2029-cu ildə Azərbaycanda əhalinin növbəti siyahıyaalınması
keçiriləcək. Məlum olduğu kimi, bu barədə Prezident İlham Əliyev 7 iyul 2026-cı
il tarixli fərman imzalayıb. Fərmanda qeyd olunur ki, bu tədbirin respublikanın
ərazi bütövlüyü və dövlət suverenliyi tam bərpa edildikdən sonra ilk dəfə ölkənin
bütün ərazisi üzrə əhaliyə dair müfəssəl məlumatların əldə edilməsi və
sosial-demoqrafik vəziyyətin qiymətləndirilməsi məqsədilə keçiriləcək.
Fərmana əsasən, ölkədə 2029-cu il oktyabrın 1-nə olan vəziyyət
üzrə əhalinin növbəti siyahıyaalınması həmin il oktyabrın 1-dən 31-dək keçirilməsi
nəzərdə tutulur.
Dövlət Statistika Komitəsinə əhalinin siyahıyaalınması ilə
bağlı hazırlıq işlərinin görülməsi və onun keçirilməsi, yekunlarının işlənilməsi,
nəticələrinin dərc edilərək yayılması həvalə edilib. Nazirlər Kabinetinə bu fərmandan
irəli gələn məsələləri həll etmək tapşırılıb.
Siyahıyaalma, ümumiyyətlə, əhali haqqında ən dolğun məlumat
mənbəyi olaraq demoqrafik proseslərin obyektiv qiymətləndirilməsi və ölkənin
sosial-iqtisadi inkişafının planlaşdırılması baxımından önəmli bir tədbirdir.
Başqa sözlə, siyahıyaalma ölkənin bütün
vətəndaşlarına aid demoqrafik, iqtisadi və sosial məlumatların müəyyən olunmuş
vaxtda toplanması, ümumiləşdirilməsi, öyrənilməsi və yayılması deməkdir.
2029-cu ildə keçiriləcək əhalinin növbəti siyahıyaalınması
isə üstəlik xüsusi tarixi əhəmiyyət kəsb edəcək. Çünki bu, Prezident, Müzəffər
Ali Baş Komandan İlham Əliyevin müdrik rəhbərliyi ilə şanlı Azərbaycan
Ordusunun Vətən müharibəsində qazandığı tarixi Zəfər və ölkəmizin
suverenliyinin tam bərpa olunması nəticəsində müstəqillik tariximizdə ilk dəfə
olaraq Azərbaycanın bütün suveren ərazisini tam şəkildə əhatə edəcək
ümumrespublika əhalinin siyahıyaalınması olacaq. İyulun 17-də Baş nazir Əli Əsədovun
sədrliyi ilə Nazirlər Kabinetində keçirilən geniş iclasda da bu, xüsusi qeyd
olunub. İclasda dövlət başçısının "2029-cu ildə Azərbaycan Respublikasında
əhalinin siyahıyaalınmasının keçirilməsi haqqında" fərmanından irəli gələn
vəzifələrin icrası, əhalinin siyahıyaalınmasına hazırlıq və onun keçirilməsi ilə
bağlı görüləcək işlər müzakirə edilib.
Baş nazir Əli Əsədov
Prezidentin fərmanının icrasının təmin olunması məqsədilə Nazirlər
Kabineti tərəfindən müvafiq tədbirlər planının təsdiq ediləcəyini, əhalinin
siyahıyaalınmasına hazırlıq və onun keçirilməsi ilə bağlı mərkəzi və yerli icra
hakimiyyəti orqanlarının, idarə, müəssisə və təşkilatların fəaliyyətinin əlaqələndirilməsi
üçün Baş nazirin müavininin rəhbərliyi ilə Əhalinin Siyahıyaalınmasına Yardım
üzrə Mərkəzi Komissiya yaradılacağını bildirib.
Dövlət Statistika Komitəsinin sədri Azər Mursaqulov əhalinin
siyahıyaalınmasına hazırlıq məqsədilə görüləcək işlər barədə məlumat verib. Rəqəmsal
inkişaf və nəqliyyat naziri Rəşad Nəbiyev aidiyyəti dövlət orqanlarının
(qurumlarının) informasiya ehtiyatlarında və sistemlərində olan müvafiq məlumatların
Dövlət Statistika Komitəsinin məlumat bazasına inteqrasiyası istiqamətində
görüləcək işlər barədə danışıb.
Əhalinin növbəti siyahiyaalınması Birləşmiş Millətlər Təşkilatının
müvafiq tələb və tövsiyələrinə, həmçinin milli prioritetlərə əsaslanaraq təşkil
ediləcək. Tədbirin ilk dəfə rəqəmsal texnologiyalar, inzibati və geoməkan məlumatlarından
istifadə edilməklə keçirilməsi nəzərdə tutulur.
Artıq aidiyyəti dövlət qurumlarına Prezidentin fərmanından
irəli gələn tapşırıqların, o cümlədən əhalinin
siyahıyaalınmasına hazırlıq və onun keçirilməsi üzrə zəruri tədbirlərin
vaxtında, keyfiyyətlə və mütəşəkkil yerinə yetirilməsi barədə müvafiq
tapşırıqlar verilib.
Xatırladaq ki, bütün dünyada olduğu kimi, Azərbaycanda da əhalinin
siyahıyaalınması 10 ildənbir keçirilir. Ölkəmizdə sonuncu dəfə əhali 2019-cu
ildə siyahıya alınıb. Müstəqillik dövründə əhalinin üçüncü milli
siyahıyaalınması olan həmin tədbir oktyabrın 1-10-da keçirilib. Dövlət
Statistika Komitəsi tərəfindən aparılan bu siyahıyaalmanın yekunlarına əsasən,
həmin vaxt ölkə əhalisinin sayı 9 milyon 951,4 min nəfər təşkil edib.
Toplanmış məlumatlar əsasında 30 cilddən ibarət "Azərbaycan
Respublikasında əhalinin siyahıyaalınması - 2019-cu il" adlı statistik məcmuə
hazırlanıb.
Dövlət Statistika Komitəsinin son məlumatına əsasən, bu il
iyun ayının 1-i vəziyyətinə Azərbaycanda əhalinin sayı 10 milyon 271 min 638 nəfər
olub. İlin əvvəlindən əhali 9287 nəfər və ya 0,1 faiz artıb.
Flora SADIQLI,
"Azərbaycan"
