Aprelin 23-də İrəvanda Türkiyə bayrağının yandırılması və təhqir olunması erməni revanşistlərinin xəstə təfəkkürünün təzahürüdür. Sirr deyil ki, ermənilər uzun illər ərzində xəstə təxəyyüllə silahlanıblar, bunun onların beyinlərindən təmizlənməsi üçün hələ uzun illər lazım olacaq.
Milli Məclisin deputatı Arzuxan Əlizadə qəzetimizə açıqlamasında deyib ki, baş verən hadisələr - İkinci Qarabağ savaşı, ondan sonrakı dönəmdə ermənilərin düşdükləri durum onları hələ də ayıltmayıb. Erməni cəmiyyətində revanşistlər var, olub, gələcəkdə də olacaq. Erməni xisləti bizim normal məntiqlə qəbul edə biləcəyimiz xislət deyil. "Biz onun fərqində olmalıyıq ki, 1905-ci ili unutduq deyə bu, 1918-ci il, daha sonra 1930-1940-cı illər, sovet dönəmi, deportasiyalar və ən nəhayət, 1988-ci ildəki faciələrə gətirib çıxardı. Ermənilərin başımıza gətirdiyi dəhşətləri, eyni zamanda Qarabağda törətdikləri vandalizm və vəhşilik aktlarını heç vaxt unutmamalıyıq", - deyə o əlavə edib.
Deputat qeyd edib ki, bu xislətdə olan ermənilər kifayət qədər çoxdur və bu, dayanıqlı sülhə ciddi maeələr törədə bilən amillərdəndir: "Azərbaycan məsələlərə humanizm prinsipi ilə yanaşır, regionun əsas söz və güc sahibi olaraq bölgədə dayanıqlı sülhə nail olunması üçün əlindən gələni edir. Ermənilərə qarşı münasibətdə də jestlər edirik. Çalışırıq ki, problemlər öz həllini tapsın və regionda sülh olsun. Bölgədə sabitliyin olmasının məsuliyyətini də dərk edirik. Təəssüf ki, ermənilərin müəyyən hissəsi Azərbaycana və Türkiyəyə qarşı düşmən mövqeyindən əl çəkməyib və yaxın müddətdə geri çəkilmələri də mümkün görünmür. Bu reallıqları olduğu kimi qəbul etməliyik, illüziyalar zamanı deyil".
A.Əlizadə bildirib ki, erməniləri elə durumda saxlamaq lazımdır ki, başları üstündə "dəmir yumruğ"u daim hiss etsinlər: "Bunun müqabilində gələcəkdə Ermənistanla dövlətlərarası münasibətlərin normallaşması baş tuta bilər. Bunun üçün ilk növbədə Azərbaycanın həm hüquqi, həm də ədalətə söykənən haqlı tələbləri təmin olunmalıdır. Ermənistan konstitusiyasından Azərbaycana və Türkiyəyə qarşı ərazi iddialarını özündə əks etdirən müddəalar aradan qaldırılmalıdır. Demarkasiya və delimitasiya proseslərini və digər məsələlərdə üzərlərinə düşənləri ermənilər həyata keçirməlidirlər ki, Azərbaycanla yekun sülh müqaviləsi imzalansın. Bundan ən çox faydalanan da elə ermənilər olacaq".
Deputat vurğulayıb ki, Azərbaycan ərazi bütövlüyünü və suverenliyini bərpa etməklə, həmçinin Ermənistana da bu hüququ tanıyıb. Ermənistan hər zaman forpost, əlaltı, digər dövlətlərin boyunduruğu olub. Bu gün rəsmi İrəvan dövlətçiliyini, suverenliyini bərpa etmək imkanı qazanıb. Ermənistan iqtisadiyyatı çökmüş, digər ölkələrdən asılı vəziyyətdədir. "Ermənistan bu gün tranzit imkanlarını genişləndirə bilər. Ermənilər başa düşməlidirlər ki, kənar qüvvələrə arxalanmaqla heç nəyə nail ola bilməzlər. Onlar Azərbaycan və Türkiyə ilə sərhədlərinin açılmasını, dövlət olaraq ayaqda durmağı, nəhayət, boyunduruqdan çıxıb inkişaf etmək istəyirlərsə, iki ölkə ilə münasibətlərini normallaşdırmalıdırlar. Ermənilər yalançı soyqırımlarla, Azərbaycan və Türkiyəyə təhqir dolu çıxışlarla mövqe sərgiləməklə nəyəsə nail ola bilməzlər. Əksinə, ermənilər bu cür revanşist hisslərlə yaşayacaqlarsa, növbəti faciələrlə üzləşəcəklər. Yalnız ağıllarını başlarına yığmaqla suverenliklərini təmin edə bilərlər. Onlar bölgədə dayanıqlı sülhə nail olunması üçün Azərbaycanın atdığı humanist addımlara adekvat münasibət sərgiləməlidirlər", - deyə A.Əlizadə bildirib.
Əsmər QARDAŞXANOVA,
"Azərbaycan"
