İordaniya mətbuatında regionda yaranmış gərgin təhlükəsizlik vəziyyəti fonunda Azərbaycan Respublikasının həyata keçirdiyi təxliyə tədbirləri ilə bağlı məlumatlar dərc olunub.
AZƏRTAC xəbər verir ki, “əl-Dustur”, “Nayruz”, “əl-ğad”, “jordandaily” və digər media orqanlarında yayımlanan yazılarda Azərbaycanın Əmmandakı səfirliyinin təqdim etdiyi məlumatlardan da istifadə edilib.
Yazılarda qeyd olunub ki, regionda təhlükəsizlik vəziyyətinin gərginləşməsi ilə əlaqədar İran İslam Respublikası ərazisində olan Azərbaycan vətəndaşlarının təhlükəsizliyinin təmin edilməsi məqsədilə zəruri tədbirlər görülüb. Həyata keçirilən tədbirlər nəticəsində Azərbaycanın 285 vətəndaşı İran ərazisindən quru sərhədini keçməklə təhlükəsiz şəkildə ölkə ərazisinə daxil olub.
Məqalələrdə, həmçinin İran ərazisində fəaliyyət göstərən xarici diplomatik nümayəndəliklər və müxtəlif ölkələrə məxsus şirkətlərin təmsilçiləri tərəfindən Azərbaycanın Xarici İşlər Nazirliyinə çoxsaylı müraciətlərin daxil olduğu qeyd edilib. Həmin müraciətlərdə xarici dövlətlərin vətəndaşlarının və şirkət əməkdaşlarının təhlükəsiz şəkildə təxliyəsi üçün Azərbaycandan dəstək göstərilməsi xahiş edilib.
Vurğulanıb ki, ümumilikdə 50-dən artıq ölkənin 2500-dən çox vətəndaşının təxliyəsi ilə bağlı müraciət qeydə alınıb. Hazırkı vaxta qədər 66 ölkədən 1797 nəfərin Azərbaycan Respublikasının quru sərhədləri vasitəsilə təhlükəsiz keçidi təmin edilib.
Bununla yanaşı, yazılarda diqqətə çatdırılıb ki, Azərbaycan mövcud mürəkkəb və həssas təhlükəsizlik şəraitinə baxmayaraq, həm öz vətəndaşlarının təhlükəsizliyinin təmin edilməsinə prioritet yanaşır, həm də humanizm və beynəlxalq həmrəylik prinsiplərinə sadiq qalaraq digər ölkələrin vətəndaşlarına dəstək göstərməyə davam edir.
Eyni zamanda, qeyd olunub ki, martın 1-də İordaniya Haşimilər Krallığının İran İslam Respublikasındakı səfirliyinin 4 əməkdaşı Azərbaycanın “Astara” sərhəd-keçid məntəqəsi vasitəsilə təhlükəsiz şəkildə təxliyə olunaraq ölkə ərazisinə daxil olub.
Məqalələrdə regionda yaranmış mürəkkəb vəziyyət fonunda Azərbaycanın humanizm, qarşılıqlı dəstək və beynəlxalq əməkdaşlıq prinsiplərinə sadiq qalaraq insanların təhlükəsizliyinin təmin edilməsi istiqamətində fəaliyyətini davam etdirdiyi vurğulanıb.
jpg_1775472819.jpg)
