28 May 2022 17:30
424
Elm və texnika

AMEA və Türkiyə Elmlər Akademiyasının texnologiya sahəsində əməkdaşlıq perspektivləri müzakirə edilib

AMEA-nın prezidenti vəzifəsini icra edən akademik Arif Həşimov “TEKNOFEST Azərbaycan” Aviasiya, Kosmos və Texnologiya festivalı çərçivəsində ölkəmizdə səfərdə olan Türkiyə Elmlər Akademiyasının prezidenti professor Müzəffər Şəkərlə görüşüb.

Bu barədə AZƏRTAC-a AMEA-dan məlumat verilib. Bildirilib ki, tədbirdə çıxış edən akademik Arif Həşimov iki qardaş ölkə arasında bütün sahələrdə yüksək səviyyədə münasibətlərin olduğunu, “TEKNOFEST Azərbaycan” festivalı sayəsində isə yeni dövrün – texnoloji əməkdaşlığın başladığını söyləyib. Qeyd edib ki, dost və qardaş Türkiyə Respublikası son illərdə yeni texnologiyalar və hərbi sənayedə yüksək nailiyyətlər əldə edib və indi bir çox dünya ölkələri pilotsuz uçuş aparatları və digər sahələrdə Türkiyənin təcrübəsini öyrənməyə çalışırlar. Qardaş ölkənin uğurlarının qürur yaratdığını dilə gətirən akademik Arif Həşimov AMEA və Türkiyə Elmlər Akademiyasının texnologiya sahəsində əməkdaşlığının perspektivlərindən danışıb və əhəmiyyətinə toxunub.

Türkiyə Elmlər Akademiyasının prezidenti Müzəffər Şəkər AMEA-da olmaqdan məmnunluğunu ifadə edib, Azərbaycanın elm məbədinə daha əvvəl ziyarət etməyi planlaşdırdığını, lakin ötən iki il ərzində pandemiyaya görə bunun baş tutmadığını vurğulayıb. Rəhbərlik etdiyi qurum barədə məlumat verən M.Şəkər Türkiyə Elmlər Akademiyasının təməlinin hələ XVIII əsrin sonları – XIX əsrin əvvəllərində atılmağa başlandığını, bir sıra səbəblərə görə, fəaliyyətinə fasilə verildiyini, rəsmi olaraq isə 1993-cü ildə təsis olunduğunu deyib.

“TEKNOFEST Azərbaycan” çərçivəsində ölkəmizdə olduğunu diqqətə çatdıran M.Şəkər bu gün elmi-texniki tərəqqinin, texnoloji inkişafın, innovativ ideyaların dövlətlərin müstəqilliyində, azadlıqlarının təmin edilməsində xüsusi önəm daşıdığını söyləyib. Bildirib ki, Türkiyə daxili imkanlar, tədqiqatlar və yerli mühəndislər sayəsində texniki sahədə tarixi nailiyyətlər əldə edib.

M.Şəkər hazırda Türkiyə Elmlər Akademiyasında texnoloji tədqiqatlardan əlavə, insan sağlamlığının qorunması, biotexnologiyalar, ölkənin müdafiə qabiliyyətinin artırılması istiqamətində önəmli araşdırmalar aparıldığını vurğulayıb. O, bu prosesin Türkiyənin özəl sektoru, ali təhsil müəssisələri və aidiyyəti nazirliyinin birgə iştirakı ilə həyata keçirildiyini deyib.

Türkiyə Elmlər Akademiyasının prezidenti son illərdə aparılmış tədqiqatlar nəticəsində ərsəyə gəlmiş və “TEKNOFEST Azərbaycan”da sərgilənmək üçün ölkəmizə gətirilmiş 45-ə yaxın elmi əsərin AMEA-ya bağışlanacağını diqqətə çatdırıb.

AMEA-nın vitse-prezidenti akademik İsa Həbibbəyli iki ölkə arasında elmi əlaqələrin təməllərinin Mövlana Cəlaləddin Rumi ilə Şəms Təbriziyə söykəndiyini, görkəmli sufi şairlərinin Azərbaycan-Türkiyə dostluq, qardaşlıq münasibətlərinin simvolları olduğunu söyləyib. Qeyd edib ki, bu gün Azərbaycan və Türkiyə prezidentlərinin atdıqları addımlar iki ölkənin mənəvi-siyasi birliyinin əyani göstəricisidir və dünyada münasibətləri bu səviyyədə olan hər hansı bir başqa dövlət yoxdur. “TEKNOFEST Azərbaycan” festivalının bu münasibətlərin daha da güclənməsinə rəvac verəcəyini deyən akademik ölkələrimiz arasında elmin bütün sahələrində əməkdaşlıq təməllərinin atılmasının vacibliyini bildirib.

AMEA-nın vitse-prezidenti akademik İradə Hüseynova isə çıxışında qardaş Türkiyənin 44 günlük Vətən müharibəsində Azərbaycana dəstəyini və Bakıda keçirilən Zəfər paradında yaxından iştirak etdiyini xatırladıb. Həmçinin rəhbərlik etdiyi Biologiya və Tibb Elmləri Bölməsində Azərbaycan və Türkiyə xalqlarının genetik strukturunun öyrənildiyini diqqətə çatdırıb. Festivalın Türkiyədən kənarda ilk dəfə Azərbaycanda keçirilməsinin önəmini qeyd edən akademik bu gün ən böyük gücün elm və texnologiya olduğunu deyib, Bölmədə aparılan tədqiqatlarda texnoloji yeniliklərdən geniş istifadə edildiyini vurğulayıb. Bundan əlavə, AMEA-nın müxbir üzvü Tərlan Məmmədovun Türkiyədə koronavirusa qarşı vaksinlərin hazırlanması üzrə elmi qrupda aktiv iştirak etdiyini bildirib. O, “TEKNOFEST Azərbaycan” festivalının ölkəmizdə yeni texnologiyaların inkişafına töhfə verəcəyini və festivalın nəticələrinin bəhrəsini yaxın illərdə görəcəyimizi deyib.

AMEA-nın Rəyasət Heyəti aparatının Beynəlxalq elmi əməkdaşlıq şöbəsinin müdiri dosent Esmira Əlirzayeva isə bu günlərdə Türkiyə səfəri çərçivəsində keçirdiyi görüşlər barədə məlumat verib. Qeyd edib ki, 2013-cü ildə AMEA ilə Türkiyə Elmi və Texnoloji Tədqiqat Şurası (TÜBİTAK) arasında əməkdaşlıq haqqında müqavilə imzalanıb. O, sözügedən sənəddən irəli gələrək tərəflər arasında 3 layihə müsabiqəsinin həyata keçirildiyini və Azərbaycandan alim və mütəxəssislərin TÜBİTAK-ın çağırışlarında aktiv iştirak etdiklərini söyləyib. Həmçinin hazırda TÜBİTAK-ın ekspertlər bazasının (PYS) AMEA-nın istifadəsinə açılması üzrə razılığın əldə olunduğunu və PYS-dən istifadə üzrə ilkin təlimlərin keçirildiyini deyib.

Sonda tərəflər qarşılıqlı xatirə hədiyyələri təqdim ediblər. Müzəffər Şəkər Türkiyə Elmlər Akademiyasının “İslamda elm və texnologiya” beşcildiyini akademik Arif Həşimova təqdim edib.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video