Kənd təsərrüfatında innovasiyaların tətbiqi və təşviqi, fermerlər və sahibkarlar arasında əməkdaşlığın gücləndirilməsi, eləcə də müasir texnologiyalara çıxış imkanlarının genişləndirilməsi məqsədilə təşkil olunan növbəti Aqrar Biznes Festivalı Laçın rayonunda keçirilib.
Tədbir Azərbaycan Respublikasının Kənd Təsərrüfatı Nazirliyi və Azərbaycan Respublikası Prezidentinin Laçın rayonunda Xüsusi Nümayəndəliyinin birgə təşkilatçılığı ilə baş tutub.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, festivalın açılış hissəsində çıxış edən Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov rayonun zəngin təbii-coğrafi potensialından danışaraq, xüsusilə heyvandarlıq sahəsi üzrə ixtisaslaşma imkanlarını qeyd edib. O, işğaldan azad olunmuş ərazilərdə həyata keçirilən tədbirlər, eləcə də sahibkarlar üçün yaradılan əlverişli şərait barədə məlumat verib.
Kənd təsərrüfatı nazirinin müavini İlhamə Qədimova işğaldan azad olunmuş ərazilərdə nazirlik tərəfindən həyata keçirilən fəaliyyətlərdən bəhs edib. O, həmin ərazilərdə kənd təsərrüfatı təyinatlı torpaqların parsel əsaslı bölgüsü, torpaq ehtiyatlarından səmərəli istifadə və aqrar fəaliyyətin bərpası istiqamətində görülən işlər barədə danışıb.
Aqrar İnnovasiya Mərkəzinin direktoru Anar Cəfərov bölgələrdə keçirilən aqrar festivalların əhəmiyyətindən söz açıb. Bildirib ki, artıq 92 bölgədə bu formatda festivallar təşkil olunub və bu təşəbbüs aqrar sahənin inkişafına, regionlarda iqtisadi fəallığın artırılmasına və yerli istehsalçıların dəstəklənməsinə əhəmiyyətli töhfə verir.
Azərbaycan Biznesinin İnkişafı Fondunun İdarə Heyətinin sədrinin müşaviri Namiq Zeynalov sahibkarların maliyyə resurslarına çıxış imkanlarının genişləndirilməsi, dövlət dəstəyi mexanizmləri və güzəştli kredit alətləri barədə məlumat verib, aqrar sahədə fəaliyyət göstərən biznes subyektlərinin inkişafının stimullaşdırılmasının vacibliyini vurğulayıb.
Tədbirdə 20-dən artıq dövlət və özəl müəssisə öz xidmət və məhsulları ilə təmsil olunub. Kənd Təsərrüfatı Nazirliyinin müvafiq qurumları tərəfindən fermerlərə təqdim olunan subsidiya, kredit və aqrar sığorta mexanizmləri barədə ətraflı məlumat verilib, özəl sektor nümayəndələri tərəfindən yerli kənd təsərrüfatı məhsulları, toxum və ting materialları, yeni gübrə və pestisidlər, iqlimə davamlı sortlar və digər qabaqcıl məhsullar nümayiş olunub.
Festivalda aqrar xidmətlər, təchizat və təminat sahəsində fəaliyyət göstərən qurumlar öz xidmət və imkanlarını təqdim ediblər.
Rayonun aqrar potensialı nəzərə alınaraq festivalda heyvandarlıq sahəsinin inkişafı xüsusi diqqət mərkəzində olub. Bu istiqamətdə Heyvandarlıq və Baytarlıq elmi-tədqiqat institutları, eləcə də heyvandarlıq və balıqçılıq sahəsində fəaliyyət göstərən müəssisələr, həmçinin yem və baytarlıq preparatları istehsalçıları fəal iştirak edib, sahənin inkişafına yönəlmiş müasir yanaşmalar təqdim olunub.
Həmçinin peşə təhsili sahəsində fəaliyyət göstərən müəssisələr də festivalda təmsil olunublar.
Festivalda işğaldan azad olunmuş rayonlarda fəaliyyət göstərən yerli şirkətlər də iştirak edib, regionlarda həyata keçirilən aqrar fəaliyyətlər, istehsal imkanları və yeni təşəbbüslər barədə məlumat veriblər.
jpg_1776438999.jpg)
