Göygöl rayonunda "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nın həyata keçirilməsi istiqamətində görülməsi vacib olan məsələlərin müzakirəsinə həsr olunan regional müşavirə keçirilib.
Rayon icra hakimiyyəti və Kənd Təsərrüfatı Nazirliyi yanında Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzinin birgə təşkilatçılığı ilə keçirilən müşavirədə Gəncə şəhəri, Göygöl, Qazax, Ağstafa, Tovuz, Şəmkir, Gədəbəy, Daşkəsən, Samux rayonlarının baytarlıq idarələrinin rəisləri və əməkdaşları, həmçinin özəl baytar həkimləri iştirak etmişlər.
Tədbiri rayon icra hakimiyyətinin başçısı Vüqar Novruzov açaraq heyvanlar arasında yoluxucu xəstəliklərin qarşısının alınması və aradan qaldırılması istiqamətində görülməsi vacib olan işlərdən, həmçinin Prezident İlham Əliyevin rəhbərliyi ilə ölkəmizdə aqrar sektorun inkişafı, ərzaq təhlükəsizliyinin təmin olunması və kənd təsərrüfatında müasir texnologiyaların tətbiqi istiqamətində qarşıda duran vəzifələrdən danışmışdır.
Sonra Heyvan Sağlamlığı və Baytarlıq Xidmətləri Mərkəzinin rəis müavini Azər Məmmədov çıxış etmişdir. O, ölkədə epizootik sabitliyin qorunub saxlanılmasının mühüm əhəmiyyət kəsb etdiyini qeyd etmiş, dövlət-özəl baytarlıq münasibətlərinin inkişafından, daha çevik baytarlıq xidmətlərinin yaradılmasının vacibliyindən, aparılan tədbirlərin rəqəmsallaşdırılmasından, "Epizootiya əleyhinə tədbirlər planı"na uyğun olaraq, vaksinasiya tədbirlərinin vaxtında və keyfiyyətlə həyata keçirilməsinin vacibliyindən söhbət açmışdır.
Müşavirədə qeyd olunan rayonların Heyvan Sağlamlığı və Baytarlıq Xidmətləri idarələrinin rəhbərləri, eləcə də özəl baytar həkimləri çıxış edərək bölgədə epizootik vəziyyət barədə məlumat vermişlər.
Tədbirdə peyvəndləmə işlərinin vaxtında və keyfiyyətlə həyata keçirilməsi, eləcə də mövcud çatışmazlıqların qısa müddətdə aradan qaldırılması üçün Heyvan Sağlamlığı və Baytarlıq Xidmətləri idarələrinə tapşırıq və tövsiyələr verilmişdir.
Müşavirənin sonunda səyyar baytarlıq xidmətlərini həyata keçirən və müasir texniki avadanlıqlarla təchiz olunmuş nəqliyyat vasitəsinin təqdimatı keçirilmişdir.
S.YUNİSOĞLU,
"Azərbaycan"
