Azərbaycanda qeyri-neft sektoru sürətlə inkişaf edir. Regionların tarazlı tərəqqisi təmin olunur və işgüzar mühit getdikcə daha əlverişli vəziyyətə gətirilir. Həyata keçirilən məqsədyönlü siyasət artıq yeni və daha genişmiqyaslı mərhələyə qədəm qoyur. Prezident İlham Əliyevin qarşıya qoyduğu strateji hədəflər bu istiqamətdə uğurla icra olunur.
İslahatlar kursu sayəsində regionlarda iqtisadi fəallıq canlanır və sahibkarların investisiya-istehsal fəaliyyəti genişləndirilir. Əlavə dəyər yaradan ixracyönümlü istehsal sahələrinin formalaşmasına güclü təkan verilir və yeni dövlət dəstəyi mexanizmləri işgüzar dairələrdə böyük maraqla qarşılanır.
Bu günlərdə iqtisadiyyat nazirinin müavini Azər Bayramov Masallı şəhərində Lənkəran-Astara iqtisadi rayonunun sahibkarları ilə görüşüb. Görüşdə sahibkarlara sentyabrın 1-dən qüvvəyə minən bir sıra yeni güzəştlərdən bəhs olunub. Yeni qaydalar bilavasitə yerli ixracatçıların maraqlarını qorumağa və onların hərtərəfli dəstəklənməsinə xidmət edir. Dövlətimizin tətbiq etdiyi yeni güzəşt və dəstək mexanizmləri sahibkarlar üçün əsl biznes stimulu yaradır. Bu dəstək mexanizmləri sahibkarların maliyyə yükünü əhəmiyyətli dərəcədə yüngəlləşdirir. Eyni zamanda onların investisiya və istehsal imkanlarını genişləndirir. Bu dəstək mexanizmləri çərçivəsində tətbiq edilən ixracda daşıma xərclərinin kompensasiyası mexanizmi sentyabrın 1-dən 10 il müddətində qüvvədə olacaq.
Belə ki, Azərbaycan mənşəli qeyri-neft-qaz mallarının ixracı zamanı yaranan daşıma xərclərinin 70 faizədək hissəsi dövlət tərəfindən ödəniləcək. Dəstək mexanizmi dəmir yolu, hava və dəniz nəqliyyatını əhatə edir. Azərbaycanda qeydiyyatda olan avtomobillərlə həyata keçirilən daşımalar da bu güzəştə şamil olunur. Xaricdə qeydiyyatda olan avtomobillərdən istifadə olunduqda isə dövlət dəstəyi 50 faizədək təşkil edəcək. Eyni zamanda Naxçıvanda istehsal olunan qeyri-neft-qaz məhsullarının ölkənin digər ərazilərinə quru yolu ilə daşınması zamanı xərclərin 70 faizədək hissəsi dövlət tərəfindən kompensasiya olunacaq.
Mikro, kiçik və orta sahibkarlıq subyektləri olan ixracatçılar bu güzəştdən yararlanacaq. Gömrük rəsmiləşdirilməsi xərclərinin bir hissəsi dövlət tərəfindən qarşılanacaq. Kompensasiyanın məbləği məhsulun növündən və ixrac edildiyi ölkədən asılı olacaq. Bu qayda sentyabrın 1-dən 5 il müddətində qüvvədə olacaq. Sahibkarlara kredit faizlərinin 50 faizi həcmində subsidiya verilir. İşğaldan azad edilmiş ərazilərdə əsas borcun 90 faizinədək dövlət zəmanəti təqdim olunur. Digər regionlarda isə əsas borcun 50 faizinədək dövlət zəmanəti verilir. Həmçinin yeni sənaye və kənd təsərrüfatı obyektləri yaradılır. Bu obyektlərin elektrik şəbəkəsinə qoşulması zamanı ödənilən haqq azaldılır. Qoşulma haqqının 50 faizi dövlət tərəfindən qarşılanacaq. Bu güzəşt 2027-2030-cu illərdə tətbiq olunacaq. Bundan başqa, iri layihələr xüsusi diqqətdə saxlanılır. Belə layihələrin vahid pəncərə prinsipi ilə icrası təmin ediləcək. Komissiya layihələrin sürətləndirilmiş qaydada həyata keçirilməsinə kömək edəcək.
Müasir dövrdə elektron ticarət sürətlə inkişaf edir. Sentyabrın 1-dən vergi sahəsində də mühüm yeniliklər qüvvəyə minəcək. Rəqəmsal xidmət təchizatçıları da yeni qaydalara tabe olacaq. Azərbaycanda elektron ticarət qaydasında xidmət göstərən şirkətlər var. Artıq ölkə üzrə illik dövriyyəsi
10 min ABŞ dollarını aşan qeyri-rezident rəqəmsal xidmət təchizatçıları müəyyənləşdirilib. Belə şirkətlər üçün vergi orqanında elektron qeydiyyat məcburi olacaq. Bu qərar rəqəmsal iqtisadiyyatın tənzimlənməsinə xidmət edir. Eyni zamanda ölkəmizdə ədalətli rəqabət mühitinin formalaşmasını təmin edir.
Beləliklə, sentyabrın 1-dən qüvvəyə minən yeni güzəştlər paketi ölkəmizin iqtisadiyyatının canlanmasına güclü təsir göstərəcək. Dövlətimizin sahibkarlara göstərdiyi qayğı hər zaman öz bəhrəsini verib. Qarşıdakı 10 il ərzində tətbiq olunacaq bu mexanizmlər sayəsində iqtisadiyyatda qeyri-neft sektorunun payı daha da artacaq. Sahibkarlar üçün yaradılan əlverişli şərait ölkəmizin iqtisadi qüdrətini daha da gücləndirəcək.
Təhminə VERDİYEVA,
"Azərbaycan"
