Azərbaycan musiqisinin inkişafında böyük xidmətlər göstərmiş sənət adamlarından biri də Xalq artisti, professor, vokal məktəbinin tanınmış nümayəndəsi Mobil Əhmədovdur. O, bütün ömrünü Azərbaycan musiqisinin, bütövlükdə xalqımızın zəngin mədəniyyətinin dünyaya yayılması və tanıdılması işinə həsr etmişdi.
İfa tərzi, ürəyəyatımlı səsi ilə dinləyici və tamaşaçıların rəğbətini qazanmış Mobil Əhmədov 10 sentyabr 1931-ci ildə Gəncədə dünyaya göz açıb. Kiçik yaşlarından incəsənətə maraq göstərib. Bu maraq 1955-ci ildə onu Əzim Əzimzadə adına Bakı Rəssamlıq Məktəbinə gətirib. Yalnız rəssamlıq deyil, mədəniyyətin başqa sahələri də onu özünə çəkib. O üzdən həmin zamanlar bir növ yol ayrıcında qalıb. Hansı sahəni - musiqini, yoxsa rəssamlığı seçəcəyini xeyli götür-qoy edib. Axır ki, bir ildən sonra seçimini edib, musiqini ürəyinə daha yaxın bilib.
Mobil Əhmədov Azərbaycan Dövlət Konservatoriyasına qəbul olaraq tanınmış müğənni Bülbülün sinfində oxumağa başlayıb. Gələcəyin böyük müğənnisi 1961-ci ildə təhsilini uğurla başa vurduqdan sonra bir neçə ay Azərbaycan Dövlət Radiosunun xorunda ifaçılıq edib.
Həmin ilin sentyabrında Mobil Əhmədovun bacarığını, peşəkarlığını, ən başlıcası isə səsini, ifa tərzini nəzərə alaraq Azərbaycan Dövlət Musiqili Komediya Teatrına (ADMKT) dəvət ediblər. Elə həmin vaxtdan da ömrünü bu sənət ocağına bağlayıb. Görkəmli aktyorlar Lütfəli Abdullayev, Bəşir Səfəroğlu, Nəsibə Zeynalova və başqaları ilə işləməyə başlayan M.Əhmədov bu teatrda həyatının ən gözəl anlarını yaşayıb, yaradıcılığında böyük uğurlar əldə edib. 40 ilə yaxın teatrın əksər tamaşalarında əsas partiyaları böyük məharət və sevgi ilə oxuyub. Bu hesaba musiqi aləmində tanınıb, bənzərsiz ifası ilə yaddaşlarda dərin iz salıb.
Xalq artisti Mobil Əhmədov ömrünün bu xoş illərini xatirələrinə köçürərək yazmışdı: "Adımı ilk dəfə Musiqili Komediya Teatrının afişalarında oxuyanda gözlərimə inansam da, fikrimdə reallığa çevirə bilmədim. Doğrudanmı mən, indiyədək çox-çox uzaqlardan baxdığım bu nəhəng aktyorlarla çiyin-çiyinə çıxış edəcəyəm?! kimi qəribə hisslərə qapılırdım".
Mobil Əhmədov yalnız müğənni deyil, müəllim-pedaqoq kimi də işləyib. O, Musiqi Akademiyasında, Azərbaycan Dövlət Mədəniyyət və İncəsənət Universitetində, Uşaq Filarmoniyasında, həmçinin, 22 və 6 nömrəli musiqi məktəblərində vokal sənətindən dərs deyib.
Amma Mobil Əhmədov hələ kiçik yaşlarından könül bağladığı rəssamlıqdan da uzaq düşməyib. Asudə vaxtlarında müxtəlif janrlarda əsərlər, həm də sənət dostlarının şarjlarını çəkib. "Pikassonu düşünərkən", "Süleyman Rüstəm", "Tələbə qız", "Mənim dostlarım", "Tənha qayıq", "Gəncə mənzərələri", "Gəncə çayı" rəsmlərini yaradıb. Musiqidə deyə bilmədiklərini rənglərin dili ilə ifadə edib.
Mobil Əhmədovun Azərbaycan mədəniyyətinin inkişafındakı xidmətləri dövlətimiz tərəfindən layiqincə qiymətləndirilib. Görkəmli müğənni 1978-ci ildə Əməkdar artist, 2000-ci ildə isə Xalq artisti fəxri adlarına layiq görülüb.
Mobil Əhmədov uzun sürən xəstəlikdən sonra 2006-cı il iyunun 3-də 75 yaşında vəfat edib. Dünyaya göz açdığı Gəncədə dəfn olunub.
Bir zamanlar Mobil Əhmədovun tələbəsi olmuş Əməkdar artist Ramil Qasımov müəllimini belə xatırlayır: "Ustadımın xatirəsi mənə hər zaman əziz və doğmadır. Yaradıcı nailiyyətlərimə görə ustadım Mobil Əhmədova borclu olduğumu hər zaman qeyd edirəm. "Ustadımın yolu ilə" filmində, zamanında onun Azərbaycan Musiqili Komediya Teatrında indiki Azərbaycan Dövlət Akademik Musiqili Teatrında, yaratdığı sənət incilərinin nümunələrini toplayaraq, onun ifa etdiyi üslubda yenidən özüm ifa etdim. Bu əsərlərin hər biri Azərbaycan klassik ənənələrinin zənginliyinə köklənir. Eyni zamanda filmi ərsəyə gətirməkdə məqsədim ustadıma ehtiram və hörmət əlamətidir".
Vahid MƏHƏRRƏMOV,
"Azərbaycan"
