Bura Ordubadın məşhur Salamməlik stansiyasıdır. 1992-ci ilin aprel ayında maşinist Tahir Abuzərovun qatarı hərəkət etdirib, 8 saat gözlədikdən sonra geri dönüş etdiyi stansiya. Bu, həmin stansiyada sonuncu qatar idi...
AZƏRTAC-ın bölgə müxbiri bildirir ki, həmin gündən sonra Salamməlikə qatarlar bir daha gəlməyib. Ordubad vağzalından fit səsi, maşinistlərin “tələsin, yola düşürük” çağırışları, sərnişinlərin şən-şaqraq sədaları kəsilib. Bəli, 1941-ci ildən 1992-ci ilədək bu yol təkcə dəmir relslər deyil, həm də onlarla xatirələrin yaşandığı yol idi. Bu relslərin üzərində neçə arzular, neçə niyyətlər çiçək açmış, neçə xəyallar gerçəkliyə qovuşmuşdu. Bəzən arxasınca nigaran nəzərlərlə, pərişan halda baxılan qatarlar yola salınmışdı bu stansiyadan. Bəzən də toy büsatına bürünmüş, el-oba sevincinə qərq olmuşdu dəmiryolu vağzalı.
2020-ci il sentyabrın 27-də başlanan, 44 gün davam edən Vətən müharibəsində Müzəffər Ali Baş Komandan İlham Əliyevin rəhbərliyi ilə Ordumuzun tarixi Zəfərindən sonra əvvəlki görkəmindən əsər-əlamət qalmayan, miskinlik libasına bürünən Salamməlik stansiyasının üzərinə yenidən günəş doğub. Bu vağzalın sərnişinləri üçün də ümid işığı şölələnib. Ərazidə yenidən canlanma yaranmağa başlayıb.
2025-ci il dekabrın 5-i. Otuzillik ədalətsiz sükut nəhayət ki, bu gün sona yetdi. Stansiya ərazisi yenidən səs-küylüdür. Ərazi tikinti işləri aparan texnikaların, görülən işləri işıqlandırmağa tələsən media nümayəndələrinin səslərinə bürünüb.
“Azərbaycan Dəmir Yolları” QSC-nin sədr müavini Arif Ağayev AZƏRTAC-a açıqlamasında bildirib ki, QSC Naxçıvan Muxtar Respublikasında dəmir yolu infrastrukturunun yenidən qurulması və modernləşdirilməsi üçün layihələndirmə işlərini başa çatdırıb. Hazırda Ermənistanla sərhəddə, Ordubad rayonunun Salamməlik stansiyası ərazisində tikinti işlərinə start verilib. Tikinti işləri 188 kilometrlik dəmiryol xəttini əhatə edir.
Onun sözlərinə görə, məqsəd müasir tələblərə cavab verən yeni dəmiryolu şəbəkəsinin qurulmasıdır. Əsaslı təmir işləri başa çatdıqdan sonra dəmir yolunun illik yükötürmə qabiliyyəti 15 milyon ton təşkil edəcək.
“Bildiyiniz kimi, 2025-ci il avqustun 8-də Vaşinqtonda “Beynəlxalq Sülh və Rifah naminə Tramp Marşrutu”nun (TRIPP) açılmasına dair razılaşmanın imzalanması oldu. Bu razılaşma çərçivəsində dəhliz boyunca dəmir yolu əlaqəsi bərpa ediləcək. Zəngəzur dəhlizi Orta Dəhlizin mühüm tərkib hissəsi kimi Avropa və Asiya arasında yükdaşımalarda mühüm marşrut kimi qiymətləndirilir. Zəngəzur dəhlizi həm də “Şimal-Cənub” dəhlizinin əsas halqalarından birini təşkil edəcək”, - deyə Arif Ağayev əlavə edib.
jpg_1764920406.jpg)
