Bu dəfə quruculuq cəbhəsində
Qarabağ və Şərqi Zəngəzur Ermənistan silahlı qüvvələrinin işğalından azad edildikdən, ölkəmizin suverenliyi və ərazi bütövlüyü bərpa olunduqdan sonra dağıdılmış şəhər və kəndlərin tikilməsi, infrastrukturun bərpası, keçmiş məcburi köçkünlərin ata-baba yurdlarına qayıtması mühüm bir vəzifə kimi ölkəmizin qarşısında dayanırdı.
Bütün bu quruculuq işləri Zəfərin davamı olacaqdı, zəfərdən sonra növbəti zəfərə gedən yollarımız başlayacaqdı. Xalqımız şəhər və kəndlərimizin bərpası və yenidən qurulması naminə İkinci Qarabağ müharibəsində necə fədakarlıq göstərib vuruşmuşdusa, quruculuq işlərində də o cür fəallıq və cəsarət göstərəcəkdi.
Müharibədə qazanılmış Zəfərdən çox keçməmiş Prezident İlham Əliyevin müvafiq sərəncamları ilə işğaldan azad edilmiş ərazilərdə quruculuq işlərinə start verildi. Yollar çəkilməyə, infrastrukturlar bərpa olunmağa, kəndlər, şəhərlər yenidən salınmağa başladı. İşğal dövründə ermənilər şəhər və kəndlərimizi darmadağın edərək viran qoymuşdular. Keçmiş köçkünlərin geri dönüb yaşamaları üçün heç bir şərait yox idi. Şəhər və kəndlər yenidən tikilməliydi, yenidən qurulmalıydı. Əsaslı bərpa aparılmalıydı, müvafiq quruculuq tədbirləri görülməliydi. Rəşadətli ordumuzun İkinci Qarabağ müharibəsində qazandığı Zəfərdən bir müddət sonra Prezident İlham Əliyev xalqa müraciətində demişdir: "Böyük Qayıdış başlayır, bütün bərpa işlərinə başlanılıb. Əminəm ki, biz düşməni cəmi 44 gündə öz torpaqlarımızdan qovduğumuz kimi, tarixi torpağımızı - Qarabağımızı da ən qısa müddətdə bərpa edəcəyik".
Ötən illər ərzində Qarabağda və Şərqi Zəngəzurda aparılan quruculuq işləri, şəhər və kəndlərin yenidən salınması, bərpa edilməsi, keçmiş köçkünlərin mərhələ-mərhələ doğma ocaqlarına qayıtması bir daha göstərdi ki, Azərbaycan Prezidenti İlham Əliyevin dedikləri sadəcə bir vəd olmur. Dövlət başçısının rəhbərliyi altında işlənib hazırlanmış "Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı"nın qəbulundan sonra Qarabağ və Şərqi Zəngəzurda, ərazilər mina və partlamamış hərbi sursatlardan təmizlənməyə, şəhər və kəndlər yenidən tikilməyə, infrastruktur layihələri həyata keçirilməyə başlandı. Ərazidə aparılan quruculuq işlərində, şəhər və kəndlərin salınmasında böyük canlanma yarandı. Yaranan bu canlanma nəticəsində Qarabağa və Şərqi Zəngəzura həyat qayıtdı. Prezident İlham Əliyev deyir ki, əsas infrastruktur layihələrini, yəqin ki, bir-iki ilə başa çatdıracağıq. Ən çox vəsait bu layihələrə gedir. Çünki 60 kilometrdən çox tunellər, körpülər, elektrik stansiyaları, su anbarları inşa edilir: "Biz artıq orada 30-dan çox su-elektrik stansiyasını işə salmışıq, dəmir yolları çəkmişik. Yəni bütün bunlar əsas maliyyə yükü götürür. Təqribən 2-3 ildən sonra əsas infrastruktur layihələri başa çatacaq və ondan sonra yaşayış fondunun yaranmasına istiqamətləndiriləcək məbləğ daha böyük olacaq".
Prezident İlham Əliyev şəxsi nüfuzundan istifadə edərək bir çox xarici dövlətləri Azərbaycanın işğaldan azad olunmuş şəhər və kəndlərinin tikinti və quruculuq işlərinə cəlb edir. Məhz dövlətimizin başçısının səyləri sayəsində Qarabağda bərpa və quruculuq işlərinin ilk günlərindən başlayaraq, Azərbaycan Türkiyə, İtaliya, Çin, Mərkəzi Asiya ölkələri ilə fəal əməkdaşlıq edir. Yolların, tunellərin, sənaye zonalarının tikintisinə iri xarici şirkətlər cəlb olunur. Qarabağın və Şərqi Zəngəzurun genişmiqyaslı yenidən qurulmasına başlandığı ilk gündən türk dövlətləri bu prosesə böyük töhfələr verirlər.
Bu gün Azərbaycanın ürəyi, qəlbi Qarabağda və Şərqi Zəngəzurda döyünür. Erməni işğalından azad olmuş ərazilərin bərpası və yenidən qurulması Prezident İlham Əliyevin rəhbərliyi altında uğurla və sürətlə davam edir.
V.MƏHƏRRƏMOV,
"Azərbaycan"
