Birinci vitse-prezident Mehriban xanım Əliyeva tibb işçilərinin maddi rifahının yaxşılaşdırılması, əməyinin yüksək qiymətləndirilməsi və səhiyyə sistemində insan kapitalının gücləndirilməsi məqsədilə Tibbi Ərazi Bölmələrini İdarəetmə Birliyi (TƏBİB) sistemində çalışan tibb işçilərinin əməkhaqlarının artırılması təşəbbüsü ilə çıxış edib. Prezident İlham Əliyev bu təşəbbüsü müsbət qarşılayaraq onun icrası ilə bağlı müvafiq tapşırıq verib.
Yeni əməkhaqqı qaydaları 2026-cı il sentyabrın 1-dən tətbiq olunur və TƏBİB-in tabeliyindəki tibb müəssisələrində çalışan 72 min 212 tibb işçisini əhatə edəcək. İslahat nəticəsində TƏBİB sistemi üzrə illik əməkhaqqı fondu 189 milyon manat artırılıb. Bu, tibb işçilərinin sosial rifahının gücləndirilməsinə və yeni əməkhaqqı mexanizmlərinin tətbiqinə yönəldilən əlavə maliyyə təminatını əks etdirir. İslahat xüsusilə ilkin səhiyyə, təcili tibbi yardım, anesteziologiya-reanimatologiya xidmətləri, eləcə də regionlarda kadr çatışmazlığı müşahidə edilən dar ixtisaslar üzrə çalışan həkimlər üçün əhəmiyyətli artımlar nəzərdə tutur.
Regionlarda kadr çatışmazlığı olan ixtisaslar üzrə xüsusi stimullaşdırıcı əlavələr və müəyyən xidmətlər üzrə işin nəticələrinə görə əlavə ödənişlərinə 1,3 əmsalı tətbiq olunacaq. Bu mexanizmlər həkimlərin regionlara cəlb olunmasına və tibbi xidmətlərə əlçatanlığın artırılmasına xidmət edir.
Tibb işçilərinin sosial rifahının yüksəldilməsi istiqamətində növbəti mühüm addımla bağlı AZƏRTAC-a açıqlama verən Zaqatala Rayon Mərkəzi Xəstəxanasının həkim-terapevti Nərmin Qurbanova bildirib ki, TƏBİB-in yaranması, islahatların tətbiqi ilə tibb işçilərinin məvacibləri xeyli artırılıb, fəaliyyətin qiymətləndirilməsi üçün əlavə həvəsləndirici bonuslar və ödənişlər sistemli şəkildə tətbiq olunub. Hazırda əməkhaqqının növbəti dəfə artırılması həkimlərin öz işlərinə daha məsuliyyətlə yanaşmasına, motivasiyalarının yüksəlməsinə və göstərilən tibbi xidmətlərin keyfiyyətinin davamlı olaraq yaxşılaşdırılmasına güclü təkan verir.
O bildirib ki, dövlətin səhiyyə sahəsinə göstərdiyi real diqqət və qayğı sayəsində xəstəxanaların maddi-texniki bazası əsaslı şəkildə yenilənib, mənəvi və fiziki cəhətdən köhnəlmiş tibbi avadanlıqlar ən müasir texnologiyalarla əvəz olunub.
“Bu yeniliklər regionlarda tibbi xidmətin əhatə dairəsini və miqyasını köklü surətdə dəyişib. Əvvəllər yalnız paytaxtda icra olunan mürəkkəb cərrahi əməliyyatlar, o cümlədən koronaroqrafiya, açıq ürək əməliyyatları və ağır neyrocərrahi müdaxilələr artıq bölgə sakinləri üçün də tam əlçatandır. Bu isə pasiyentlərin vaxt itirmədən, öz yaşayış yerlərinə yaxın ərazidə keyfiyyətli tibbi yardım almalarına şərait yaradır.
Bununla yanaşı, səhiyyə sistemində idarəetmənin və xidmətin müasirləşdirilməsi istiqamətində də mühüm addımlar atılır. Xəstəxanalarda kargüzarlıq işləri artıq ənənəvi kağız daşıyıcılarla deyil, sırf rəqəmsal texnologiyalar və elektron səhiyyə platformaları vasitəsilə həyata keçirilir. Sənədləşmənin rəqəmsallaşdırılması vaxt itkisinin qarşısını alır və görülən işlərin həm sürətinə, həm də keyfiyyətinə çox böyük müsbət təsir göstərir. Bütün bu kompleks tədbirlər ölkə səhiyyəsinin müasir standartlara uyğunlaşdırılmasına və vətəndaş məmnunluğunun yüksəlməsinə xidmət edir.
Ümumilikdə tibb işçilərinin əməkhaqlarının artırılması dövlətin həkim əməyinə və səhiyyə işçilərinin sosial rifahına göstərdiyi diqqətin və qayğının göstəricisidir. Həkimlik böyük məsuliyyət, peşəkarlıq və fədakarlıq tələb edən bir peşədir. Əməyimizin qiymətləndirilməsi həm sosial baxımdan, həm də peşəkar motivasiya baxımından vacibdir. Xüsusilə regionlarda çalışan və kadr çatışmazlığı olan ixtisaslar üzrə fəaliyyət göstərən həkimlər üçün nəzərdə tutulan əlavə stimullaşdırıcı tədbirlər sevindiricidir”, - deyə o qeyd edib.
