Şərqlə Qərbin, Şimalla Cənubun strateji qovşağında yerləşən Azərbaycan Avrasiya məkanında həlledici logistika mərkəzi və etibarlı tərəfdaş mövqeyini gündən-günə möhkəmləndirir. Coğrafi üstünlüklərini uzaqgörən siyasətlə birləşdirən dövlətimiz bu istiqamətdə real iqtisadi və siyasi dividendlər qazanıb. Həyata keçirilən məqsədyönlü siyasət ölkəmizi qlobal təchizat, rəqəmsal bağlantı və enerji təhlükəsizliyinin həlledici mərkəzinə çevirib. Kənar maliyyə asılılığı olmadan, öz daxili resursları hesabına nəqliyyat və logistika imkanlarını genişləndirən Azərbaycan Avrasiya coğrafiyasının əvəzolunmaz aktoru sayılır.
Birmənalı vurğulamaq lazımdır ki, bu strateji baxışın əməli müstəvidə uğur qazanması siyasi iradənin və düzgün qurulmuş diplomatiyanın nəticəsidir. Çünki səmərəli nəqliyyat sisteminin formalaşması üçün yalnız fiziki infrastruktur kifayət etmir, eyni zamanda regional sabitlik və qarşılıqlı etimada əsaslanan qonşuluq münasibətləri də vacib şərtlərdəndir. Bakı-Tbilisi-Qars dəmir yolu, Ələt Beynəlxalq Dəniz Ticarət Limanı, yenilənən magistral yollar və müasir gəmiqayırma imkanları ölkəmizin logistik xəritəsini köklü şəkildə dəyişib. Türkiyə, Gürcüstan və Mərkəzi Asiya dövlətləri ilə qurulan sıx tərəfdaşlıq gömrük və tarif siyasətinin uyğunlaşdırılmasına, yükdaşımaların sürətlənməsinə zəmin yaradıb.
Prezident İlham Əliyev IV Şuşa Qlobal Media Forumunda Azərbaycanın tranzit mərkəzinə çevrilməsində fiziki infrastrukturun və sağlam qonşuluq siyasətinin vacibliyini xüsusilə vurğulayıb: "Biz bəlkə də 10 ildən artıqdır çalışdıq ki, coğrafi mövqeyimizin üstünlüklərindən istifadə edərək, onları çoxtərəfli əməkdaşlıq üçün real platformaya çevirək. Müxtəlif meyarlar var idi ki, bizə beynəlxalq daşımalar məkanına çevrilmək imkanını yaradırdı və ya buna mane olurdular. İlk olaraq, bu, çatışmayan fiziki infrastrukturla bağlı idi və biz onu yaratmalı idik və yaratdıq. İkincisi, qonşularla qarşılıqlı əlaqələr olmadan siz heç zaman tranzit ölkəyə çevrilməyəcəksiniz. Əgər qonşularınızla münasibətləriniz pisdirsə, bu o deməkdir ki, heç nə alınmayacaq".
Coğrafi mövqe təkbaşına üstünlük yaratmır. Azərbaycan son 10 ildə böyük investisiyalar yatıraraq limanlar, dəmir yolları və magistrallar inşa etməklə bu potensialı real infrastruktura çevirib. Tranzit daşımalar zəncirvari prosesdir. Qonşularla qarşılıqlı etimad, səmərəli əməkdaşlıq olmasa, ən müasir infrastruktur belə heç nəyə yaramır.
Son illərdə dünyada cərəyan edən gərgin proseslər alternativ dəhlizlərə olan ehtiyacı kəskin şəkildə artırıb. Məhz bu fonda Orta dəhlizin və "Şimal-Cənub" marşrutlarının kəsişməsində yerləşən Azərbaycanın bağlantı strategiyasının nə qədər əhəmiyyətli olduğu aydın görünür. Çin, Mərkəzi Asiya, Cənubi Qafqaz, Türkiyə və Avropanı birləşdirən Orta dəhlizin cəlbediciliyinin artması yük axınını dəfələrlə artırıb. Azərbaycan bu artımı qarşılamaq üçün öz daxili resursları hesabına nəqliyyat imkanlarını genişləndirməkdə davam edir. Çünki artan tələbat çərçivəsində mövcud infrastrukturların ötürücülük qabiliyyətinin daha da yüksəldilməsi zərurətə çevrilib.
Dövlətimizin başçısı Şuşa Qlobal Media Forumunda bu məsələyə də toxunub: "Biz gözləmirdik ki, coğrafiyamız son vaxtlar bu qədər lazımlı olacaq. Şərq və Qərbdəki qonşularla - istər Mərkəzi Asiya ölkələri, istərsə də Gürcüstan, Türkiyə və Avropa kimi yaxın qonşularımızla qarşılıqlı fəaliyyət çox yaxşıdır. Əlbəttə, bütün bunları bir araya gətirmək üçün bizə dəhlizi səmərəli edə biləcək bir çox addımları atmaq vacib idi".
Bakı Beynəlxalq Dəniz Ticarət Limanının illik yükötürmə qabiliyyətinin 15 milyon tondan 25 milyon tona çatdırılması, həmçinin yerli gəmiqayırma zavodunda yeni gəmilərin inşasının sürətləndirilməsi istiqamətində addımlar atılır. Dəniz limanlarının tutumunun artırılması, gəmiqayırma zavodunda yeni gəmilərin inşası, dəmir yolu və avtomobil xətlərinin müasirləşdirilməsi Azərbaycanın qlobal logistika şəbəkəsindəki yerini daha da gücləndirir. Bu layihələr milli iqtisadiyyatın şaxələnməsi ilə paralel, regional inteqrasiyanın və ticarət dövriyyəsinin genişlənməsinə də xidmət edir. İnfrastrukturun bu cür məqsədyönlü genişləndirilməsi Azərbaycanın gələcəkdə daha da artacaq beynəlxalq daşıma tələbatını qarşılamağa tam hazır olduğunu və qlobal təchizat zəncirində əvəzolunmaz halqaya çevrildiyini nümayiş etdirir.
Nəticə etibarilə Azərbaycanın reallaşdırdığı hərtərəfli bağlantı siyasəti, coğrafi mövqeyin müasir infrastruktur, çevik diplomatiya və etibarlı tərəfdaşlıqla tamamlanması Bakını Avrasiyanın önəmli siyasi və iqtisadi güc mərkəzlərindən birinə çevirib. Bu mütərəqqi strategiya ölkəmizin uzunmüddətli milli təhlükəsizliyinin, iqtisadi dayanıqlılığının və beynəlxalq nüfuzunun etibarlı zəmanətidir.
İ.QOCAYEV,
"Azərbaycan"
jpg_1785417281.jpg)
