Kənd təsərrüfatı, ticarət, tranzit daşımalar, turizm...
Xəbər verildiyi kimi, Şuşada Azərbaycan-Latviya Hökumətlərarası Komissiyasının 9-cu iclası keçirilib. Görüşdə iki ölkə arasında iqtisadi, ticarət, enerji və humanitar sahələrdə əməkdaşlığın genişləndirilməsi məsələləri müzakirə olunub. Tərəflər qarşılıqlı investisiya imkanlarının artırılması və biznes əlaqələrinin inkişaf etdirilməsi istiqamətində fikir mübadiləsi aparıblar. İclas çərçivəsində regionlararası əməkdaşlıq, mədəni əlaqələrin gücləndirilməsi və qarşılıqlı səfərlərin intensivləşdirilməsi məsələlərinə də toxunulub.
Azərbaycan və Latviya arasında iqtisadi əlaqələr son illər davamlı inkişaf dinamikası nümayiş etdirir. Ticarət dövriyyəsinin artması, nəqliyyat-logistika sahəsində əməkdaşlıq və Orta dəhliz çərçivəsində birgə layihələr iki ölkə arasında iqtisadi münasibətlərin əsas istiqamətlərini təşkil edir. Latviya Azərbaycanın Avropa İttifaqı məkanında mühüm tərəfdaşlarından biri kimi çıxış edir və xüsusən tranzit daşımalar, liman infra-strukturu və yükdaşıma sahələrində əməkdaşlıq yüksək qiymətləndirilir. Eyni zamanda enerji, kənd təsərrüfatı və informasiya texnologiyaları sahələrində də qarşılıqlı maraqlar mövcuddur. İkitərəfli işgüzar görüşlər və biznes-forumlar bu əlaqələrin genişlənməsinə və yeni investisiya layihələrinin reallaşdırılmasına şərait yaradır.
Məhz bu strateji tərəfdaşlıq və əməkdaşlıq imkanları Şuşada keçirilən Azərbaycan-Latviya iqtisadi, elmi-texniki və mədəni əməkdaşlıq üzrə Hökumətlərarası Komissiyasının 9-cu iclasında müzakirə olunub. Qeyd edək ki, iclas iki ölkə arasında gələcək əməkdaşlıq üçün mühüm əhəmiyyət kəsb edirdi. İclasın əsas məqsədi yalnız mövcud əlaqələri gücləndirmək deyil, həm də yeni əməkdaşlıq sahələrinin müəyyənləşdirilməsi və qarşılıqlı maraq doğuran layihələrin təşviq edilməsi idi. İlk növbədə tərəflər kənd təsərrüfatı sahəsində əməkdaşlıq imkanlarını, innovativ texnologiyaların tətbiqini, məhsul istehsalının artırılması və ixrac potensialının genişləndirilməsi istiqamətində perspektivləri müzakirə ediblər.
Yeri gəlmişkən, Şuşadakı iclasdan bir gün əvvəl iqtisadiyyat naziri Mikayıl Cabbarov Latviyanın kənd təsərrüfatı naziri, Azərbaycan-Latviya iqtisadi, elmi-texniki və mədəni əməkdaşlıq üzrə Hökumətlərarası Komissiyasının həmsədri Armands Krauze ilə görüşmüşdür. Söhbət zamanı nazirlər hər iki ölkə arasındakı əlaqələrin bundan sonra da möhkəmləndirilməsini müzakirə etmişlər. Qeyd olunmuşdur ki, 2017-ci ildə imzalanmış Strateji Tərəfdaşlığın Qurulmasına dair Birgə Bəyannamə Azərbaycan və Latviya arasında ikitərəfli münasibətlərin dərinləşdirilməsi üçün möhkəm baza rolunu oynayır. Latviya ilə iqtisadi-ticarət tərəfdaşlığı inkişaf edir və ötən il, eləcə də 2026-cı ilin ilk iki ayı ərzində qarşılıqlı ticarət dövriyyəsinin artması buna nümunədir. Görüşdə Azərbaycanda investorlar üçün yaradılmış əlverişli fürsətlər haqqında məlumat verilmiş, üstəlik, birgə müəssisələrin yaradılması, tranzit daşımalar, turizm və digər sahələrdə əməkdaşlığın möhkəmləndirilməsi üçün geniş perspektivlər olduğu qeyd edilmişdir.
Bunun davamı olan Şuşa görüşündə xüsusən kənd təsərrüfatının prioritet sahəsi olan heyvandarlıqda birgə əməkdaşlıq imkanlarından da söz açılıb. Qeyd edilib ki, yüksəkkeyfiyyətli cins heyvanların, eləcə də süd və ətlik mal-qaranın Baltikyanı ölkələrdən, o cümlədən Latviyadan Azərbaycana gətirilməsi mümkündür. Latviyanın heyvandarlıq, süd istehsalı və meşə təsərrüfatı sahəsindəki təcrübəsi əməkdaşlıq üçün böyük imkanlar yaradır. Regionda fəaliyyət göstərən qabaqcıl hərrac mərkəzində ildə təxminən 30 min baş heyvan satılır və satılan heyvanların böyük hissəsi Türkiyəyə ixrac olunur. Bu səbəbdən Azərbaycana cins heyvanların tədarükündə hər hansı çətinlik gözlənilmir. Nazir Armands Krauze deyib ki, kənd təsərrüfatında digər mühüm istiqamət meşəçilik sahəsidir: "İqlim dəyişikliyinin təsirlərinin azaldılması və meşələrin bərpası bu gün bütün ölkələr üçün prioritetdir. Məlum olduğu kimi, xüsusilə bu regionda işğal dövründə meşə sahələrinin əhəmiyyətli hissəsi məhv edilib və onların bərpasına ciddi ehtiyac var. Bu sahədə "Nordik texnologiyaları"nın tətbiqi imkanları nəzərdən keçirildi. Sözügedən texnologiyalar meşələrin daha sürətli və daha səmərəli şəkildə bərpasına imkan yarada bilər".
Məlumdur ki, Azərbaycanın strateji coğrafi mövqeyi təkcə ikitərəfli əlaqələrdə deyil, üçüncü ölkələrlə ticarəti asanlaşdırmaq üçün də mühüm üstünlüklər təqdim edir. Ölkəmiz Avrasiyada əsas nəqliyyat və logistika mərkəzi kimi çıxış edir və "Şərq-Qərb", eləcə də "Şimal-Cənub" dəhlizlərini birləşdirən müasir infrastrukturla təmin olunub. Orta dəhliz isə Avropanı Mərkəzi Asiya və Çin ilə birləşdirən etibarlı və səmərəli nəqliyyat yoludur. Tədbirdə çıxış edən Azərbaycanın kənd təsərrüfatı naziri Məcnun Məmmədov tərəfdaşları bu dəhlizin təqdim etdiyi imkanları araşdırmağa, eləcə də Latviya investorlarını Azərbaycandakı iqtisadi zonalarda yaradılmış əlverişli şəraitdən yararlanmağa dəvət edib.
İclasın nəticəsi olaraq tərəflər iki ölkə arasında iqtisadi, kənd təsərrüfatı, elmi-texniki və mədəni əməkdaşlığın daha da gücləndirilməsi üçün konkret addımların atılması qərarına gəliblər. Qarşılıqlı investisiya imkanlarının genişləndirilməsi, birgə müəssisələrin yaradılması, ticarət və tranzit layihələrinin inkişafı ilə bağlı planlar gündəmdə yer alıb. Həmçinin heyvandarlıq, meşə təsərrüfatı və digər prioritet sahələrdə texnologiyaların və təcrübənin paylaşılması ilə əlaqədar perspektivlər müəyyənləşdirilib. Tərəflər Azərbaycanın strateji mövqeyi və müasir nəqliyyat dəhlizlərindəki imkanlardan yararlanaraq, regionda əməkdaşlığın daha geniş və davamlı xarakter almasını təmin etmək niyyətində olduqlarını bildiriblər. Tədbir qarşılıqlı səfərlərin və işgüzar əlaqələrin intensivləşdirilməsi üçün vacib platforma rolunu oynayıb.
Züleyxa ƏLİYEVA,
"Azərbaycan"
