"Oğul
düşmən çəpəridir" deyib ulularımız. Odur ki, yalnız bir evə deyil, bir elə
dayaq oğullar böyüdüblər. Onları ən ağır işlərə, zəhmətə alışdırıblar. Oğullar
dinc vaxtlarda yurdu abad etdilər, bolluq, firavanlıq üçün əllərindən gələni əsirgəmədilər.
Vətənin dar günündə isə silaha sarıldılar, yağılara gözdağı oldular.
2020-ci
ilin payızında da mərd Azərbaycan oğulları üçün Vətən bütün doğmalardan daha
doğma, candan şirin oldu...
Qələbələrə
doğru...
Ermənistan
otuz ilə yaxın idi ki, Qarabağ və Şərqi Zəngəzurda işğalı davam etdirirdi. Həmin
yerlərin əzəli sakinləri yurdlarından qovulmuş, məcburi köçkün kimi Azərbaycanın
ayrı-ayrı bölgələrində yaşamaq məcburiyyətində qalmışdılar. Qarabağı və Şərqi Zəngəzuru
işğalçılar xarabalığa çevirmişdilər. Ermənistan 1994-cü il mayın 12-də atəşkəs
sazişi imzalasa da, Azərbaycana qarşı təxribatlarına son qoymurdular. İşğal
altında saxladığı bölgələrimizdə Ermənistan silahlı qüvvələri səngərlər qazır,
istehkamlar qurur, Azərbaycan Ordusunun mövqelərini və sakinlərimizin yaşayış
yerlərini intensiv olaraq iriçaplı silahlardan atəşə tuturdular. Hərbçilərimiz
və mülki vətəndaşlarımız şəhid olurdular.
2020-ci il
sentyabrın 27-də müharibənin başlamasına təcavüzkar Ermənistanın silahlı qüvvələrinin
növbəti təxribatı səbəb oldu. Prezident, Azərbaycan Silahlı Qüvvələrinin Ali
Baş Komandanı İlham Əliyev həmin gün xalqa müraciətində bildirdi: "Bu gün
səhər Ermənistan silahlı qüvvələri bir neçə istiqamətdən müxtəlif növ
silahlardan, o cümlədən ağır artilleriyadan istifadə edərək bizim yaşayış məntəqələrimizi,
eyni zamanda hərbi mövqelərimizi atəşə tutmuşdur".
Prezident,
Ali Baş Komandan düşmən atəşi nəticəsində mülki əhali və hərbçilərimiz arasında
itkilərin, yaralananların olduğunu dedi, xalqı əmin etdi ki, onların qanı yerdə
qalmayacaq.
Həmin gün
Ali Baş Komandan qismən səfərbərlik elan etdi. Ölkəmizin bütün ərazilərindən gənclər
işğal altında qalmış torpaqlarımızın azadlığı uğrunda döyüşlərdə iştirak etmək
üçün hərbi komissarlıqlara müraciət etdilər.
Xalqımızın
qürur günü
Vətən
müharibəsinin ilk günündən Azərbaycan Ordusunun hər bir əsgər və zabiti böyük Zəfəri
qazanmaq üçün əzmlə döyüşdü. 44 gün davam edən müharibənin hər günü onların
şücaəti, igidliyi sayəsində tariximizə qələbələrlə yazıldı. Azərbaycan Ordusu
düşmənin keçilməz saydığı istehkamları, səngərləri keçərək kəndlərimizi, qəsəbələrimizi,
şəhərlərimizi azad etdi. Şiddətli döyüşlərin gedişində Ermənistan silahlı qüvvələrinin
Azərbaycan Ordusu qarşısında zəifliyi, acizliyi göründü. İşğalçı ölkənin əsgər
və zabitləri arasında qaçmağı döyüşməkdən üstün tutanlar az olmadı.
Azərbaycan
Ordusunun igid əsgər və zabitləri isə ağır döyüşlərdə Vətənin hər qarış torpağı
uğrunda qəhrəmancasına vuruşurdular. Füzuli, Cəbrayıl, Zəngilan, Qubadlı və digər
ərazilərimizi düşmənin işğalından azad edirdilər.
44 gün
davam edən Vətən müharibəsində sərt iqlim şəraitində, dağlıq ərazilərdə
aparılan əməliyyatlar dünya hərb tarixində yeni səhifə açdı. Şuşa uğrunda gedən
döyüşlər müzəffər Azərbaycan Ordusunun qəhrəmanlıq salnaməsinin zirvəsi kimi
tarixə yazıldı. Sıldırım qayaları aşan igidlərimiz əlbəyaxa döyüşlərlə Şuşanı azad etdilər.
Onların qəhrəmanlığı sayəsində 8 Noyabr - Zəfər Günü xalqımızın qürur gününə çevrildi.
Xalqın gələcəyinə,
Vətənin sabahına işıq olan igidlər
Vətən
müharibəsində Qarabağ və Şərqi Zəngəzurun böyük hissəsi işğaldan azad edildi.
Ermənistan kapitulyasiya aktına imza atmaq məcburiyyətində qaldı. 2023-cü ilin
sentyabrında həyata keçirilən birgünlük antiterror əməliyyatı nəticəsində isə
Azərbaycanın ərazi bütövlüyünün tam bərpasına nail olundu.
Qarabağ və
Şərqi Zəngəzur düşmən əsarətindən qurtuldu. Bu tarixi qələbələr Azərbaycanın Vətəni
öz canlarından üstün tutan minlərlə igid oğlunun canı, qanı bahasına qazanıldı.
Onlar bir ailənin oğlu, valideynlərinin ümidi idilər. Ata ocağının çırağını
yandıracaqdılar. Amma Vətənin dar günündə düşmən güllələrinə sinələrini sipər
etdilər. Xalqın gələcəyinə, Vətənin sabahına işıq saçdılar.
Şəhidlərimizin
hər birinin öz həyat hekayəsi olduğu kimi, öz qəhrəmanlıq dastanı var. O səhifələri vərəqlədikcə mərd,
igid oğulların şücaətinə, cəsarətinə və Vətən sevgisinə heyran qalırsan. Kimisi
son gülləsinədək vuruşdu, kimisi silahdaşlarını xilas edərkən canından keçdi,
kimisi yaralı olsa da, döyüş meydanından çəkilmədi... Gənc idilər. Yollarına
göz dikənləri vardı. Arzuları çox idi. Ancaq onlar ömürlərini Vətənin
varlığına, azadlığına, suverenliyinə qurban verdilər. Şəhidlik zirvəsinə
ucaldılar. Qəhrəmanlarımızın əziz xatirəsi xalqımızın qəlbində əbədi yaşayır.
Adları küçələrə, məktəblərə verilir, xatirə lövhələri vurulur, abidələri
ucaldılır.
Onların
arzuları çiçək açır. Müstəqil, suveren Azərbaycanın hər bir guşəsində üçrəngli
müqəddəs bayrağımız dalğalanır.
Zöhrə
FƏRƏCOVA,
"Azərbaycan"
677jpg_1790033437.jpg)
