Gələn il sosial müavinətlərdə artımlar olacaq

Azərbaycan Prezidenti İlham Əliyevin tapşırığına uyğun olaraq, növbəti ildən etibarən pensiya, əməkhaqqı, eləcə də sosial müavinətlərdə artımlar həyata keçiriləcək. Əmək pensiyaları 2026-cı ildə orta aylıq əməkhaqqındakı artan faizə uyğun olaraq indeksləşdiriləcək. Belə ki, növbəti ildən etibarən əmək pensiyalarının indeksləşdirilərək artırılması mexanizmi dəyişir.

Milli Məclisin deputatı Vüqar BAYRAMOV qəzetimizə açıqlamasında dedi ki, orta aylıq əməkhaqqı məbləğinə qədər olan pensiyalar tam indeksləşdiriləcək, yəni təxminən 1200 manata qədər olan pensiyalar tam indeksləşdirilərək artırılacaq. 1200 manatdan 5 min manata qədər olan pensiyalar 0,5, 5 min manatdan çox olan pensiyalar isə 0,2 əmsalına vurularaq artırılacaq. Artımlar növbəti il 1 milyon 100 min vətəndaşımızı əhatə edəcək və bütün əmək pensiyalarına şamil ediləcək. "Həm yaşa, həm əlilliyə görə, həm də ailə başçısını itirməyə görə əmək pensiyası alan vətəndaşlarımızın pensiya məbləğlərində gələn ildən etibarən artımlar olacaq. Növbəti il, eyni zamanda minimum əməkhaqqında artımlar proqnozlaşdırılır. Bununla bağlı da dövlət başçısı tərəfindən göstəriş verilib. 2026-cı ilin fevral ayında Əmək Məcəlləsində olan dəyişikliklər Prezident tərəfindən təsdiq olunub və həmin dəyişikliklərə əsasən, minimum əməkhaqqı məbləğinə ildə ən azı bir dəfə baxılacaq. Bu, o deməkdir ki, artıq növbəti ildən etibarən hər il minimum əməkhaqqı məbləğinin artırılmasını müşahidə edəcəyik. Minimum əməkhaqqı məbləğindəki artımlar yalnız az maaş alan vətəndaşlarımıza deyil, eyni zamanda dövlət idarələrində çalışan, amma dövlət qulluqçusu olmayan və vahid tarif cədvəlinə uyğun olaraq vəzifə maaşları müəyyənləşdirilənlərin əməkhaqlarına təsir göstərəcək. Belə ki, minimum əməkhaqqının artırılması ilə bağlı ölkə rəhbəri tərəfindən sənəd imzalandıqdan sonra Nazirlər Kabineti dövlət müəssisələrində çalışan və dövlət qulluqçusu olmayan vətəndaşlarımızın vəzifə maaşlarının uyğunlaşdırılması ilə bağlı qərar qəbul edəcək. Bu artımlar təxminən 700 min nəfərə şamil olunacaq", - deyə o əlavə etdi.

Deputat sosial müavinətlərdə də artımlar gözlənildiyini vurğuladı. Həm sosial müavinət, həm də təqaüdlərin artırılması və bununla bağlı büdcədə vəsaitin ayrılması nəzərdə tutulub. 

V.Bayramov bildirdi ki, yaşa görə sosial müavinətin də artırılması təklif olunub: "Hazırda 220 manat olan yaşa görə sosial müavinət 2025-ci ildə sosial müavinətlər artırılanda qalxmadı. Ona görə də ötən dövrdəki inflyasiya səviyyəsini nəzərə almaqla, yaşa görə müavinətin də artırılması məqsədəuyğundur və bununla bağlı da profil dövlət qurumu tərəfindən qiymətləndirmə aparıldıqdan sonra qərarların veriləcəyi gözlənilir".

Deputat qeyd etdi ki, bütövlükdə sosial müavinətlərdəki artımlar daxil olmaqla, növbəti ilin sosial paketi 3 milyon vətəndaşı əhatə edəcək. 2027-ci ilin dövlət büdcəsindən sosial istiqamətə 18,7 milyard manat vəsaitin ayrılması nəzərdə tutulub ki, bu da bütövlükdə büdcə xərclərinin 44 faizini təşkil edir. Bu, o deməkdir ki, 2027-ci ildə büdcədən ayrılan hər 100 manatın 44 manatı sosial istiqamətə yönəldiləcək.

Əsmər QARDAŞXANOVA,

"Azərbaycan"