnologiyalarının tətbiqi, informasiya təhlükəsizliyi, media savadlılığının artırılması və qlobal informasiya mühitində etibarlı məlumatın roluna dair ətraflı müzakirələr aparılır. Şuşa Qlobal Media Forumu, eyni zamanda ölkələr arasında media sahəsində əməkdaşlığın genişlənməsinə, peşəkar təcrübə mübadiləsinin gücləndirilməsinə və qarşılıqlı etimadın möhkəmləndirilməsinə mühüm töhfə verir. Forum çərçivəsində keçirilən panel müzakirələr, çıxışlar və ikitərəfli görüşlər müxtəlif baxışların səsləndirilməsi üçün əlverişli imkan yaradır, qlobal çağırışlara qarşı ortaq yanaşmaların formalaşdırılmasına xidmət edir. Forum təkcə beynəlxalq media nümayəndələrinin görüş platforması deyil, həm də müasir informasiya mühitinin inkişaf istiqamətlərinin müəyyənləşdirildiyi, əməkdaşlığın dərinləşdirildiyi və qlobal media gündəminə töhfə verən nüfuzlu beynəlxalq tədbirlərdən biri kimi öz mövqeyini möhkəmləndirib".
Deputat bildirib ki, hər il ənənəvi olaraq keçirilən Şuşa Qlobal Media Forumunun mövzularına diqqət yetirdikdə hər dövrün çağırışlarını özündə ehtiva etdiyi daha aydın görünür. Belə ki, ötən il Xankəndi şəhərində "Rəqəmsal keçidlər: Süni intellekt dövründə informasiya və media dayanıqlığının gücləndirilməsi" mövzusunda III Şuşa Qlobal Media Forumu keçirildi. 2024-cü ildə keçirilən II Şuşa Qlobal Media Forumu "Yalan məlumatların ifşası: Dezinformasiyaya qarşı mübarizə" mövzusunu əhatə etdi. 2023-cü ildə I Şuşa Qlobal Media Forumu isə "IV Sənaye İnqilabı dövründə Yeni Media" mövzusunu müzakirə etdi.
Bu forum mövzuları ilə yanaşı, iştirakçıların sayı ilə də diqqətdədir. "Sülhün təşviqində medianın missiyası: Həqiqətin bərpası və etimadın yenidən qurulması" mövzusunda keçirilən
IV Şuşa Qlobal Media Forumu bu baxımdan mühüm əhəmiyyət kəsb edir. 53 ölkədən 160 qonaq, o cümlədən 30 xəbər agentliyinin nümayəndələrinin, 60-dan artıq media qurumunun, bu sahədə fəaliyyət göstərən 10 beynəlxalq təşkilatın iştirakı forumun beynəlxalq nüfuzunun ildən-ilə artmasının, Şuşanın isə qlobal media əməkdaşlığının mühüm mərkəzlərindən birinə çevrilməsinin təsdiqidir. Ümumiyyətlə, son dörd il ərzində forum 81 ölkənin 600-ə yaxın media nümayəndəsini bir araya gətirib.
V.Rəhimzadə bildirib ki, Şuşa Qlobal Media Forumunun ənənə halını almış ən mühüm xüsusiyyətlərindən biri Prezident İlham Əliyevin forum iştirakçıları ilə açıq dialoq formatında görüş keçirməsi və yerli, eləcə də xarici media nümayəndələrinin suallarını birbaşa cavablandırmasıdır: "Bu baxımdan forum dövlət başçısı ilə beynəlxalq media arasında açıq, şəffaf və səmərəli ünsiyyət üçün mühüm platforma rolunu oynayır. Açıq sual-cavab formatı jurnalistlərə onları maraqlandıran məsələləri heç bir məhdudiyyət olmadan səsləndirmək, Prezident İlham Əliyevə birbaşa müraciət etmək və aktual mövzularla bağlı ətraflı məlumat əldə etmək imkanı yaradır. Forumda dünyanın müxtəlif ölkələrindən gəlmiş nüfuzlu media qurumlarının rəhbərləri, tanınmış jurnalistlər və analitiklər Azərbaycanın daxili və xarici siyasəti, regionda baş verən geosiyasi proseslər, Cənubi Qafqazda sülh və təhlükəsizlik məsələləri, iqtisadi inkişaf strategiyası, enerji və nəqliyyat layihələri, işğaldan azad edilmiş ərazilərdə həyata keçirilən genişmiqyaslı bərpa və yenidənqurma işləri, eləcə də beynəlxalq əməkdaşlığın müxtəlif istiqamətləri ilə bağlı suallarını dövlət başçısına ünvanladılar. Eyni zamanda qlobal gündəmdə yer alan çağırışlar, beynəlxalq münasibətlər sistemində baş verən dəyişikliklər və müasir informasiya mühitinə dair məsələlər də müzakirələrin əsas mövzuları sırasında yer aldı".
Deputat vurğulayıb ki, Prezident İlham Əliyevin suallara cavabları, səsləndirdiyi fikirlər və verdiyi mesajlar həm yerli, həm də beynəlxalq media tərəfindən geniş işıqlandırılıb, dünyanın aparıcı informasiya agentlikləri və televiziya kanalları vasitəsilə geniş auditoriyaya çatdırılıb. Bu baxımdan Şuşa Qlobal Media Forumu yalnız media nümayəndələrinin peşəkar müzakirələr apardığı platforma deyil, həm də Azərbaycanın mövqeyinin, həyata keçirdiyi uğurlu siyasətin və regionda gedən proseslərə dair baxışlarının beynəlxalq ictimaiyyətə birbaşa çatdırıldığı mühüm informasiya platforması kimi xüsusi əhəmiyyət daşıyır. Dövlət başçısı ilə açıq dialoq formatı forumun nüfuzunu daha da artırmaqla yanaşı, beynəlxalq media ilə qarşılıqlı etimada əsaslanan əməkdaşlığın möhkəmlənməsinə də mühüm töhfə verir. Açıq sual-cavab formatı informasiyanın vasitəçilər olmadan çatdırılmasına, jurnalistlərin hadisələr barədə ilkin mənbədən dolğun məlumat əldə etməsinə imkan yaradır. Bu isə Azərbaycanla bağlı obyektiv informasiyanın beynəlxalq auditoriyaya çatdırılmasına, ölkənin mövqeyinin daha geniş şəkildə təqdim edilməsinə xidmət göstərir.
V.Rəhimzadənin sözlərinə görə, IV Şuşa Qlobal Media Forumu müxtəlif ölkələrdən olan jurnalistlər və media ekspertləri arasında peşəkar əlaqələrin möhkəmlənməsinə, qarşılıqlı etimadın güclənməsinə və beynəlxalq media əməkdaşlığının inkişafına əlverişli zəmin yaradır. Forum Azərbaycanın dünya informasiya məkanında qlobal müzakirələrin gündəliyini müəyyən edən, istiqamətverici bir aktora çevrildiyini göstərir.
Əsmər QARDAŞXANOVA,
"Azərbaycan"
