- Mənzilimin eyvanından Azərbaycan Respublikasının bayrağını asmaq istəyirəm. Bunun üçün hansısa qurumdan icazə almalıyam?
Elmar BƏDƏLOV,
Xırdalan şəhəri
- Sualınıza cavab olaraq bildiririk ki, vətəndaşın öz şəxsi mənzilindən və ya eyvanından dövlət bayrağını asmasını qadağan edən heç bir hüquqi norma mövcud deyil. Əksinə, bu hüquq Azərbaycan Respublikasının Konstitusiyası və digər normativ hüquqi aktlar ilə qorunur.
"Azərbaycan Respublikası Dövlət Bayrağının istifadəsi qaydaları haqqında" Qanunda dövlət orqanlarının binalarında bayrağın qaldırılması məcburi hesab edildiyi halda, fərdi yaşayış evlərində və mənzillərdə vətəndaşlar tərəfindən istifadə olunmasına heç bir məhdudiyyət qoyulmur.
Öz mülkiyyətinizdə olan mənzilin eyvanından dövlət rəmzini nümayiş etdirmək vətəndaşın vətənpərvərlik hisslərinin və dövlətçiliyə bağlılığının bariz ifadəsidir. Çünki yaşayış binalarında dalğalanan bayraqlar cəmiyyətdə milli qürur hissini artırır, xüsusən gənc nəslin və uşaqların qəlbində dövlət atributlarına sevgi və ehtiram hissini formalaşdırır. Odur ki, sizin bu təşəbbüsünüz hüquqi baxımdan tam qanuni, sosial-mənəvi baxımdan isə təqdirəlayiqdir.
Bayrağı eyvanınızdan asarkən qanunvericiliyin tələblərinə və dövlət rəmzinə ehtiram qaydalarına diqqət yetirməli olduğunuzu unutmayın. Bunun üçün ilk növbədə bayrağı düzgün vəziyyətdə asmalısınız (mavi zolaq yuxarıda, qırmızı orta, yaşıl isə aşağıda olmalı, aypara və ulduz sağa baxmalıdır). Əgər bayrağı şaquli vəziyyətdə asırsınızsa, o zaman qarşıdan baxarkən mavi zolaq sol tərəfdə olmalı, ay və ulduzun ucları aşağı baxmalıdır.
Bundan başqa, bayrağın vəziyyəti (görünüşü) yaxşı olmalıdır. Belə ki, bayraq solğun, çirkli, cırılmış və ya zədələnmiş olmamalıdır. Dövlət rəmzinin təmizliyinə və səliqəsinə biganə münasibət göstərmək hüquqi məsuliyyət yarada bilər.
Həmçinin bayraq təhlükəsiz vəziyyətdə asılmalıdır. Onun dirəyi və ya tutqacı eyvana möhkəm bərkidilməlidir ki, güclü külək zamanı düşərək yoldan keçənlərə və ya nəqliyyat vasitələrinə zərər vurmasın. Eyni zamanda sosial məsuliyyət baxımından nəzərə almaq lazımdır ki, bayraq aşağı qonşunun pəncərə işığını kəsməməli, alt eyvana və ya həyətə sallanaraq maneə yaratmamalıdır.
Mənzilinizin eyvanından Azərbaycan Respublikasının Dövlət Bayrağını asmaq üçün heç bir dövlət və qeyri-dövlət qurumundan icazə almaq tələb olunmur. Çünki "Azərbaycan Respublikası Dövlət Bayrağının istifadəsi qaydaları haqqında" Qanunda, eləcə də digər normativ hüquqi aktlarda fərdi yaşayış mənzilindən, eyvanından və ya pəncərəsindən bayraq asılması üçün hər hansı rəsmi müraciət, bildiriş və ya xüsusi icazə mexanizmi nəzərdə tutulmayıb.
Yekun olaraq mənzilin eyvanı sizin xüsusi mülkiyyətiniz (və ya qanuni istifadəniz) altında olan sahədir. Şəxsi məkanınızda dövlət atributunu nümayiş etdirmək vətəndaşlıq hüququnuzdur və bu hüququn reallaşdırılması heç kimin (vəzifəli şəxsin) rəyindən və ya razılığından asılı deyildir.
Sualı cavablandırdı:
Paşa SƏFƏROV,
Azərbaycan Respublikası Vəkillər Kollegiyasının üzvü
