Mingəçevir Dövlət Universiteti və Dokuz Eylül Universitetinin birgə təşkilatçılığı ilə “Dil, təhsil, tədqiqat və dayanıqlılıq sahəsində müasir problemlər” mövzusunda beynəlxalq elmi konfrans işə başlayıb.
Konfransın açılış mərasimi Mingəçevir şəhər Heydər Əliyev Mərkəzində baş tutub. Tədbirdə Milli Məclisin deputatları, Mingəçevir Şəhər İcra Hakimiyyətinin rəhbərliyi, hüquq-mühafizə orqanlarının əməkdaşları, YAP-ın Mingəçevir şəhər təşkilatının, Mingəçevir Bələdiyyəsinin, Elm və Təhsil Nazirliyi yanında İctimai Şuranın, eləcə də 23 ölkəni təmsil edən ali təhsil və tədqiqat institutlarının nümayəndələri, ziyalılar, dilçi alimlər, müəllimlər və tələbələr iştirak ediblər.
AZƏRTAC-ın bölgə müxbiri xəbər verir ki, konfrans iştirakçıları əvvəlcə Ümummilli Lider Heydər Əliyevin abidəsini ziyarət ediblər. Sonra “Dil sərhəd tanımır” adlı kitab sərgisinə baxış keçirilib. Sərgidə MDU-nun alimlərinin, ölkənin müxtəlif elmi mərkəzlərinin və nəşriyyatların dilçilik sahəsində çap olunmuş elmi əsərləri, monoqrafiyalar və tədris vəsaitləri nümayiş olunub.
Konfrans Ümummilli Lider Heydər Əliyevin və şəhidlərin əziz xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə açıq elan olunub. MDU-nun rektoru Anar Eminov çıxışında dil, təhsil və tədqiqat sahələrinin qarşılıqlı əlaqəsinin müasir dövrdə bilikli cəmiyyətin formalaşmasında əsas dayaqlardan biri olduğuna diqqət çəkib. O, konfransın beynəlxalq miqyasını xüsusi qeyd edərək bildirib ki, 23 ölkədən 77 ali təhsil və tədqiqat institutunu təmsil edən alimlər tərəfindən 545-dən çox məqalə və tezis təqdim olunub. Bu göstərici elmi əməkdaşlığın genişlənməsi, bilik mübadiləsinin gücləndirilməsi və yeni akademik platformaların formalaşması baxımından mühüm nəticədir.
Rektor konfransın Birinci Türkoloji Qurultayın 100 illik yubileyinə həsr olunmasının simvolik və elmi baxımdan böyük əhəmiyyət daşıdığını da qeyd edib. Eyni zamanda, tədbirin ilk panelinin Azərbaycan dilçilik elminə böyük töhfələr verən professor Mahirə Hüseynovanın 65 illik yubileyinə həsr olunduğu diqqətə çatdırılıb.
Filologiya elmləri doktoru, professor, Prezident təqaüdçüsü, Əməkdar müəllim, Azərbaycan Dövlət Pedaqoji Universitetinin Beynəlxalq əlaqələr üzrə prorektoru Mahirə Hüseynova dilin yalnız ünsiyyət vasitəsi deyil, həm də milli yaddaşın, mədəni identikliyin və tarixi varisliyin əsas daşıyıcısı olduğunu vurğulayıb. Bildirib ki, dilçilik elmi bu gün yalnız nəzəri çərçivələrlə məhdudlaşmır, eyni zamanda təhsil siyasəti, sosial kommunikasiya, rəqəmsal texnologiyalar və multikultural mühit kontekstində yeni tədqiqat istiqamətləri formalaşdırır. Bu baxımdan, belə beynəlxalq platformalar müxtəlif elmi məktəblər arasında dialoqun qurulmasına, ortaq terminoloji və metodoloji yanaşmaların formalaşdırılmasına və xüsusilə gənc tədqiqatçıların elmi mühitə inteqrasiyasına mühüm töhfə verir. O, Birinci Türkoloji Qurultayın 100 illik yubileyinin qeyd olunmasının yalnız tarixi hadisə deyil, həm də müasir türkoloji tədqiqatların inkişafına yeni baxış bucağı gətirdiyini də vurğulayıb.
Konfransın davamında MDU-nun rektoru Anar Eminova Türk Dünyası Araşdırmaları Beynəlxalq Elmlər Akademiyasının fəxri professoru diplomu və “Şərəf ordeni” təqdim olunub.
Türkiyənin Gəncədəki Baş konsulu Recep Öztop çıxış edərək ölkələrimiz arasında elm və təhsil sahəsində əməkdaşlığın ortaq tarixi, dil və mədəni köklərə əsaslandığını bildirib. O, belə beynəlxalq konfransların yalnız akademik mübadilə platforması deyil, eyni zamanda, iki qardaş ölkə arasında strateji tərəfdaşlığın humanitar ölçüdə daha da dərinləşməsinə xidmət etdiyini diqqətə çatdırıb.
Azərbaycan Respublikası Prezidentinin İşlər İdarəsinin Prezident Kitabxanasının direktoru, professor Afət Abbasova çıxışında müasir dövrdə elmi biliklərin qorunması, sistemləşdirilməsi və geniş ictimaiyyətə çatdırılmasında kitabxanaların rolunu xüsusi vurğulayıb. Bildirib ki, rəqəmsallaşma şəraitində kitabxanalar artıq yalnız informasiya mənbəyi deyil, həm də elmi kommunikasiya mərkəzləri kimi çıxış edir. Afət Abbasova konfransın mövzusunun bu baxımdan aktual olduğunu qeyd edərək, dil, təhsil və tədqiqat sahələrinin inteqrasiyasının bilik iqtisadiyyatının inkişafında mühüm rol oynadığını bildirib.
Milli Məclisin deputatı Elnarə Akimova vurğulayıb ki, ədəbiyyat, dil və milli identiklik bir-biri ilə sıx bağlı anlayışlardır və bu sahələrdə aparılan elmi tədqiqatlar cəmiyyətin mənəvi inkişafına birbaşa təsir göstərir.
Konfrans “Ədəbiyyat” qəzetinin baş redaktoru Azər Turan, Elm və Təhsil Nazirliyi yanında İctimai Şuranın katibi Günay Əkbərova, Dokuz Eylül Universitetindən Murat Atanın çıxışları ilə davam etdirilib.
Sonra beynəlxalq konfransın təşkilinə və elmi əməkdaşlığın inkişafına verdikləri töhfələrə görə bir qrup iştirakçı və əməkdaş təltif olunub.
Tədbir bədii hissə ilə davam edib. Konfrans işini mayın 19-da davam etdirəcək.
jpg_1780766432.jpg)
